¹ Lé gakumua méa, Yésu kudo yiho nusrɔnlawo ozɔn to bafo ho ébo déwo mé yikɔ toho dé. Gbékumuagbéa nyi Sabbat ho n'kéké. Féfé lé ti nusrɔnlawo tétéa oŋɛ bafo yi oklɛn lé du. ² Ké Farizitɔ déwo kpɔ woa, olé tonu Yésu bé: "kpɔ, énusrɔnlawo wo lé da lé éséa ji, dobéna olé énu ŋɛm lé Sabbat ho n'kéké ji." ³ Vɔa Yésu lé tonuwo bé: "mimu hlɛn énuké éfia David kudo yiho n'timéwo wɔ gakémé féfé lé tiwoa? ⁴ Iya kudo yiho n'timéwo yi tsɔtsihɔmé yi odu kpɔnɔ kéyi élé bé Osofowo dédé ko yi la dui. ⁵ Mimuhlɛn lé Mosé ho ésé ho agbalɛn mé kpɔ bé Osɔfo ké olé édɔ lé tsɔtsi hɔméa n'kpɔ émɔ yi wɔawɔ édɔ lé Sabbat ho n'kéké ji oa? ⁶ Lé nyatoho méa amédé lé gɛké ké jé n'kɔ ni tsɔtsihɔ kia! ⁷ Mawunya édéwo lé gblɔ bé: "énublanuikpɔkpɔ n'lé ji tso miagbɔ n'nyi vɔsasawo" Né inyi bé misé mawunya kia gɔméa éla nyi bé mima tsɔ énya dé amékéwo n'ja agɔ dékpékpé n'tiwo. ⁸ Elabéna Amégbétɔ ho via yi nyi Apétɔ na Sabbat ho n'kékéa tsan. ⁹ Lé ékia ho n'gbodo méa, étso lé wogbɔ yi yi Yudatɔwo ho tsɔtsihɔmé. ¹⁰ Yi kpɔ n'tsu dé lé guwun ké yiho alɔmé hu. Farizitɔwo lé bia Yésu bé: "élé éséa nu bé wɔada égbé lé amékéa n'ti ké égbé nyi Sabbat ho n'kékéa?" tsagbé négblɔ bé "ɛn" yi wɔatsɔ énya dé yin'ti. ¹¹ Yésu do yinti nuwo bé: "améka yi lé mia mé ké yiho alɛn la gédé évudo mé lé Sabbat ho n'kéké ji yi élagbé alɛn a dé évudoa mé? ¹² Amégbétɔ ho agbé n'lé vévédé tso wu alɛn toa? Yinti ényɔ bé wɔawɔ édɔ nyɔɛ lé Sabbat ho n'kéké ji." ¹³ Tétéa Yésu tona n'tsua bé: "jɔ alɔ wo" éjɔɛ yi éhaya zidika, alɔ évégɔa tsa! ¹⁴ Lé énuké Yésu wɔa n'tia, Farizitɔwo wɔ étakpékpé dé yinti léké wɔawɔ yi wuia n'ti. ¹⁵ Ké Yésu nya susu bada ké Farizitɔwo lé do dé yintia, étso lé wɔagbɔ, vɔa amé sugbɔ ti do yi éda gbé lé wo n'ti. ¹⁶ Tétéa édo ésé niwo bé owun gbé gblɔ énya kéa ni amédéwo, ¹⁷ bé ékia lawu énya ké ényagblɔdila Yésaya gblɔ déa. ¹⁸ "Mikpɔ nyé dɔla améké ényé n'tɔ n'tsan, améké nyi lɔnlɔntɔ nyé ké yinti luvɔnyé kpɔna jijɔ lé. Matsɔ gbɔgbɔ nyé tsé dé imé yi adrɔnvɔnu dukɔwo. ¹⁹ N'wɔna ajré alo dana aha o yi omasé yiho égbé lé émɔwoji tsa o. ²⁰ N'wɔna funyafunya kudo amé gblɔɛwo alo omutina wɔaho émɔ vitukuitɔawo tsa ji o. Lé yiho éjidudu kpɔtɔɛ méa, atsri ajré wɔwɔ dékpékpé. ²¹ Yi yiho n'kɔ anyi "hihéamé kpata ho mɔkpɔkpɔ." ²² Tétéa n'tsu dé ké nyi n'ku gbagbatɔ kudo étokunɔ, ké gbɔgbɔvɔn lé iméa, okplɔɛ tsé va Yésu gbɔ. Tétéa Yésu yɔdɔnɛ yi élékpɔnu yi lé honu. ²³ Nukunu kia wɔ ya ni améha yi odaha lé gblɔ bé: "alo amékia yi nyi David ho via?". ²⁴ Vɔa ké Farizitɔwo gbé sé nukunu ké Yésu wɔa, olé gblɔ lé wɔadékéwo mé bé: "amékia lé nya gbɔgbɔ vɔn lé Bézébul gbɔgbɔvɔn ho éfia ho n'sén mé yi." ²⁵ Vɔa Yésu nya wɔayo susu élé tonuwo bé: "éfiaduho dékpékpé ké madé toho amévé zé zidika bé éyina dé tsrɔntsrɔn mé yi aho dékpékpé alo édu dékpékpé ké latso dé évégɔa n'tia la gban. ²⁶ Né inyi bé abusam lé nya abusam, édo mama dé yidokémé. Lémɔyi éfia duhoa lanɔté lé yidoké si? ²⁷ Yi né n'lé nya gbɔgbɔvɔn lé bézébul ho n'sé méa déé, n'sé ka yi amékéwo ti ni mia ozana yi tsé nya na gbɔgbɔvɔn wo yi? Hado énukéa n'tia, ola nyi miaho kojoé dolawo. ²⁸ Né inyi bé Mawu ho gbɔgbɔ yi n'tsolé nya gbɔgbɔn vonwo la, tété la minyɛ bémawufiaduhoa vado miadomé. ²⁹ Yi lémɔyi amédé lava do amé sénsén ho ahomé yi va fi yiho énu nyɔɛwo né n'nyi bé édoha kudo améa oa? Fiafia lémɔyi élava finu lé yiho ahomé. ³⁰ Misé bé améké n'lé jinyéwo alo tso dé éjinyéwoa alo améké n'hona énu kudo mu wɔa yiya yi kaka. ³¹ Yinti n'lé gblɔɛ ni mi bé wɔatsɔ énuvɔndékpékpé kudo busunyadékpékpé tsé ké améwo, vɔa busu nya dé gbɔgbɔ n'tia oma tsé ké améwo gbédé o. ³² Né amédé gblɔ tso amégbétɔvia n'tia, wɔatsɔɛ tsé ké. Vɔa améké la honu tso gbɔgbɔ kɔkɔé n'tia oma tsé kéwo lé éhihé kéa mé o alo ké lava va mé o. ³³ Alo miatsɔ ati yi wɔɛ nyɔɛdé, alo yiho ékutsétséa nyɔɛdé alo miatsɔ ati yi wɔɛ bada alo yiho ékutsétsé bada, dobé wɔajési ati tso yiho ékutsétsé mé yi. ³⁴ Mia édan ho jijimé viwo, amé vɔndiwo, lémɔyi miatéwun honu nyɔɛwo? Elabéna énya dékpékpé ké amé gblɔna tsona yiho éjimé. ³⁵ Amé nyɔɛ wɔna énuké nyɔ énu nyɔɛ kéwo tsona yiho éjimé yi amé bada wɔna énu bada kéwo tsona yiho éjimé. ³⁶ Yi n'lé gblɔɛ ni mi bé lé vɔnudrɔndrɔn ho gaméa, amédékpékpé la na akɔnta dé énya madi nya dékpékpé ké égbloa n'ti. ³⁷ Yi ta mido la nyɛ bé énya dékpékpé ké la do tso miaho numéa fifi kia lé toho dékpékpé ké mianɔa, lé vɔnudrɔndrɔn ho gaméa yiya yi wɔatso do kɔjoé ni mi alo woatso bufɔn mi. ³⁸ Tétéa, Yudatɔwo ho agbalɛn fiala déwo kudo Farizitɔwo do yinti lé gblɔna Yésu bé: "Apétɔ milé ji Jési kudo nukunu dé tso égbɔwo." ³⁹ Vɔa Yésu do yinti lé gblɔnuwo bé: " Jijimé bada kudo ahasitɔwo lé ji jési kudo nukunu. Edé n'lé tso wu ényagblɔdila Yonas tɔ o. ⁴⁰ Elabéna éké Yonas wɔ n'kéké amétɔn lé akpavi ho podomé. Nɛnɛ ké amégbétɔ ho via lawɔ n'kéké kudo ézandodo amétɔ lé anyigban ho édomé. ⁴¹ Lé vɔnudrɔndrɔn ho n'kékéa jia, Ninivétɔwo woatso dé dukɔ kia n'ti yi wɔabu fɔn mi. Elabéna éké Yona gblɔ mawu ho nya ni wo la, otrɔ éjimé yi odati lé wɔaho énu tovowo wɔwɔmé yi trɔ dé Mawu n'ti. Fiafia mikpɔ amédé lé gɛké ké kpé tsé wu Yona. ⁴² Efia nyɔnu ké tso édua ho gɔméa tso vɔnudrɔndrɔn ho n'kéké kumuaji yi bufɔn n'tsu jijimé kumɔa kpata. Salomon ho énuyanya ta étso didiho va yigbɔ bé yéasé yiho nufiafia ho ényawo, fifia kpɔda amédé lé gɛké ké kpé tsé wu Salomon. ⁴³ Né inyi bé gbɔgbɔ vɔn dé do lé amé méa, éyina zogbéji tsagbé yéakpɔ gbɔnémé, vɔa n'kpɔnɛ gbédéwo. ⁴⁴ Tétéa égblɔna bé: "magbétrɔ yi aho ké mé n'tsoa." Né éva do guwun a, ékpɔna bé ojra ahoamé do yi énuwo lé alɔji. ⁴⁵ Tétéa gbɔgbɔ vɔn a yina yi lavɔ kplɔ gbɔgbɔvɔɛn amandré ké odo n'sé wu yi n'tɔa tsé kpé dé yidoké n'ti yi ola va nɔ guwun. Enukéa yi wɔnɛ bé améa ho nɔnɔmé nyra tso wu san toa. Nɛnɛ tutu yi éla nɔ na jijimé bada kia." ⁴⁶ Eké Yésu gbé lé honu ni améhaa, kpɔ, énɔa kudo nɔvia n'tsuviwo jété lé ahoa n'gbodomé yi onɔ jijim bé yi wɔa honu kudoé. ⁴⁷ Amédé va igbɔ yi lé gblɔ nɛ bé: "énɔwo kudo nɔviwo lé jiwo bé yiwo la honu kudo wo." ⁴⁸ Vɔa Yésu lé bia améa bé: "mɛka yi nyi énɔnyé, yi mɛkawo yi nyi nɔvinyé n'tsuwo?" ⁴⁹ Tétéa étsɔ yiho alɔ dida nusrɔnlawo gbɔ yi lé gblɔ bé: "mikpɔ amékéawo yi nyi énɔnyé kudo nɔvinyé n'tsuwo! ⁵⁰ Yi éyi iji bé: Améké léwɔ fofonyé ké lé jipoa ho lɔlɔnua yi inyi nɔvinyé nyɔnu, ntsu kudo énɔnyé."