¹ Eva va imé bé Yésu wu énufiafia nu ni yiho nusrɔnlawo wuiévéawo, Yésu étɔ jo yi va lé fia nu yi lé gblɔ Mawunya lé éduawo mé yi na. ² Tétéa Yohanɛs batista sé nukunu gbogbo kéwo kpata Yésu lé wɔ lé gakpawo mé, édɔ amé dida yiho nusrɔnlawo yi élé biɔ bé: ³ "éwo yi nyi améké la va alo amébu gbélé ké mido ji?" ⁴ Yésu do yinti niwo yi lé gblɔnawo bé: "miyi yi miagblɔ ni Yohanɛs nukunu kéwo kpata mikpɔa. ⁵ N'kugbatɔwo lé kpɔ nu, bafawo lé zɔ azɔnli, anyijélawo ho n'tiwo kɔ, étokunɔwo lé sénu, tséyi ijia amékukuwo lé fɔn, yi n'lé gblɔ énya nyɔɛn na amédahéwo. ⁶ Wɔayra amékéwo hɔna éjinyé séna." ⁷ Ké n'tsuawo léjo léyi émɔjia,Yésu tɔɛji lé honu na améha tso Yonanɛs yinti bé: "n'ka yi miyi zogbéaji bé miakpɔ yi? léké aya lé hohoa ya.? ⁸ Né n'nyi nɛnɛwɔa n'ka miyi gawun bé miakpɔ yi? amékéwo do awu nyɔɛwoa? Lé ésé méa, amékéwo do na awu nyɔɛwoa olé fiasawo mé. ⁹ Vɔa n'ka yi mido bé miakpɔ yi, ényagblɔdila? ɛn, n'lé gblɔɛ ni mi bé éwu ényagblɔdila n'tɔ tsan. ¹⁰ Elabéna Yohanɛs nyi amé ké wunti oŋlɔ dɛ bé: "madɔ dɔla nyé dé n'kɔ niwo amé ké la jra émɔ wɔado kén'gbɔ na va." ¹¹ N'lé gblɔɛ ni mi lé nyatoho mé bé, lé amékéwo nyɔnuwo jiwo nɛnɛa bé amédékpékpé n'jé n'kɔ wu Yohanɛs Batista o. N'gbé lé igblɔm ni mi bé amé kpɔtɔa lé jipo fiduhoaméa do asihɔhɔ wu iya. ¹² Tso kaka Yohanɛs batista ho n'kékéwo mé va sé dé fifi kia, jipo lé n'kɔ yim akpasésé tɔɛ yi n'kumé sɛntɔwo lé hɛ kudo akpasésé. ¹³ Elabéna éséa kudo ényagblɔdilawo kpata kaka va kɔdé Yohanɛs jia ogblɔɛ énya kéa tsé dɛ. ¹⁴ Yi né miléji bé miahɔ énya kéwo n'lé gblɔ ni mi la ji séa la, mido la nyɛ bé Yohanɛs ényé Eliya, améké énya gblɔdila gblɔ bé élava jé n'kɔ. ¹⁵ Né inyi bé amédé lé gbésɔsɔ bé yéasé énua, nésé fifi kia zidéka. ¹⁶ N'ka yi miatso sɔ kudo jijimékéawo? Elé sigbé léké déviwo lé blévi lé toho dika lé asimé yi olé gblɔ na wɔanɔɛwo bé: ¹⁷ "Miji jijɔ ho éhawo ni mi vɔa mimu kpɔ jijɔwo, n'ti yi miji éku hawo ni mi ganké mimu fan konyi tsan o." ¹⁸ Dobé ké Yohanɛs Batista va, n'du kpɔnɔa yi n'nu vɛn a tsan yi olé gblɔ bé: "gbɔgbɔ vɔn lé imé." ¹⁹ Amégbétɔ ho vi va, édunu, énu nu yi miawo ké yi gbé gblɔ bé: "énutsu dutɔ kudo ahanumunɔ yi nyi n'tsu kéa yi élé doha kudo égajɔtɔwo kudo énuvɔn wɔlawo!" Vɔa Mawu ho nunyanya yi tso ényamé nɛ hado yiho nuwɔwɔwo n'ti." " ²⁰ Tétéa Yésu tsɔ énya dé édukéwo mé éwɔ nukunu sugbɔwo léa élabéna ogbé bé yiwomahɔ Mawu ji sé o. ²¹ Egblɔ nuwo bé, "baba ni mi, Korazin kudo Bétsaida! né inyi bé nukunu kéawo ké jɔ lé Tiro kudo Sidɔn kéwo nyi édu kéwo vɔndi yi muwɔ énukéawo lé sigbé léké n'wɔɛ lé miagbɔa ola ké trɔ lé wɔaho éjimé yi hɔ Mawu ji sé kudo kotoku kudo zomafi. ²² Lé nyatoho méa, n'lé gblɔɛ ni mi bé anɔ bɔbɔɛ ni Sidɔn kudo Tiro lé vɔnudrɔndrɔn toho. ²³ Ewo Kapernaum, togbɔ bé odo bubu ganwo dé n'tiwo tsa la, ola yi ézomavɔ mé. Dobé né inyi bé Sodɔ muwɔ nukunu sugbɔwo kéwo lé owo méa, éla nyi bé oma tsrɔn édua o, élananyi tsé va sé dé égbé. ²⁴ Vɔa n'lé kadé iji ni mi bé éla nɔ bɔbɔɛ ni Sodom lé vɔnudrɔn gbé la tsé wu mi." ²⁵ Lé gakumɔa méa Yésu lé gblɔ bé : "o tatanyé, jipo kudo anyigba ho Mawu n'lé dakpé niwo bé néwlɔa nyatoho dé amékéwo lé tsɔ wɔadéké sigbé énunyalawo ganwo, vɔa oya né dé tsé fia déviwo. ²⁶ ɛn tata n'lé dakpé bé éjé nuwo yi owɔɛ nɛnɛ. Egbé gblɔ yi iji bé: ²⁷ "étɔnyé tsɔ énukéawo kpata tsé dé asi num. Amédé kpékpé n'jénési évi né n'jési tata o, yi amédé tsan n'jénési tata né n'jési évia o kudo améké jro évi bé né dé. ²⁸ Miva égbɔnyé miawo ké agbé lé miaho éta ji yi lé kpé mi yi ma nami gbɔdémé. ²⁹ Mitsɔ atitsɔnu nyé tsé dé miadéké ji yi miasrɔn énu lé égbɔnyé, énuké n'tia n'fa, n'bɔbɔ édokényé yi miaho luvɔwo wɔakpɔ jijé imé. ³⁰ Elabéna atitsɔnu nyé lé bɔbɔɛdé yi agbanyéa tsan n'kpé o."