¹ Yésu bɔ yi nusrɔn wuiévéawo yi énawo nusɛn bé wɔanya gbɔgbɔ vɔnwo lé améwo mɛ; yi wɔadagbé lé édɔnɔ dékpékpé n'ti. ² Kpɔ nusrɔnla wuiévéwo ho n'kɔ yi nyi Simɔn (ké ogbéyɔna bé Pétro) kudo Andréa nɔvia, Yakobo, Zébédéwo ho vi kudo Yohanɛs nɔvia, ³ Filipo kudo Bartoloméo, Toma kudo Matéo égajɔla, Yakobo Alféo ho vi kudo Tadéo, ⁴ Simɔn, améké nyi Zélɔte kudo Yuda Iskariɔt améké tsɔ Yésu na yuda tɔwo yi owuia. ⁵ Yésu dɔ wɔamé wuiévéawo kpata yi tsɔ égbé té dé alɔmé niwo bé: "Min'gbé étrɔnsubɔlawo kudo Samaritɔwo gbɔ o. ⁶ Vɔa miyi Izraëlviwo kéwo nyi Mawu ho alɛnvi yi obua gbɔ. ⁷ Yi né miyi, migblɔ nawo bé: "Jipofiaduhoa la va do vɔ." ⁸ Mifɔn amékukuwo, miyɔdɔ na amékéwo lé lédɔa, miwɔ anyijélawo n'ti nékɔ yi mianya gbɔgbɔ vɔn wo. Mihɔ énuké kpata éfɛn dékpékpé mahé miatsan mi tsona éfɛn dékpékpé mahé. ⁹ Mingbé tsɔ éga, alo sika dé asi lé miaho émɔzɔzɔ mé o, min'gbétsɔ émɔzɔnzɔn kotokuwo dé asi o, alo awu évégɔa, alo afɔkpa alo atiwo dé asiméwo. ¹⁰ Elabéna édɔnwɔla jé na éfɛn tu. ¹¹ Né inyi bé miyi édugan mɛ alo kɔpé ké mé miayia miji améké nyi Mawu vɔn la yi mianɔ yigbɔ lé ahomé kaka na gamé ké mia tso lé éduamé. ¹² Né iyi bé mido aho dé méa, mindo égbé niwo. ¹³ Né inyi bé aho vɔna na Mawua, miaho n'tifafa né gbadé iji. Vɔa né inyi bé ahoa mulé nɛnɛwɔa,mingbé yrawo. ¹⁴ Na amékéwo lagbé bé yiwo mahɔ miaji séa, alo bé yiwo masé miawo énya ké miagblɔawo ji séa, né inyi bé mijo lé aho kumua mé alo édukumɔa mɛa, mihuhu miaho afɔ kéwo do tohoa. ¹⁵ Lé nyatoho méa, n'lé gblɔɛ ni mi bé, élanɔ bɔbɔɛ na Sodom kudo Gomora tɔwo lé vɔnudrɔndrɔn ho n'kéké tséwu amékiawo tɔgbé. ¹⁶ Mikpɔ, n'lé dɔ mi sigbé alɛnviwo nɛnɛ bé miayi jantawo domé, yintia mijayé édanwo nɛnɛ yi mijé sigbé akpakpawo. ¹⁷ Mikpɔ miadékéo ji nyɔɛdé lé amékumɔawo n'ti dobé ola tsɔ mi na yi wɔadrɔn vɔnu mi yi wɔapo mi yi wɔapo mi lé wɔaho tsɔtsihɔ ganwo mɛ. ¹⁸ Wɔadrɔn vɔnu mii lé éfiawo kudo émɔméfiawo gbɔ hado ényé n'ti bé nanyi kpɔdéwun na wo kudo étrɔn subɔlawo kpata. ¹⁹ Né inyi bé olé mi yi kplɔ mi tséyi vɔnudɔdrɔn toho la, mingbé tsiji na énya kéwo miagblɔa o, élabéna ola tsɔ énya ké miagblɔa tsé ni mi lé gapopo kumɔa ji. ²⁰ Dobé n'nyi miayo n'tɔ yi lé ho nu o. Vɔa lé égobu méa, miatɔ ho gbɔgbɔ la honu lé mia mé. ²¹ Nɔvi la tsɔ nɔvia na éku, yi tata n'tɔ la tsɔ évia tsé na éku. Eviwo la tso dé wɔaho tatawo ji yi énukéa latsɔ éku va. ²² Améwo kpata latsri miaho énya gbɔ hado n'kɔ nyé ta. Vɔa miadométɔ ké la nɔté sésɛn dé va sé dé énu wuwu wɔakpɔ dédé. ²³ Né inyi bé oti miayomé lé édu kumɔa mɛa, misi yi miayi édu bubu mé. Elabéna lé nyatoho méa, n'lé gblɔɛ ni mi bé: "Mima wu étsadidi lé Izraël ho éduamɛ kɛn'gbɔ Amégbétɔ ho via la trɔ va o. ²⁴ Nusrɔnla muwu na yiho nufiala o, alo subɔla muwuna yi Apétɔwo. ²⁵ Elé bé nusrɔnla nénɔ sigbé yiho nufiala, yi subɔla nénɔ sigbé yiho apétɔ. Né inyi bé oyɔ aho jikpɔla bé Abusam la, lémɔyi wɔayɔ amékéwo lɛ ahoamɛ! ²⁶ Yinti n'lé gblɔ ni mi bé min'gbévɔn o, élabéna n'dékpékpé n'nyi énu wlawla o bé omaté dénu lé iji o. ²⁷ Enya kéwo n'lé gblɔ ni mi lé wlawla méa, migblɔwo kudo aha sɛsɛn lé n'kéké ho kékéli mé, yi muhonu dé éto mi nu mila, midégbéfɛn lé ahowo ho zingliwo ji. ²⁸ Min'gbé vɔn na amékéwo lawu n'tilan yi omaté wu miaho luvɔ gbéwɔa. Vɔa mivɔn ni améké laté tsrɔn n'tilan kudo kudo luvɔ lé ézomavɔ mɛ. ²⁹ Nɛnɛ yi nyi hévin ho égahomé? Munyi pésewa déka yi oa? Yi wɔadomé tɔ déka kawi lɛ ké fofo la n'kpɔna yi ta ma. ³⁰ Nɛnɛ ké yi Mawu nya éda héhlénmɛ nɛnɛ ké lé miaho étaji. ³¹ Min'gbé vɔn o. Miawo ya mi hɔasi ni Mawu yu Hénvi kumɔawo. ³² Amédékpékpé ké la gblɔnya nyé nyɔɛn lé dukɔwo ho n'kuméa, ényé tsan magblɔ yiho énya nyɔɛwo lɛ étɔnyé ho n'kumɛ lé jipo. ³³ Vɔa améké lagbé yi mayɔ éjinyé sé wo lé améwo ho n'kuméa, ényé tsan magbé nu lé igbɔ lé étɔnyé ké lé jipoa ho n'kumé. ³⁴ Min'gbé bu susu bé n'tsɔ n'ti fafa va anyigba ji o. Nyémuva bé mawɔ nutifafa o, vɔa éhɛ yi n'tsé va. ³⁵ Elabéna n'va bé mawɔ n'tsu évi natso dé yiho tata n'ti, yi évi nyɔnu natso dé énɔa n'ti, yi lɔhɔyɔvi dé lɔhɔa n'ti. ³⁶ Amé ho futɔwo n'tɔ anyi yiho pométɔwo. ³⁷ Améké lɔn étɔa alo énɔa tsé wum la, mujé bé nanyi tɔyné o, yi améké lɔn évia nutsu alo nyɔnu wum la mujé bé nényi tɔnyé o. ³⁸ Né inyi bé amédé gbé yi mutsɔ yiho atitsoga hi tim do wɔa, yitsa mujé bé nényi tɔnyé o. ³⁹ Né inyi bé amédé lé dé yiho agbé n'ti séséndé la, éla bui, yi né inyi bé amédé tsɔ yiho agbé na dé étanyéa la kpɔɛ lé énuwuwu. ⁴⁰ Né inyi bé amédé hɔ miaji séa hɔ éjinyé sé, yi améké la hɔ éjinyé sé la hɔ améké dɔm va ji sé. ⁴¹ Améké lahɔ énya gblɔdila ji sé énuké n'tia ényi ényagblɔdila la, ahɔ énya gblɔdila ho éfɛn tu. Améké hɔ améjɔjɔɛ ji séa énuké n'tia ényi améjɔjɔɛla, ahɔ améjɔjɔɛ ho éfɛn tu. ⁴² Né inyi bé amédé lé miamé yi na étsi fafa kɔkɔm vituikui tsé na dévitukui déka énuké n'tia ényi nusrɔnla nyéa, lɛ nyatoho mɛa n'lé gblɔɛ ni mi bé, mabu yiho toho dodoa lɛ égbɔnyé gbédéwo.