parfait-ayanou-wci_jas_text

Età 1

¹ Yàkobu, Mawu gàkù Aƒetɔ Yesu Kristo be dɔ́cɔ́ví dògbè ɖúɖa tógbɛ woevè yìwó le gbedía. ² Nɔ̀vínyèwó, dòdókpɔ́ vòvòvò yìwó mè tóŋú mì lèa ne zũ djìdjɔ̀ blíbó ne mì, ³ mìa nyá be mìa be xɔ̀sèa be dòdókpɔ́ djìnà djìgbɔ̀ɖí. ⁴ Vɔ̀a elèbe djìgbɔ̀ɖía ba wù yíbe dɔ́a nú lè blìbódèdè mè, be ne mìa dèblìbó eye mìa sɔ̀gbè lè núsíanú mè. ⁵ Ne mìa dòmètóɖe hĩa núnyá, ne bíɔ Máwú yì náná amèsíamè záa mòkákã mànɔ̀ eŋúcí eye wóa nɛ. ⁶ Vɔ̀a ne bíɔɛ kù xɔ̀sè ɖìkèkè mànɔ̀ emè, ɖóa amèyì kènàɖì lè djìmèa lè sìgbè aƒúcòcòe yì àyà ƒònà yìnà gbɔ̀nà ène. ⁷ Amèyì kènàɖì lè djìmèa megbà súsúi be yìl lè núɖe xɔ̀gbe cò Aƒetɔ́ gbɔ́ o. ⁸ Amè màlìkè gàkù àmèyì be súsú trɔ́na kábákábá lè yíbe mɔ́wó kpátá djía bè nyí. ⁹ Nɔ̀ví yì le amèbɔ̀bɔ̀ɖànyí (wɔ̀amènɔ̀) be nɔ̀nɔ̀mè mèa ne kpɔ̀ djìdjɔ̀ co yíbe dòdóɖedji ɲúcí. ¹⁰ Vɔ̀a kèsìnɔ̀tɔ́ ne ƒò àdègbè be Máwú bɔ̀bɔ̀ yì ɖànyí, ɖóa enù vá lè yìyìgbe sìgbè gbèwó be seƒòƒò ène. ¹¹ Ne èwòe djè eye ŋùdɔ̀ vea, eyrɔ̀nà gbèawo , wóbe seƒòƒòwó hlená eye wóbe nyàkpɔ̀nyákpɔ́ búná. Nènemá ke ye kèsìnɔ̀tɔ́ cã lè yɔ̀yrɔ̀gbe lè yíbe mɔ́zɔ̀zɔ̃ mee má. ¹² Yàyrátɔ́ɛ nyì amèyì ne gbɔ̀nàdjìɖí lè dòdókpɔ́ mè, ɖóa ne wó dóekpɔ́ vɔ̀ mègbea, elè àgbè be fìɔkúkú yì be ŋúgbè Aƒetɔ́a dó ne àmèyìwó lɔ̃nɛa xɔ̀gbe. ¹³ Ne amèɖe djè tètèkpɔ́ mèa, megbà gblɔ̀ be : Mawue lè teŋùkpɔ́. Ɖóa núvɔ̃ mátɛŋú átè Mawu kpɔ́ o, eye Mawu ŋútɔ́ me tènà amèɖekpe kpɔ́ o. ¹⁴ Vɔ̀a amè ŋútɔ́ be núdjròamè wóe dɔ̃nɛ, kplɔ̀nɛ dà tètèkpɔ́ mè. ¹⁵ Emègbea ne núdròamè fɔ̀fúa edjìnà núvɔ̃ eye núvɔ̃ djìnà èkú. ¹⁶ Nɔ̀vínyè lɔ̃lɔ̃tɔ́wó, mì mègbà blè mìa ɖòkúiwó. ¹⁷ Amènúveve dè blibo gaku núnáná dè blibo ɖèsíaɖè cóná djìƒó váná cò kèkelìwo be Tɔ̀tɔ́a, àmèyì gbɔ́ vɔ̀vɔ̃lì alo tɔ̀trɔ́ ɖekpe melèo wà gbɔ́. ¹⁸ Edjì mí lè yìbe lɔ̃lɔ̃nù mè to nyàtèƒe be nyà mè be ne mía nyì yíbe núwɔ̀wɔ̀wo be gbãtɔ̀wó ¹⁹ Nɔ̀vínyè lɔ̃lɔ̃tɔ́wó mì nyaɛ. Amèsíamè ne bí lè núsèsè mè, ne wɔ̀ blèwù lè nùƒóƒòƒò mè, eye megbà bìdjì kábákábɔ́, ²⁰ ɖóa àmèyì bìdjìa me wɔ̀nà lè Mawu be djɔ̀djɔ̀ɛnyenye djío. ²¹ Yíŋúcía mìɖè ɖiƒòƒò ɖèsíaɖè gàkù nú bàɖà ɖèsíaɖè ɖá. Mì xɔ̀ Mawu be nyà yì wó dó lèmìa mèa kù djìfacù, eyíe látɛŋú ɖè mìa be lùʋɔ̃wó. ²² Mì cɔ̀ nyà dè dɔ̀wɔ̀wɔ̀ mè eye mì mègbà gbe esèsè tò mìa ɖòkúiwó bèblè mèo. ²³ Ɖóa ne amèɖe lè nyà sèŋú eye me lè edjíwɔ̀mɔ́ wà elè sìgbè amèyì kpɔ̀ yíbe ŋùkúmè lè aƒòƒúi mè ²⁴ eye emègbea eŋlɔ̀be leyìke bè lèa. ²⁵ Vɔ̀a amèyì lè ŋùkú lè vòvòkpɔ́kpɔ́ be se dèblìbóa ŋúcí nyuíɖe eye bè le emè ɖasía wóa yraɛ lè yíbe dɔ́wɔ̀wɔ̀wó mè. ²⁶ Ne amèɖe xɔ̀sè be yì nyì sùbɔ̀súbɔ́tɔ́ vɔ̀a me le yíbe aɖeò wà, elè yíbe djì blèŋú eye amèmá be sùbɔ̀súbɔ́a nyì nú gbɔ́ló. ²⁷ Lè mìa Tɔ̀tɔ ́Mawu gbɔ́a, sùbɔ̀súbɔ́ yì lè djàdjɛ eye ɖíƒòƒò ɖekpe me lè eŋúcío wà ye nyí be wóa kpe lè cɔ̃ɛvíwó gàkù ahòsìwó ŋúcí lè wóbe xàxáwó mè gàkù be wóa tèɖá lè xíxeamè be ɖíƒòƒòwó gbɔ́.