¹ Baa lolango, ane osaka so toba baleno bane baka Wangi, tokele wembu l'itina soe tokasose oko bobe bone bo bienge pe bok'elimo, toyale la biyali bika bakolami pe tolotake Wangi. ² Botopake ndie oko bebonda be nyo! Ntatokeleli nkia boto one omo bobe ye, ntatopitili boto ye, ntatokumoli yemba eka boto ye. ³ Ntitepeli ngako l'itina li nkonzie nyo ye ibango ntepelake ntondo mi mie nyo bol'oko etei le bebonda be so l'itina soe towe loselele soa nyo pe tobike loselele soa nyo. ⁴ Ntikela bobonda wuke ok'ole nyo, Nkatelia pe l'itina li nyo. Nsonyota la nyingha; nkia ok'etetei eka mbabali wuke-wuke ndia nyingha le nta wuke. ⁵ Kia ngengo eki so toyiake oko Makedonia, bienge biso ntailiki la ngengo le nzolia ye yaaka batonyokoloke ntundu binkumela, oko bosale etumba pe ok'etetei bomo. ⁶ Yaaka Wangi bone bobondo bakiseni atobonde la nyo loka tito. ⁷ Ntenge nko l'itina lika loya lo nde ye, yaaka ibango nde asobondwa l'itina li nyo; asotoyebia l'itina lika mposa le nyo pe l'itina lika bilelo bi nyo pe l'itina lika bonzenze bo nyo lama la mi. Nkonga ndiki la nyingha le sonda. ⁸ Ngako, nkia nsoyokia bebonda be nyo isei oko bokanda, ntiyoke isei ye. Nko nzokake isei ntondo ibango nyeneke mie bokand'oko bosoeboka mpota oko bebonda be nyo, nkia wano ngengo nio. ⁹ Akoboko nzoka nyingha. Ntiyoke nyingha l'itina mie nyo bosokwele mpota oko bebonda ye, yaaka ibango oki nyo bosokwele, bokalomole bebonda. Ibango bokweleke oko bebonda la waango boka Wangi ngako l'itina li so nt'oowungie nkia yemba ye. ¹⁰ Ibango, lokwele lo bobonda la waango boka Wangi ebesia bokalomoli bo bobonda bone bopaa boto lobiko pe ntengia itina li nzoke isei ye. Yaaka nkwele mpota oko bobonda l'itina lika bolongo ebesia iwa. ¹¹ Ibango, bosolenda nkusu lesoyenele oko bebonda be nyo oko mboka le nkwele oko bobonda la waango boka Wangi! Bokanokalonda, boyokake iyulu, bolotake, boliki la mposa, boliki la wango bo wembu, boyalolake bokolami. Ntundu binkumela bokalakiake nyo-yoe ntabongia ekonzo oni lobo'ene ye. ¹² Ngako, nkia nsoesonele bokanda, nteliki l'itina lika boto losokela bobe ye, laape l'itina lika boto losokita oko bobe ye, yaaka l'itina bonzenze bo nyo l'itina li so boyenele ok'ole nyo oko ntondo eka Wangi. ¹³ Kio kieko esaka so tokisena bebonda. ntenge nko l'itina li lobondwa loso ye, tolia bosango wuke nsonda-sonda l'itina lika nyingha eyoka Tito, ibango bobonda bo nde bosotulwa la totolo enkuma ibango la dweli loki nyo booyambake. ¹⁴ Laa mi nkanangolake la losaki oko beso baka Tito eliki lobo lo sosolo. ¹⁵ Ngako pe, lolango lo nde ok'ole nyo losonda bonene ngengo etangela nde dweli loki nyo booyambake pe nga oki nyo boototiake la bomo nko nsakatana. ¹⁶ Ndia nyingha lesonda wuke la ntekele nyo bobonda oko mbo binkumela kuu bokuma.