¹ Ngako nsakoyanga oko bobonda mi mie ntingoya ok'ole nyo nkanga ntisoetoisa ibaku mbal'enkina. ² Ibango laa mi meyokia nyo bebonda isei, ako boto nani longoyosono nzokie mi nyingha? Nko bo, bako banga mi nzokia bebonda isei! ³ Oko ele itina lisa mi mesonele la nzebie nyo dweli losa mi nkolimia ngako: ntilangake mie nzie ok'ole nyo la mbisa pe ntane isei ok'ole bato ba bongo la nzokie mi nyingha, ibango nzamba kwee pe mi mie nyingha lemi ele pe nyingha le nyoankumela. ⁴ Nko solo, nsoesonele nyo la mbabali oko bobonda la isei pe la biosoli wuke ntenge l'itina li nzokie nyo mbabali ye l'itina mie boyebe nyoe bolito bo lolango lomi ok'ole nyo bosonda nguya. ⁵ Laa boto omo asoyokia bato bankina mbabali, ntaanzokie mi ye, yaaka asoeyokia nyo nyoankuma, bimo mbala, ntenge nyoankuma ye, ntilange nkele lopeetia ye, yaaka wuke bo ba nyo. ⁶ Ikamba lingopawua ok'ole nde yima ok'ole esuku le bato lisonda dilo. ⁷ Ngako nkane, akoboko nyo bosambaka nde l'itina li nkembie nde nkamba isei lisonda nguya ntiisoyisena mbisa oko bokutwe. ⁸ Ngako, oko ngeng'eko, mebotitia mi mie bokolimiaka mbo l'itina li nde oko dweli lobongo ndakie nde nyo nyoe bolia lolango ok'ole nde. ⁹ Oko ele itina liesonele mi; l'ibango mie nsoekeka la nzeba-yeba laape bolokototie balako ba mi bankumela. ¹⁰ Boto onkine longa nyo bosamba bobe bo nde, mi pe ngoosamba. Ibango laa nsosamba boto lobo nkia lo dweli lonkeni, ngoosamba nko l'itina li nyo, oko ntondo eka Masiya, ¹¹ nkanga Satana ntasotosonda bonkanghala; ibango toyeba batangeli ba nde nta dilo. ¹² Ngengo eki mi nsoyia oko Toloa l'itina li nteye nsango dilo eka Yesu Masiya, nyeneke mie l'isei lika Nkolo, ngengo le ntia-tia esopawua. ¹³ Oko kio ngeng'eko, ndiki la lokeketeni ibango ntitana mbale leso Tito ye. Ngako mpaake beseso ok'ole bato ba Toloa pe nsake oko Makedonia. ¹⁴ Bitelia ok'ole Wangi lotokendia so kuu nko la mbae eswa oko lina lika Yesu, pe oko mboka le ekendelo leso, atotiisa la nkendie lina lika Yesu oko ndie binkumela nkonga nsolo le bolawu bo nsolo le dilo esolande oko ndie binkuma. ¹⁵ Ibango so tole nkonga nsolo le bolawu bo dilo bopa Yesu Masiya ok'ole Wangi l'itina lika bane babika, pe l'itina lika bawunghali. ¹⁶ Ok'ole bawunghali, nsolo le iwa l'itina lika iwa; l'itina lika bane bal'oko mboka le bokolo, ele nsolo le bokolo l'itina lika lobiko. Te boto nani loyosono nkele lobo lo dweli loko? ¹⁷ So ntatonge nga bane bankina ba kela bombongo la ilako lika Wangi; nkia nio ye, ibango ele Wangi lokototomake, totepela la bososolo oko beso ba nde, ibango tole batii baka Wangi bakotomwa la Masiya.