¹ Kikimweni, kusiku epi ni kima ki tubwila kikuma twekina a khidishitu. ² Kikuma nia nona moyi wa Pevi ya Yesu Khidishitu, yeni ya ngu katula mu wuhika wa masumu ma khedi ku ngu nehina lufwa. ³ Tshiku ya Moshe yakhediku kukuka kuhangika athu, kikuma kimuthu kieakhediku kulungisa tshiku. Nzambi wa ma lungishidi, watumini mwana endji wekhinini mudi muthu wa masumu, a muzengididi ndola ya lufwa mu kukatula masumu ma kimuthu. ⁴ Wahangidi kienekina kikuma esthi etu twenda kuleka kulungisa tshiku tulabi ndjila ya Pevi. ⁵ Athu enda kujinga mu kimuthu, enda kudihana mu mambu ma kimuthu, kashi athu enda kujinga mu kipevi, enda kudihana mu kipevi. ⁶ Kudihana ku kimuthu,kwenda kuneha lufwa, kashi Pevi ya Nzambi yenda kuneha moyi ni shipamu. ⁷ Kikuma nzala ya kimuthu yenda kuneha kimbeni ni Nzambi, ⁸ kikuma eni kendoku kulemvuka tshiku ya Nzambi. ⁹ Kinga lo enu, nwendoku kulamba nzala ya mwila, kasi ya Pevi,kikuma Pevi yengila kadi mu mitshima mienu. Kashi kudi ni muthu wakonda Pevi ya khidishitu,keshiku muthu wenji. ¹⁰ Kasi yivwa khidishitu wengila mu mitshima mienu,ata kioki mwila wa kafwa mu masumu,pevi yi nwa nona yidi ya moyi,enu nwekhina athu a bathu ku mesu ma Nzambi. ¹¹ Yivwa Pevi ya oyu wa tokimisini Yesu mu lufwa yidi ni enu,oyu wa tokimisini Yesu mu lufwa wa ka nuhwa moyi mu njila ya Pevi yi nudi nayi. ¹² Henihohu a pangi, tudihana oku ku nzala ya kimuthu. ¹³ Kikuma yivwa nwa dihana ku nzala ya kimuthu, nwa kafwa,kashi yivwa etshi mu ngolu jia Pevi nwenda nwa yala yisalu ya kimuthu, nwa kajinga. ¹⁴ Athu oshu enda kutwadisa kudi Pevi ya Nzambi,edi ana jia Nzambi. ¹⁵ Enu nu kaloku epi ni woma,kikuma nidu ni Pevi ya Nzambi. Pevi ya nu katula mu kihika nwekhina ana jia Nzambi. Pevi wenda ku nuhwa njila ya kutambika Nzambi etshi:" Aba,Tata !" ¹⁶ Pevi enjimweni wenda wata kithemu kudi etu etshi etu tudi ana jia Nzambi. ¹⁷ Ki tudi ana,twakanona ni etu kimvwama ekina Nzambi aswekila ana jienji. Twaka kinona njila yimoshi ni Khidishitu,yivwa twenda twa mona pashi mudi mweni,twakanona lukumu njila yimoshi ni mweni. ¹⁸ Ami nienda nia mona etshi pashi ji tudi kumonanga lelu tu ku ji tesa oku ni lukumu lwqa tuswekila Nzambi. ¹⁹ Kikuma Yima yoshu ya hanga Nzambi yendaya makinina kilumbu kia lombulula Nzambi lukumu lwenji kudi ana jienji. ²⁰ Kikuma yima yoshu yidi ya zangana,ata kioki ya di zangininiku oyimweni,yidi athu ejidi ku yi zanga. Kilaji kidi kaka etshi, ²¹ mu yilumbu ya tsuka, Nzambi wa ka katula yima yoshu mu kihika kienda ku benda lufwa, mu kunona lukumu lwa ana jia Nzambi. ²² Kikuma, etu twejika etshi tii lelu edi yima yoshu ya hanga Nzambi yenda ya dila ni kumona pashi,mudi mukhetu wudi kuzolanga kuteta. ²³ Kashi keshiku kasu kienekina, kashi etu epi twenda twa dila mu mitshima mietu, ata twa nona kadi Pevi ya Nzambi mudi makabu ma thethi, ni kiki twenda twa makinina,kilumbu kia a ka tukala mu wuhika. ²⁴ Kikuma Etu twa huluka kadi yanjika kioki ki twenda kushia mutshima etshi wa ka tu hulusa. Yivwa muthu wathethikila kadi kunona kima, ka kushia oku epi mutshima mu kima kia nona kadi. ²⁵ Kashi yivwa twenda twashia mutshima mu kima ki twa konda kadi kunona, tu kukasa mutshima tii hohu twa ka kinona. ²⁶ Pila yimoshi,Pevi yenda ku tu sadisa,kikuma tushiku ni ngolu, twijiku kiehi kamu twa lunga kusambila, kashi Pevi enjimweni wenda kusamba Nzambi a palashi yetetu,mu mambu ma twenda kukonda kwakula pimbu pimbu. ²⁷ Mweni wenda kwijika medi mu katshi ka mutshima mia athu,wejika mabanza ma Pevi,kikuma Pevi wenda kusamba Nzambi kikuma kia athu jienji, kidi luzolu lwa Nzambi. ²⁸ Twejika etshi ma katshi ka mambu moshu,Nzambi wenda kuhanga kikumakia mamboti ma athu oshu enda ku mu zola, awana enda kutambika enjimweni mudi kia makanini ku kishina. ²⁹ Kikuma Athu awana ejikidi Nzambi thama,wa wasola afwani Mwana endji,mweni akhadi tsomi wudi alengi lawu. ³⁰ Awana Nzambi asodidi,eni yowu atambikidi,kia wa tambika, wa wekhinisa athu a pimbu, athu ekhina a pimbu anona lukumu wenji. ³¹ He ekhi tu kwakula mu mambu ama moshu? Yivwa Nzambi wa tuzola nani wa lunga ku tu menga? ³² Mweni kalekidiku mu ku tuthwa mwana mumoshi,kashi wa mu hanini kikuma kia etu oshu,kiehi a kuleka ku tuhwa yima yoshu mu njila yenji. ³³ Nani wa lunga kufunda athu asola Nzambi? Nzambi wa wekhinisa athu a bathu. ³⁴ Nani wa lungaku wa zengila ndola? Ni muthu lo. Kikuma Yesu Khidishitu wafidi, wa tokama mu lufwa,wudi washikama ku khoku dia kitata dia Nzambi wenda ku mu lembila kikuma kietetu. ³⁵ Nani wu ku kapisa ni luzola lwa Nzambi?Yikhadi pashi to khenda,kuniokuka to nzala,kukonda kwa yima, kingosa to lufwa. ³⁶ Mudi ki medi ma kusonika etshi:"Kikuma kia yeyi,etu enda kuzola ku tu jiya yilumbu yoshu. Enda ku tu nona mudi mamemi menda kusenda mu ku majiya". ³⁷ Mu ama mambu moshu etu tudi twa nunga kadi, mu ngolu jia Nzambi oyu wenda ku tu zola. ³⁸ Kikuma nia kumbula etshi yikhadi lufwa, yikhadi moyi,yikhadi a Wanjio, yikhadi luyalu,to mambu ma lelu to makeza kumesu, yikhadi mambu mabola, ³⁹ yikhadi ku wulu to henaha hashi, yikhadi koshu kima kia hanga Nzambi,ni kimoshi lo kia lunga ku tu kapisa ni luzola lwa Nzambi,olu Lwejidi ku tuleza Fumu Yesu.