¹ Ekhi twa lunga kwakula? Etshi twenda k uhanga masumu kikuma nkenda jia nzambi ji vudi? ² Loni! Mu mambu matala masumu, twekhina mudi a mvumbi, twa lungidiku epi kujinga mu masumu. ³ Nushiku kwijikanga etshi ki twa botimini mu jina dia Yesu, twafidi ndjila yimoshi ni mweni. ⁴ Tangwa di twa botimini, yakhedi mudi etshi twa fidi ni mweni ndjila yimoshi. Mahangimini kienekina, kikuma Tata kia mu tokimishini mu lufwa mu ngolu jiendji, pila yeniyoyi etu he tu feti kujinga lujingu lwa pah. ⁵ Kikuma yivwa twa kumbula kufwa ni Yesu, twijikenu etshi twa ka tokama ndjila yimoshi ni mweni. ⁶ Twijikenu etshi, kimuthu ki twakhedi naki kia fwa kadi a hulu dia kulundji ni Yesu, kikuma mwila wetu wa masumu wabeba woshu, tushiku epi ahika a masumu. ⁷ kikuma yivwa muthu wafwa, kihika kia masumu epi kiahwa. ⁸ Yivwa twa fidi ni Yesu, tu kwikileni etshi twa kakhala ni moyi wa mvula ni mvula, ni mweni ndjila yimoshi. ⁹ Twijikenu etshi khidishitu wa tokimini mu lufwa, ka kafwa oku epi,lufwa lwa ka mwila oku epi kima. ¹⁰ Kikuma tangwa dia fidi Yesu, lufwa lwoshu lushiku ni ngolu ata fioti. Mweni wudi ni moyi kumesu ma nzambi. ¹¹ Pila yimoshi ni enu epi, dinonenu mudi athu afwa mu masumu, nudi ni moyi kumesu ma nzambi mu djila ya Yesu. ¹² Kienikioki, nuhwaku masumu ndjila meji ku nu yala, nu dihana oku epi ku nzala yenu ya kimuthu. ¹³ Nu khala oku epi ahika jia masumu, nu hangila oku epi mwila wenu mu ndjila ya kuhanga kubola. Kashi dihanenu kudi nzambi mudi athu a huluka mu lufwa, mu ku lungisa mambu ma bathu. ¹⁴ Masumu ma nu yala oku epi,kikuma nushiku epi mu tangwa dia jisthiku,kashi nwenda nwa jinga mu tangwa dia khenda jia nzambi. ¹⁵ Mosu ama mazola kwakula ekhi? Tu feti kaka kujinganga mu masumu kikuma tushiku mu tangwa dia jitshiku? Loni. ¹⁶ Ejikenu etshi yivwa nwa dihana kudi muthu wekhina muhika wendji. Wudihana ku masumu wekhina muhika wa masumu, tsuka yeyi lufwa. Yivwa nwekhina ahika jia nzambi, wu ku nwikhinisa athu a bathu. ¹⁷ Kashi wangenu nzambi matondu. kikuma enu nwa khedi athu a bila mu masumu, kashi he nwekhina kuhangila mu mutshima wumoshi malongi ma nwa nonini. ¹⁸ Nwishiku epi ahika a masumu,nwekhina ahika a mambu ma bathu. ¹⁹ Niazola ku nu leza mambu ma nwenda kumona kudi athu. Nu dihana ku mambu ku mambu ma soni ni ma masumu, nu kwikhina a mbeni jia nzambi. Kienikioki he ekhinenu ahika a mambu ma bathu,kikuma nwikhini athu a bathu. ²⁰ Ki nwakhedi ahika jia masumu, nwakhedi kuleka mu kuhanga mambu ma bathu. ²¹ Nwakhedi kuhanga mambu makhedi ku nuhwa soni kibeni. Ekhi nwa nonini, Lufwa. ²² Kashi he nishiku epi ahika jia masumu,nwekhina ahika jia nzambi,nwa nona mambu mawaha, nwekhina athu a bathu. Tshuka yoyi nudi ni moyi wa mvula ni mvula. ²³ Kikuma etshi lufutu lwa masumu ludi lufwa,kashi makabu ma nzambi medi moyi wa mvula ni mvula mu ndjila ya Yesu Khidishitu fumu etu.