¹ Ami nienda nia nuleza etshi,a pangi, mu luzolu lwendji nzambi wa tuvwila khenda , mu moyi wenu woshu dihanenu mudi makabu kudi mweni makubula ku muhwa kieshi. Yi kukhala pila ya ku muhwa lukumu. ² Nu laba oku yifu ya athu hashi; kashi leka nzambi a nuhu mayela ma katataka ma nu sadisi mu kusoba mabanza menu nwikhini athu a katataka. Nu kwijika mambu menda kuzola nzambi, medi ma pimbu,menda ku muhwa kiese ni medi malunga. ³ Ami nia nu leza epi etshi ,mu khenda jia Nzambi,ami niekhina thumwa, lekenu kudishikisa, kashi leka muthu ni muthu ahengi lukumu lwa lunga ludi kukatukanga kudi Nzambi mu lukwikilu lwendji. ⁴ Kikuma ,mwila wetu ki wudi ni yitshini lawu,koshu kitshini kidi ni kisalu kiohi, etu epi pila yimoshi tudi mudi mwila wumoshi , ⁵ koshu muthu wudi kitshini kia mwila wenowuna. ⁶ Etu he twanona makabu lawu mu khenda jia nzambi ma twa lunga ku mu hangila. ⁷ Yivwa wudi ni makabu ma ku kulezanga pevi,hangila kaka menamana mu ndjila ya lukwikilu lweyi. ⁸ Leka muthu ni muthu a dihani mu kisalu kia nona: kikhadi ya kisielu,kulonga munzia nzambi,to kuhwa athu kikesa. Oyu wenda kukapa yima kudi atshukami, a kihangingi ni mutshima wumoshi; oyu wudi kutwadisanga akowu, akhadi ni kikesa, oyu wudi kusadisanga akhashi afeti kukhala sangusangu. ⁹ Leka luzolu lwenu lukhadi lwa kiedika. Lekenu mambu mabola; hangangenu ma pimbu. ¹⁰ Zolanganangenu mudi a pangi:dishiangenu lujitu, nu nwaninga oku kima lo. ¹¹ Khalenu ni kikesa, nu lembwa oku, nonenu ngolu jia kipevi mu kuhangila Fumu. ¹² Nu feti kushianga mutshima kudi Nzambi ni ku mu sambilanga, kienekina nu ku bula kukhala ni kieshi tangwa dioshu; ¹³ kasengenu mutshima mu tangwa dia pashi. Kapengeni yima yenu ni akhidishitu awana edi mu pashi, yambangenu anzenza. ¹⁴ Sambilangenu Nzambi kikuma kia ambeni jienu; wa sambilangenu kashi enu nu wa shinga oku. ¹⁵ Khalenu ni sanguka kudi athu ni kieshi. ¹⁶ Dilangenu ni oshu edi kudilanga. Evwanganangenu pimbu ni akwenu. Nukhala oku ni lulendu jingangenu ni athu oshu. Nu dizangulanga oku. ¹⁷ Moshu wa kuhanga kubola wu mu vutudila oku. Hangangenu mambu ma pimbu kumesu ma athu oshu. ¹⁸ Hangangenu moshu ma nwa lunga kuhanga, zingangenu pimbu ni athu oshu. ¹⁹ Kuvutula kubola lo kudi muthu wa kuhanga kubola, kashi leka khabu jia nzambi ji hangi. ²⁰ Kikuma masonama eki:Fumu wakula etshi:"Ami nia ka wa vutudila kubola kwowu,ami nia kahwawa ndola". Kashi yivwa mbeni wudi ni nzala, muhu yima ya kudia; yivwa wudi ni pwisa muhu, muhu meya makunwa. Kikuma yivwa wa hanga kienekina wenda wa mushila makala ma thuya a mutwa wendji. ²¹ Mambu mabola ma nu yala oku,kashi hanga etshi mambu ma pimbu ma bedishi mambu mabola.