¹ Kiela Yesu wa manisa mosu makhedi kwakula kudi athu akhedi ku mwivwa wengididi ku Kapernahumi. ² Tala Fumu wa asuta mumoshi wakhedi muhika mumoshi azolanga hengi wakhedi wayela ni kuzola kufwa. ³ Kiela Fumu wa asuta wevwa tsangu jia Yesu watumini a mambuta a Ayuda kudi mweni mu ku mu bondila eji kusadisa muthu wendji wa kisalu. ⁴ Kia tudidi kudi Yesu a mu bondididi akula etshi Wa lunga ku mu hangila kienekina ⁵ kikuma wazola thothu yetu mweni wa tu tungididi nzu ya yisambu. ⁶ Kienikioki Yesu wayanga ndjila yendji ni eni. Kiela atula penapena ni nzu Fumu wa asuta watuma a ndoyi jiendji mu ku mu leza etshi Fumu wudihwa oku pashi kikuma ami nishiku nia lunga mu ku kutambika ku nzu yemi. ⁷ Kikuma kioki nia ditadidi ami mweni na mona etshi nia lungidiku kwiza kudi ayi. ⁸ Kashi akula ndaka yimoshi muthu wemi wa kisalu wu kukola. Kikuma ami epi nidi ni kiyeka kudi asuta. Niakula kudi mumsohi nda waya kudi mwekha yiza wu kwiza kudi muthu wemi wa kisalu hanga eki wu kuhanga. ⁹ Yesu kievwa ndaka jienejina wa yitukidi he walumuka kudi hundji dia mu labanga wakula etshi nia nu leza ata ku yiseledi nia mona oku kadi muthu wudi ni lukwikila olu. ¹⁰ Kiedidi awana atumini avutuka kunzu hendi kuwana muthu wa kisalu wa kola. ¹¹ Kumanima ma matangwa Yesu wendidi ku vidi dimoshi jina diodi Nayini Alonguki jiendji ni hundji dia athu akhedi kwenda nendji. ¹² Kia tudidi pena pena ni kishu kia vidi wa mona azangula mvumbi mwana wa yala mumoshi kaka mama endji wakhedi mufidi ni hundji dia athu lawu akhedi kwenda nawu. ¹³ Kia mu mweni Fumu wevidi khenda jingi kikuma kia mweni wa mu leza etshi Wu dila oku. ¹⁴ He wa pusana wa kwata mukunzu wakhedi ni mvumbi awana akhedi kusenda amakana mweni wakula etshi Ngunza yala nienda nia ku leza tokami. ¹⁵ Mvumbi wa shikimini wa yandjika kwakula. Yesu wa mu hana kudi mama endji. ¹⁶ Athu oshu evidi woma a yandjikidi kuhwa Nzambi lukumu ni kwakula etshi Mbikudi mujima wa hudikila mu katshi ketu Nzambi weza kutala athu jendji. ¹⁷ Tsangu eyi ya Yesu ya mwanginini mu Zude dioshu ni mu kizunga kioshu. ¹⁸ Alonguki a Yohani a mu tedidi mambu menama moshu. ¹⁹ He Yowani watambidi mbadi wa watuma endi kwihwila Fumu etshi Ayi yuyu weza to tu feti ku makinina mwekha. ²⁰ Kia tudidi kudi Yesu athu mwena awana akula etshi Yowani Mbotika wa tu tuma kudi ayi twihudi yidi ayi oyu yuyu weza to tu feti makinina mwekha. ²¹ Kaka mu tangwa mwenedina Yesu wa wukidi athu lawu akhashi akwa pashi jia pila ni pila ena pevi jia bola ni yifwa mesu lawu a mweni. ²² Wa wa vutudidi mvutu wa waleza etshi Ki nu ku vutuka nu tedi Yowani ma nwa mona ni ma nwevwa. Yifwa mesu amona Yikata ya zanguluka ena bwashi a kola yihulu yevwa a mvumbi a tokama a tsukami evwa tsangu ya mboti. ²³ Kieshi kudi oyu wa leka kushia pika kikuma kia yisalu ya memi ²⁴ Tangwa dia vutukidi tupungu twa Yowani Yesu wa yandjika kwakudila Yowani kudi hundji ekhi nwa khedi kwenda kutala mu tseki Mwangu wakhedi kunikana ku fundji e.He ekhi nwendi kutala.Yala mu moshi wavwatidi miledi ya thalu e. ²⁵ Kashi awa enda kuvwata miledi ya ma feti ni kujinga lujingu lwa wukheti edha kijingila mu manzu ma Afumu. ²⁶ He nani kamu nwendi kutala e Mbikudi e. He nienda niakula kuhita mbikudi. ²⁷ Tala oyu mweni yuyu wa sonikinini etshi tala nia tumisa kapungu kemi ku twala mu ku kuhangikila ndjila. ²⁸ Nia nu leza etshi mu katshi ka awa oshu atetuka kudi mukhetu. Kusiku ni muthu wahita Yowani. Ku wulu dia Nzambi muthu wa tsuka wa mu hita mweni. ²⁹ Kiela athu oshu ni Tulaki a mwivwa akudidi etshi Nzambi wudi masonga akumbudidi anoni mbotika ya Yowani. ³⁰ Kashi Afadishi ni a mbaku a jitsiku jia Ayuda abeyidi ma wa hangikididi Nzambi kikuma aleki kubotama ku Yowani. ³¹ Nikhi nia lunga kutesa athu a tangwa mwenedi niku wa fwanikisa nikhi. ³² Afwanangana ni ana enda kusema mu balabala ni kushikama hashi ni kuleza a doyi jiowu etshi twa bula yishingu enu kukina lo twa yimbanga mimbu mia malunga ata enu ni kudila lo. ³³ Kashi Yowani Mbotika wezidi ka dianga mapa ka nwangangoku vinu nwa muleza etshi wudi ni pevi ya bola. ³⁴ Mwana muthu weza ni kudia ni kunwa nwenda nwa muleza etshi Tala wudi mudi muthu wakata kudia ni kunwa futa dia tulaki ni athu a bola. ³⁵ Kashi Mayela ma Nzambi menda me jiangana kudi ana jienji. ³⁶ Tala mu fadishi mumoshi wa mu tambikidi mu kudia ti mweni. He Yesu wengila munzu a mu Fadishi wa shikama wa yandjika kudia ³⁷ Mukhetu mumoshi wa ha vidi wakhedi mukwa masumu wa wa wudikididi kievidi eshi Yesu wakhedi mu nzu ya mu Fadishi. Wa nehini mulangi wa madiashi ma albatre. ³⁸ Wejidi wa makana ku mutanda wendji penapena ni miendu mia Yesu wa yandjikidi kwovwa miendu miendji ni masanga ni yi kukumuna ni suki jiendji ni ku yi fuwa ni ku yi kwita madiashi. ³⁹ Kiela Mufadishi wa tambikidi Yesu wa mona kienekina wa diakudila etshi Yivwa kamu muthu oyu wudi mbikudi wela kwijiya nani edi mukhetu mwenoyu wudi ku mu kwatanga wudi mukhetu wa bola. ⁴⁰ Yesu wa nona ndaka wa mu leza etshi Simon nidi kima ya ku kuleza. Mweni etshi Longi akula. ⁴¹ Yesu wakula etshi muthu mumoshi wakhedi ni athu mbadi a mu khedi ni fhuka. ⁴² Mumoshi khama yimoshi mukowu makumi matanu. Kia lekidi kukuka kufuta fhuka yowu wa wa vidishididi owu mbadi. He Mu katshi kowu mbadi nani wu ku mu zola hengi. ⁴³ Simoni wa mu vutudidi wakula etshi nia banza etshi oyuna wakhedi ni fhuka ya lawu. Yesu wa mulezidi etshi wa zenga mboti. ⁴⁴ Yesu walumukini kudi mukhetu wa leza Simon etshi Wa mona mukhetu oyu niengilanga mu nzu yeyi wovidingiku miendu miemi kashi mweni wa yovwa ni masanga mendji wa kukhumuna ni suki jienji. ⁴⁵ Ayi wa ngu fuwidiku kashi mweni yandjika kioki kiengilanga ka hwididiku mu ku fuwa miendu miemi. ⁴⁶ Ayi wa washidiku mutwa wemi maji Kashi mweni wa kwitidi madiashi mu miendu miemi. ⁴⁷ Kienikioki nia ku leza etshi yivwa kubola kwendji kwa lawu a mu vidishila kikuma mweni wa lombululanga luzolu lwa hitangana. Kashi oyu wenda kuvidishila ka ndambu wenda kuzola ka ndambu. ⁴⁸ Kumanima wa mu leza etshi Kubola kwehi nia kuvidishila naku. ⁴⁹ Awana akhedi kudia nawu akwangana etshi Nani edi muthu oyu mu kuvidisha Masumu. ⁵⁰ Kashi Yesu walejidi mukhetu etshi Lukwikilu lwehi lwa ku hulusa nda ni ngemba.