¹ Tangwa dia lungishidi Tiber Cesar mvula kumi ni yitanu mu kifumu eh Ponce Pilatu wakhedi fumu ku Yuda Herodi wa yalanga ku Galilea Philipo pangi enji wa yalanga ku thotu ya Ituri ni Traconite Lysaniasi wa yalanga ku Abilene. ² Mu tangwa dia mbuta nganga Nzambi Anne ni Cayofa ndaka ya Nzambi ya wudikidi kudi Yowani mwana wa zakadiya ku thotu ya wuma. ³ Wa kibanga mu kijunga kia thotu mu khulu ya meya ma Yoludani ni ku konganga mbotika ya kubalula mitshima ni ndolula ya masumu. ⁴ Mudi kia sonika mu mukanda wa mbikudi Yesaya : ndaka ya muthu uku nganianga ku mavu ma wuma hangikenu njila ya fumu unununenu njila yenji. ⁵ Miwanda yosu ya ka khala ya zala mindonda yosu ibibi ni yi jima ya kabwa ji njila jia kondamana jikhadi jia tanduluka jinjila jia mayala jionunuki. ⁶ Eh mwila wosu waka mona kuhuluka kwa Nzambi. ⁷ Eh Yowani wakudidi kudi athu awa awudikidi mu kunona mbotika kudi mweni : Enu ana jia niokha nani wanu leza mu kutshina khabu ji kwizanga. ⁸ Butenu eh jimbuma jia pimbu jia kubalula mutshima nwendoku ku diakudila ni tudi ni tata Abalayami kikuma nia nuleza etshiNzambi wa lunga mu kuzangulusa mayala ama mekhini ana jia Abalayami. ⁹ Kipangu kidi kadi kia hangama mu kukwata misodi ya mitondu eh kosu mutondu wuku leka kubuta mbuma jia pimbu aku wuvuka awumba ku thuya. ¹⁰ Mu kulaba athu ehudidi Yowani : Ekhi twa lunga kuhanga. ¹¹ Wa wa vutudila ni kwakula : wosu wudi ni tuzaku twadi ahani kamoshi kudi oyu wa ka konda oyu wudi ni madia a hangi pila yimoshi. ¹² Afutishi apaku ejidi epi mu kunona mbotika amu leza : longi ekhi twa lunga kuhanga. ¹³ Wa wa vutudila : nu nonoku epi mbongu jekha awulu dia mbongu jia nulombidi mu kunona. ¹⁴ Asuta ekha amwihudidi epi : etu eh ekhi twa lunga kuhanga wa waleza : nu hangiloku kingolo ngolu nu monisoku muthu pashi nonenu kieshi mu lufutu lwenu. ¹⁵ Tangwa dia sukidi athu mitshima mu ku makhininanga kwiza kwa Khidishitu kosu muthu wa dihulanga ku mutshima wenji etshi Yowani wa lunga kukhala Khidishitu. ¹⁶ Yowani wa vutudidi kudi owosu wakula : Ami nia nu botika mu meya kashi muthu mumoshi wu kwisa wudi ngolu kuhita ami nia lungidiku epi muku mu kangula mishinga ya aapatu waka nu botika mu pevi ya longu ni mu thuya. ¹⁷ Wudi ni muyungulu ha khoku dienji kikuma kia kukapula yiswaswa yadibundaa ni kheni jia ka swekama ku ngunzu kashi yiswaswa waka yoshia ku thuya twa konda nga kujima. ¹⁸ Ni malongi mekha ma pila ni pila Yowani wa lombululanga tsangu jia mboti kudi athu. ¹⁹ Tangwa dia yanini fumu Herode kikuma wa kwedidi Herodiasi mukhetu wa pangi enji ni kikuma kia mambu lawu ma bola ma hanganga. ²⁰ Wa yikidi eyi mu kubola kwenji : wengishidi Yowani mu boloku. ²¹ Kikitudi kwa tudidi etshi tangwa dia botimini athu Yesu epi wa botimini tangwa dia tombanga wulu dia kangukidi. ²² Pevi ya longu yanona mwila wa bembi weza ku kulumuka kudi mweni. Ndaka yimoshi yeza ku wulu : wudi mwana wa memi wu nia zola kudi ayi nienda kunona kieshi. ²³ Tangwa dia yanjikidi Yesu kisalu kienji wakhedi ni jimvula makumi ni jisatu. Wakhedi mwana wa Yosefi mwana wa Heli. ²⁴ Mwana wa Matthati mwana wa Levi mwana wa Melki mwana wa Yannayi mwana wa Yosefi. ²⁵ Mwana wa Mattatjiasi mwana wa Amosi mwana wa Nahoumi mwana wa Hesli mwana wa Naggayi. ²⁶ Mwana wa Maathi mwana wa Yoseki mwana wa Semeyini mwana wa Yoda. ²⁷ Mwana wa Yoanani mwana wa Rhesa mwana wa Zorobabeli mwana wa Salathiel mwana wa Neri. ²⁸ Mwana wa Melki mwana wa Addi mwana wa Kosami mwana wa Elmadami mwana wa Eri. ²⁹ Mwana wa Yesu mwana wa Eliezeri mwana wa Yorimi mwana wa Mattathi mwana wa Levi. ³⁰ Mwana wa Simeoni mwana wa Yuda mwana wa Yosefi mwana wa Yonami mwana wa Eliakimi. ³¹ Mwana Meleya mwana wa menna Matata mwana wa Nathami mwana wa Davidi. ³² Mwana wa Jese mwana wa Yobedi mwana wa Bowazi mwana wa Sala mwana wa Naasoni. ³³ Mwana wa Aminadabi mwana wa Admini mwana wa Arni mwana wa Hezroni mwana wa Perezi mwana wa Yuda. ³⁴ Mwana wa Yakobi mwana wa Isaki mwana wa Abalayami mwana wa Terahi mwana wa Nahori. ³⁵ Mwana wa Sengi mwana wa Reu mwana wa Pelegi mwana wa Eberi mwana wa Shelahi. ³⁶ Mwana wa Kanani mwana wa Arphaxedi mwana wa Semi mwana wa Nowa mwana wa Lameki. ³⁷ Mwana wa Mathusalemi mwana wa Enohi mwana wa Yarethi mwana wa Mahaleleki mwana wa Kainani. ³⁸ Mwana wa Enosi mwana wa Sethi mwana wa Adamu mwana wa Nzambi.