¹ Yesu wengididi waya kuhitila ku yediko. Kwakhedi ni muthu mumoshi jina diendji Zakayi. ² Wakhedi fumu dia tulaki twakhedi kufutisa kitadi kia leta wakhedi mvwama. ³ Wahengidi kumona Kiehi Yesu akhedi kashi pila yakhediku kikuma kia hundji wakhedi muswipi. ⁴ Wendidi fishi kumesu mathu wanina mu mutondu wa Sikomore mu ku mumona kikuma Yesu afeti kuhitila kwenokuna. ⁵ Kiedidi Yesu watula homa mwenahana watadidi ku wulu wa mu leza etshi Zakayi tuluka tswalu nia mona etshi lelu ni kukhala kunzu yeyi. ⁶ Mweni wa tulukidi tswalu mu ku wanangana nendji. ⁷ Kia mweni kienekina owu oshu anienganana ni kwakula etshi waya kumenika muthu wa bola. ⁸ Zakayi wa makinini kumesu ma Yesu wakula etshi Tala Fumu nienda niahwa a tsukami kiatshi kia yima jemi yivwa nia hangidi koshu muthu oyuna kubola nia ka mu vutudila mbala jiwana. ⁹ Yesu wa mu lejidi etshi kuhuluka kwengila lelu munzieyi kikuma oyu epi wudi mwana wa Abalahami. ¹⁰ Kikuma Mwana wa muthu wezidi kuhenga ni kuhulusa oshu edi a bila. ¹¹ Kiakhedi kuhwidikila yoshu eyina mweni wa watela lupandji kikuma akhedi belabela ni Yeluselemi eni akhedi kubanza etshi Kifumu kia Nzambi kienda kia dimwekinisa. ¹² Wakudidi epi etshi Muthu mumoshi wa lukumu wendidi ku thothu ya kwalaha mu kwenda kunona kifumu kiendji kumanima a vutuki. ¹³ Watambikidi kumi dia athu jiendji a kisalu wa wahwedi Fwalanga kumi wa waleza etshi Jihangilenu tii hohu ha niakejila. ¹⁴ Kashi a pangi jiendji a mu mengini a mu tumishina kiatshi kia angendji mu ku muleza etshi Etu twadidiki etshi muthu oyu a tu yadi. ¹⁵ Yejidi ku mwekana mu ku vutuka kwendji kumanima ma kunona lukhanu wehudidi aathu jiendji a kisalu ahwedi fwalanga mu kwijika kiehi muthu ni muthu a hangidi mu kunona ndandu mu kisalu kiendji. ¹⁶ Muthu wathethi wejidi wa mu leza etshi Fumu lufwalanga lwa buta fwalanga kumi. ¹⁷ Muthu wa lukumu wa mu leza etshi Songi songi kisadi kia pimbu. Kikuma wudi kisadi kia pimbu mu tu yima yi bibi wu ku nona lukhanu lwa ma vidi kumi. ¹⁸ Muthu wa kiadi wejidi wakula etshi Fumu fwalanga jiehi jia buta ji tanu ha wulu. ¹⁹ Muthu wa lukumu wa mu leza etshi nona lukhanu lwa ma vidi ma tanu. ²⁰ Mwekha wejidi ni kwakula etshi Fumu tala lufwalanga lweyi lu nia khedi nia sweka mu waba ²¹ Kikuma nia khedi ni woma ayi wahitangana mathatha Wenda kunona yi wa konda kumwena pashi wenda epi kusanda yi wa leka kukuna. ²² Muthu wa lukumu wa mu leza etshi Nia ku kwata mu ndaka yeyi wudi muthu wa bola. Ayi wejikidi etshi ami nidi muthu wa mathatha nienda kunona yi nia leka kumwena pashi ni kusanda yi nia leka kukuna ²³ kikuma kiakhi wa lekidi kuswekila fwalanga jiemi mu bank mu pila etshi ki nia keza kuvutuka ni jinoni jia buta jiekha a wulu. ²⁴ Kumanima mvwama waleza awana akhedi amakana hohu etshi mu tambulenu lumeya hwenu oyu wudi ni fwalanga kumi. ²⁵ Eni a mu leza etshi mweni wudi kadi naji kumi dia fwalanga. ²⁶ Nia nuleza etshi akahwa oyu wudi kadi nayi kashi kudi oyu wudi mokhu a ka mutokununa eyi yedi nayi. ²⁷ Kikimweni he nehenu a mbeni jiemi awana enda kuleka esthi ami ni wayala oku wajiyenu mu mesu memi. ²⁸ Kiela wakula mambu mena mana waya ku yeluselemi. ²⁹ Kiela wa kokuluka ku Betefasi ni Betani mu miwanda mia tambikanga olive watumini alongiki jiendji mbadi ³⁰ wa waleza etshi dangenu ha dimbu didi bela bela. Tangwa di nu kwingila nu kuwana kana ka punda kakonda kadi kunina muthu. Ka kasululenu nu ndehini naku. ³¹ Yivwa muthu wa nuhula kikuma kiakhi nudi kukasudilanga akulenu etshi Fumu wudi nendji fhunu. ³² Angedji endidi amweni kana ka punda kioki kia walejidi Yesu. ³³ Kiela akasulula mukwa kiendji wa waleza etshi kikuma kiakhi nudi kukasululanga kana ka punda ³⁴ Eni a vutudidi etshi Fumu wudi nendji fhunu. ³⁵ Eni a mu nehini kudi Yesu azala miledi ha mutanda wa punda a shikika Yesu hohu. ³⁶ Tangwa diakhedi kwenda eni awindidi muledi miowu mu mukhidi. ³⁷ Kiedidi atula a belabela dia muwanda wa ma olives hundji diathu dia alongiki dia yandjika kusehila ni kuwha Nzambi lukumu mu ndaka ya ngolu kikuma kia mambu majima mamweni ³⁸ ni kwakula etshi Lukumu kudi lukhadi kudi oyu wu kwizanga mu jina dia Fumu Shipidi ni lukumu lukhadi mu katshi ka wulu. ³⁹ Kiatshi kia afadishi mu katshi ka wundji a muleza etshi Longi lekisa alandi jiehi. Yesu wa wa vutudila etshi ⁴⁰ Nia nuleza etshi yivwa eni adibata mayala makushia mayema. ⁴¹ Kiela Yesu watula ha belabela ni dimbu wadididi kikuma kia dimbu ⁴² wakula etshi Nga wijika lelu shipidi dia kwijila e kashi kikimweni medi ma kusweka ku mesu meyi. ⁴³ Kikuma etshi matshiku makeza kumesu meyi a mbeni jiehi a ka kwingidila a kuyala kuku ni kuku. ⁴⁴ Eni aka kumwanga ni ayi ni ana jiehi. Ni kima kakakushishila oku kikuma ayi wejikidiku tangwa dieza ku kuhulusa Nzambi. ⁴⁵ Yesu wengididi mu nzu a Nzambi wa yiandjika kukaya athu akhedi kusumbisa ⁴⁶ ni kuwaleza eshi yidi ya kusonika etshi Nzu yamemi ya kakhala nzu ya yisambu kashi enu nwa yikhinisa ka kisala keeji. ⁴⁷ He Yesu wa yandjika kulonga mu nzu a Nzambi. A fumu jia mambuta nganga ni amalongi ma jitshiku ni a fumu jia makanda ayandjika kuhenga pila ya ku mujiya ⁴⁸ kashi eni kakhediku kumona pila ya kuhanga kikuma athu a mwivanga kuhwaha.