¹ Kikimweni afutishi a kadiata mavu ni athu ekha abola ezanga kudi Yesu mu ku mwivwa. ² Afadishi ni malongi ma tshiku akhedi kunienganana owu mweni ni kwakula etshi Muthu oyu wenda wa solula ni athu a bola ni kudia nawu. ³ Yesu wa wa tedidi kingana eki Nani mu katshi kenenu ⁴ yivwa wudi ni mamemi khama wa bidisa dimoshi mu katshi ka mikoku mweneyina ka kusala oku kushisa makumi uvwa ni uvwa waya ni kuhenga owuna wa bididi tii hohu ha ku wumona. ⁵ He tangwa diamba ku wumona wa wushia ha panga ni kieshi kioshu. ⁶ Tangwa diamba kutula ku nzu wa wongika a pangi jiendji ni athu edi mu bela bela wa wa leza etshi Yizenu tu kinenu kieshi nidi naki kikuma nia mweni dimemi dia bididi. ⁷ He nienda nia nu leza etshi kieshi kingi kia ka khala ku wulu kikuma kia muthu mumoshi wa bola mu katshi ka makumi nana ni uvwa a pimbu aleka kukhala ni fhunu ya ku balula mitshima. ⁸ To khia mukhetu wudi ni pata kumi jia fwalanga yivwa wa bidisa yimoshi kamba oku kulemisa mwinda wa komba nzu yendji aleki kuhenga ni malembi moshu kibende mwenekina tii koku ku kiamba kumwekana. ⁹ Tangwa diamba ku kimona wo ku wongika a ndoyi jiendji ni athu a mu belabela mu ku wa leza akhedi ni kieshi kikuma kibenda kiabididi kia mwekana. ¹⁰ He ami nia nu leza etshi kieshi kingi kudi a wandjio a Nzambi yivwa muthu mumoshi wa bola wa balula mutshima. ¹¹ He Yesu wakula etshi Muthu mumoshi wakhedi ni ana amala mbadi ¹² Kalengi mu katshi kowu waleza tata ednji etshi Tata nguwu kikimweni kapu dia kimvwama kidi kia memi. He wa kapidi kimvwama kiendji kudi owu mbadi. ¹³ Kumanima ma mwa yilumbu kalengi wa kasidi yima yendji yoshu waya kudikhela ku dimbu dia kwalaha kwenikuna wa hangididi fwalanga mu ndjila ya bola ni kusumba yima ya kondidi kukhala nayi fhunu. ¹⁴ Tangwa dia sadidi mokhu nzala ya ngolu yengididi mu kifutshi mwenekina wa yandjika kumona pashi. ¹⁵ Wendidi kuhenga kisalu kudi muthu mumoshi wa kifutshi mwenekina muthu mweni wa mutumini ku kilanga kiendji mu kudisanga a ngulu. ¹⁶ Wa yandjikidi kwivwa nzala ya kudia yima ya dianga angulu kikuma ni muhu ka muhwanga oku kima kia kudia. ¹⁷ Kashi tangwa diela ngunza wa dijiya wakula etshi Asuta angahi a tata yamemi edi kudianga madia ni makonga kowu ami oku ku nidi nienda niafwa ni nzala. ¹⁸ Nienda nia katuka oku niendi kudi tata ya memi nia ka muleza etshi Tata ami nia hangidi kubola kudi Nzambi ni kudi ayi. ¹⁹ Nia lungidiku a ngu tambiki epi mwana eyi ngushi ni khadi mu ndonga ya asuta jeyi. ²⁰ He ngunza yala wabwa mu ndjila waya kudi tatendji. Tangwa diakhedi khadi kwalaha tatendji wa mumweni wevwa nkhenda jingi kumanima wendidi fishi wa mu bwila mu shingu wa mu wumba. ²¹ Mwana wa mu leza etshi Tata Nia hangidi kubola kudi Nzambi ni kumesu meyi. Ami kalungidiku epi a tambiki mwana eyi. ²² Tata wa lejidi athu jiendji a kisalu etshi nehenu swalu lopu dia yitangana pimbu muvwatisenu nu mushi lupeta mu mwinu ni yidiatudi ku miendu. ²³ Kumanima nehenu kana ka ngombi kedi maji lawu nu ka jihi. Tudienu tu hangenu feti. ²⁴ Kikuma mwanemi wakhedi wafwa kikimweni wudi ni moyi. Wakhedi wabila kikimweni wa mwekana. Ayandjika kuhanga feti. ²⁵ Mu tangwa mwenedina kaka yayendji wakhedi mutemu. Kiakhedi kwiza wa kokuluka ku nzu wevwa mimbu ni makinu. ²⁶ Wa tambikidi muthu mumoshi wa kisalu wa mwihuila etshi ekhi yidi kuhitanga. ²⁷ Muthu wa kisalu wa mu leza etshi Mwakieyi wa vutuka kunzu tatinu wa jiyanga kana ka ngombi kedi maji lawu kikuma weza kubvutuka kedikedi. ²⁸ Mwana wa tsomi wevwa khabu kuzola kwingila munzu lo kashi tatendji wa wudika mu ku mu lembila. ²⁹ Kashi mwana wa tsomi wa vutula kudi tatendji etshi Tala mvula lawu jia hita ami nia kuhangila katshi mulongi weyi wumoshi nia loba oku kadi kandiku kadi wu nguhwanga kana ka ngombi ni hangi feti ni andoyi jiemi ³⁰ Kashi tangwa dieza mwana eyi oyu wa zangidi yima yeyi yoshu ni andumba leta wa mu jihila kana ka ngombi kedi maji lawu. ³¹ Tata wa mu leza etshi Mwanemi ayi wudi kaka ni ami yoshu yidi yamemi yidi yayeyi. ³² Kashi yakhedi pimbu kudi etu mu kuhanga feti ni kukhala ni kieshi kikuma mwakhieyi oyu wakhedi wafwa kikimweni wudi ni moyi wakhedi wa bila kikimweni wa mwekana.