¹ Mambu ama mabwidi tangwa Yesu akhedi kusamba Nzambi homa hamoshi. Mulonguki wenji mumoshi wa muleza etsi Fumu tulongi pila ya kusamba Nzambi mudi kialongidi Yoani alonguki jienji. ² Yesu wa waleza etsi Tangwa enu nukubula kusambila akulanga enu ekhi Tata Leka jina dieyi dikhadi dia lukumu. Kifumu kieyi kiji. ³ Wutuwingi koshu lutshiku madia matudi namu fhunu ⁴ Twividingi khenda mu kubola kwetu kikuma ni etu twividingi khenda koshu muthu watuhanga kubola. Wutuleka oku mbeni eji kutumeka. ⁵ Yesu wa waleza epi etsi nani mu katsi kenenu yivwa wudi ni futa wenji waya mu midi ya pipa wa muleza etsi Futa diemi defishi yitsini yisatu ya mapa ⁶ kikuma nihu futa diemi mumoshi watula kikimweni nishiku ni kima kia kumuhwa. ⁷ Tangwa edi muthu wudi mu katshi kanzu wa muvutudila etsi leka kungu yangisa Kianzuluku kia kukasa ana jiemi ni ami tudi twalangala. Ni kutokama oku epi mu kukuwa mapa. ⁸ Ami nia nuleza yivwa mweni waleka kutokama amuhu dipa kikuma wudi fhuta dienji, wukutokama kaka ti wakuhwa yitshini ya mapa mahudi namu fhunu kikuma ayi wakanga kulomba konda kuhwila. ⁹ Ami nia nuleza epi etsi Nu lomba aku nuhwa nu henga nu kumona nu kokuta aku nu kangudila. ¹⁰ Kikuma koshu muthu wa lomba wenda kunona oyu wenda kuhenga wenda kumona muthu wa kokuta aku mukangudila. ¹¹ Khia tata mukatsi kenenu ,yivwa mwana wa mulomba shiya mweni wukumuhwa niokha apalashi ya shiya? ¹² Ngololo Yivwa mweni walomba diayi wukumuhwa kikhalakhala? ¹³ Yivwa enu nudi hatu a bola nwejika kukapila ana jienu yima ya waha Tata yenenu epi wudi ku hulu wu kunuhwa Pevi ya Vedila yivwa nwa mulomba. ¹⁴ Lutsiku lwekha Yesu wa hudishidi pevi ya bola yekhinishini muthu kamama. Tangwa diahudika pevi ya bola kamama kayanjika kwakula. Hundji dia athu diayituka. ¹⁵ Kashi athu ekha akudidi etsi Yidi mu ngolu jia Satana fumu wa pevi jia bola mweni akukayanga pevi jia bola. ¹⁶ Ekha kama azodidi kumu meka alomba ahangi kidimbu kimoshi kikukatukila ku hulu. ¹⁷ Kashi Yesu wejikidi mabanza mowu wa waleza etsi Luyalu lukapangana olumweni mbala jiadi luku mwangana yivwa etsi athu munzu akapangana nzu yi kubwa. ¹⁸ Yivwa Satana wenda wadi nwanisa enji mweni kiehi luyalu lwenji lukujinga? Kikuma enu nwenda nwakula etsi ami nienda niakaya pevi jia bola mu ngolu jia Satana. ¹⁹ Yivwa medi kienekina ni khia ngolu alonguki jienu enda kuwa kayila? Eni akakhala a zuji jienenu. ²⁰ Kashi yivwa nienda niakaya pevi jia bola mu ngolu jia Nzambi ejikenu etsi kifumu kia Nzambi kidi mu katsi kenenu. ²¹ Tangwa muthu mumoshi wa ngolu kiedi ni yinwaninu yenji yalunga wenda wakengidila nzu yenji yima yenji yoshu epi yidi ya kusweka. ²² Kashi yivwa muthu mwekha wa muhita ngolu weza ku munwanisa tii wa mu bedisa wuku mutambula yinwaninu yoshu ti koku kwa kukapisa yima yenji yoshu kudi athu. ²³ Koshu oyuan keshiku ni ami wudi mbeni wamemi Koshu oyuna wu kulekanga kuwongika athu ni ami wenda wa wamwanga. ²⁴ Tangwa diahudika pevi ya bola mukatsi ka muthu Yenda kwenda kuhenga muma mwa konda meya mu kujinga. Kia kuleka kumona homa ya diakudila etsi Ami nia vutuka kunzu yemi kunia katukidi. ²⁵ Kia kuvutuka mweni wukuwana nzu yeneyina ayi komba ashia yima yoshu mu ndonga. ²⁶ Tangwedi he wendila pevi jekha tsambwadi(7) jia muhuta mweni Eni oshu eza kutunga dibela. Muthu mweno yuna wekhina kubola kwingi hitila mbala ya thethi. ²⁷ Kiela wamanisa mukwakula mukhetu mumoshi wejidi kutula hohu wazangulandaka akatshi ka hunji diathu wa muleza etsi Kieshi kudi mama oyuna wa ku kebidi mu vumu dienji ni mayedi makhedi ku kunwisa. ²⁸ Kashi mweni wakudidi etsi Kieshi kudi oshu akwivwanga ndaka ma Nzambi ni kuyihangila. ²⁹ Kiela athu ayanjika kwikhina lawu mweni wayanjika kuwaleza etsi Enu athu a tangwa mwenedi nudi nwa bola. Nwenda nwa henga kidimbu nwa kamonoku epi kidimbu kaka ekina kia Yona. ³⁰ Yona wakhedi kidimbu kikuma kia kwa Ninive kienikioki mwana wa muthu wa kakhala kidimu kikuma kia enu mu tangwa mwenedi. ³¹ Fumu wa mukhetu wa Saba wa kazanguluka mu lutshiku lwa kazenga mambu ma athu atangwa mwenedi ni kuwazengila ndola Kikuma mweni wa katukila kwalaha mu kwiza kwivamayela ma Salomon. Yivenu henaha hedi ni muthu wahita Salomon. ³² Akwa Ninive akeza kufunda athu a tangwa mwenidi mu lutshiku lwa kabula kuzengila athu mambu kikuma eni abaludidi mitshimi kievidi malongi ma Yona kashi ejikenu etsi henaha hedi ni muthu wahita Yona. ³³ Kushiku muthu yivwa walemisa mwinda akunona wa wuwinda katini to wa wusweka mu shanduku Kashi enda kuhushia a hulu dia Mesa kikuma oshu engila munzu amoningi kieji Disu dieyi didi mudi mwinda wa mwila. ³⁴ Tangwa disu dieyi didi mboti mwila weyi woshu wekhina Keiji kashi tangwa disu dieyi diayela mwila weyi woshu wekhina mu pipa. ³⁵ Keba kieji kieyi kikhina oku pipa. ³⁶ Yivwa mwila weyi woshu wudi kieji konda pipa ejika etsi mwila weyi wukubula kukhala ni kieji mudi mwinda wenda kuhana kieji tangwa dioshu. ³⁷ Tangwa diamanisini mu kwakula mu fadishi mumoshi wejidi kumutambika endi kudia nio mweni kunzu enji. Yesu wengididi munzu wa shikama ha mesa. ³⁸ Mufadishi wayitukidi mu kumona etsi Yesu kovidiku kadi mokhu mu kudia. ³⁹ Kashi fumu wa mu lejidi etsi enu afadishi nwenda kwovwa makopa ni malonga hanji kashi mitshima mienu miazala ni khu ni kingolungolu. ⁴⁰ Enu nudi Mazoba. Oyu wangidi maku mwekananga mweni kaka epi wangidi medi maswamana. ⁴¹ Nufeti kuhwanga a tsukami yima yidi mukasthi ka makopa menu mambu menu moshu makuwaha. ⁴² Kashi kiadi kudi enu afadishi kikuma nwenda kufuta kiakumi kia mayiji ma vumba dia pimbu ni nduna ya yilanga yenu Kashi nwenda kujimbangana kuhanga mambu ma pimbu ni kozola Nzambi. Kudi mboti mu kuhanganga mambu mu njila ya pimbu ni kuzola Nzambi ni kuhanga pimbu kudi athu oshu. ⁴³ Kiadi kudi enu afadishi kikuma nwenda kuzola kushikama a yitshi ya kumesu mu nzu ya Nzambi ni kuzolanga anuhungi jimboti jia lujitu mu mazandu. ⁴⁴ Kiadi kudi enu Kikuma nudi mudi majiamumakonda kidimbu menda kudiata athu konda kujika. ⁴⁵ Longi mumoshi wa jitshiku wa vutudidi mvutu wa muleza etsi Longi ki wukwakulanga kienekina wenda watutukana. ⁴⁶ Yesu etsi kiadi kudi enu a malongi a jitshiku nwenda kushia yilo a mitwa miathu kashi enu mweni nukuzolanga oku kuyikwata ata ni mwinu wenu wumoshi. ⁴⁷ Kiadi kudi enu kikuma nwenda kutunga majiamu ma waha ma ambikudi ajiyidi akhakha jienu. ⁴⁸ Enu nudi athemu nwenda nwa kumbula yisalu ya akhakha jenu kikuma eni ajiyidi a mbikudi anwenda kutungila majiamu. ⁴⁹ Kikuma kia kienekina Mayela ma Nzambi makudidi etsi Ami nia katumisa a mbikudi ni athumwa akha mwenisa pashi ekha a kajiya. ⁵⁰ Athu a tangwa dienedi a kanona ndola kikuma akhakha jiowu ajiyidi a mbikudi mu luyanjiku lwa thothu. ⁵¹ Yandjika tangwa diwudishidi mashi ma Abedi ti mashi ma Zakadiya oyu wajiyidi mu nzu ya Nzambi a hulu dia mesa menda kuhanina makabu Nia nuleza ni kiedika kioshu etsi athu a tangwa mwenedi akanona ndola kikuma kia mashi menamana. ⁵² Kiadi kudi enu amalongi a jitsiku jia ayuda Kikuma enu nwa katula tsabi jia nzu yenda kunonina athu mayela enu mweni epi nu kwingilanga oku nwenda kukasa athu djila mu kwingila. ⁵³ Tangwa diawudikidi Yesu munzu a malongi ajitshiku ni afadshi oshu amwalumuka ayandjika ku mutendisa mu mambu lawu ⁵⁴ ni kuhenga amumeki mu ji ndaka jienji mweni.