¹ Yilumbu yisambenu ya sadidi mu kuhanga feti dia Paki Yesu wendidi ku Betani kwakhedi Lasula wa tokimishini mu lufwa. ² A mu hangididi madia Malata wakhedi ku wa shila yima ya kudia Lasula wakhedi mu katshi ka athu akhedi ha mesa ni Yesu. ³ He Madiya wanonini mulangi wa madiashi a ma hangidi ni nard makhedi thalu wa mwangina Yesu mu miendu ni kui mu kukumuna ni suki jiendji. Nzu yoshu ya zadidi ni vumba dia madiashi. ⁴ Yuda Yiskadioti mu moshi mu katshi ka a Longuki jiendji oyuna wa sumbishidi Yesu wakudidi etshi ⁵ Kikuma kiakhi nwa leka kusumbishila madiashi menama mu fwalanga khama jisatu muhu a tsukami. ⁶ Wakudidi kienkina keshiku kikuma etshi mweni wakhedi ni khenda jia a tsukami kashi kikuma wakhedi mwiji wakhedi musweki a fwalanga wa ji kabanga. ⁷ Yesu wakudidi etshi mu lekenu. wahanga kienekina mudi ki makakhala mu kilumbu kia lufwa lwemi. ⁸ A tsukami nu kubula kukhala nawu tangwa disohu kashi ami nwa kakhala oku niami koshu tangwa. ⁹ Kikimweni hundji dia Ayuda lawu kievidi etshi Yesu wakhedi koku endidi keshiku mu kutala Yesu kashi mu kutala Lasula oyuna wa tokimishini Yesu mu lufwa. ¹⁰ A fumu jia Anganga Nzambi nieni ahanga fondu mu kujiya Lasula ¹¹ Kikuma Ayuda lawu akatukanga ni kulaba Yesu kikuma kia mweni. ¹² Mu kukhia Hundji dijima diendidi ku feti. Kiela evwa etshi Yesu wakeza ku Yeluselemi ¹³ Eni anonini mandalala ma samba a wudikidi aya ku waningina nendji ni kungangumuka mu ndaka ya ngolu etshi Hozana Lukumu kudi oyu wu kwizanga mu jina dia Fumu wa Yiseledi. ¹⁴ Yesu wa mweni punda wa nina mudi kia ma sonika etshi ¹⁵ Wivwoku woma vidi dia Sion tala fumu weyi wenda weza wa shikama ha wulu dia kana ka punda. ¹⁶ Alonguki jiendji kejikanga oku kadi mambu menama moshu kashi kiela Yesu wanona Lukumu eni ebuka kia etshi mambu ama moshu mahangama mudi ki ma sonimini kikuma kia mweni. ¹⁷ Kikimweni hundji dia athu diakhedi ni Yesu tangwa dia tambikidi Lasula ku majiamu wa mu tokimisa mu lufwa dia hanini kithemu kudi a pangi jiowu. ¹⁸ Henihohu hundji diendidi kuwanina nendji kikuma evidi etshi mweni wahangidi kipedikisa. ¹⁹ Afadishi akwanganini etshi Talenu enu nushiku ni kima kia kuhanga talenu athu oshu enda a mu laba. ²⁰ Kikimweni kwakhedi ni Greki mumoshi mu katshi ka athu akhedi kwenda ku feti. ²¹ Endidi kudi Fidipa mukwa Betesayida ku Ngadidi a mu hula etshi Tata etu twazola kumona Yesu. ²² Fidipa wendidi waleza Andela Andela waya ni Fidipa a leza Yesu. ²³ Yesu wa wa vutudidi wakula etshi Tangwa dia lunga mwana muthu anoni lukumu. ²⁴ Kiedika ni ku nu lezanga akula etshi kheni ya ble yibu hashi yi leki kufwa kheni mwene yina kaka yivwa yafwa yi ku buta yibundu lawu. ²⁵ Koshu wahitangana kuzola moyi wendji wa ka wu bidisa kashi oyu wu ku beyanga moyi wendji hena hashi wenda wa wu sweka mu kikuma kia moyi wa mvula ni mvula. ²⁶ Kidi muthu wenda wa ngu hangila eji ku ngu laba hoshu hani kukhala henihohu ha kakhala asadi jiemi. Yivwa muthu wa ngu hangila ami Tata wa ka muhwa lukumu. ²⁷ Tangwedi niekhina mutshima keneni ekhi ni kwakula. Tata khatudi mu tangwa edi dia pashi eji. Kashi niejidi kikuma kia tangwa mwenedi. ²⁸ Tata Zina dieyi dinoni lukumu. He ndaka yimoshi ya katuka ku wulu yakula etshi Ami nia kuhwedi kadi lukumu nia ka bula epi ku kuhwa lukumu. ²⁹ Kumanima Hundji dia athu akhedi hohu kievidi kienekina akula etshi yidi kuluma kwa nzaji. Athu ekha kama etshi Wanjio mumoshi weza ku mwakusa. ³⁰ Yesu wa wa vutudidi wakula etshi Ndaka eyi ya wudikidiku kikuma kia memi kashi kikuma kienu. ³¹ Kikimweni tangwa dia fundusu dia lunga kikimweni fumu owu a ku mu kaya. ³² Ami yivwa nia katuka hashi niaya ku wulu nia kabenda athu oshu kudi ami mweni. ³³ Mweni wakulanga kienekina mu kutendula mutshindu ekhi a kafwa. ³⁴ Hundji dia athu dia mu vutudila etshi Etu twa longikidi tshiki eshi Khidishitu wa ka jinga mvula ni mvula. Kiehi ayi wa lunga kwakula etshi Mwana muthu wa kukatuka hashi waya ku wulu. Mwana muthu mweni nani. ³⁵ He Yesu wa waleza etshi Mwania wudi khadi nienu kashi mu tangwa ditshiotu. Jingangenu mu pila ya mboti kidi khadi mwana kikuma etshi pipa yileki ku nu bidisa ndjila. Koshu wu kukibanga mu pipa ka kwijikanga oku kwa kwendanga. ³⁶ Ki nudi khadi ni mwania kwikilenu moshu ma ku nu lezanga mwania kikuma nwikini athu a mwania. Yesu wakudidi mambu menama ku manima waya kuswama alaha. ³⁷ Ata Yesu wahangidi yipedikisa lawu kumesu mowu eni kakhediku ku mu kwikila ³⁸ kikuma etshi ndaka ya mbikudi Yesaya yilungi mudi kiakudidi etshi Fumu nani wa kwikididi tsangu jietu e. Kudi nani khoku dia Fumu dia dimwekinishini e. ³⁹ kienikioki eni kalungidiku kukwikila kikuma Yasaya wakudidi epi etshi ⁴⁰ Mweni wa wabata kumesu wa wekhinisa mithsima mia kola aleki kumona ni mesu mowu mweni aleki kubakisa ni mitshima miowu mu kuleka kwiza kuvutuka kudi ami ni wa wuki. ⁴¹ Yasaya wakudidi mambu menamana kikuma wa mweni lukumu lwa Yesu he ni kwakula kikuma kia mweni. ⁴² Kinga lo a fumu lawu a kwikididi kudi Yesu kashi kikuma kia afadishi eni kakhediku kuzola kudilombulula mu kuleka ku wa wudisa mu dibundu. ⁴³ Eni akhedi kuhenga lukumu kudi athu kuhita lukumu lwa Nzambi loni. ⁴⁴ Yesu wakudidi mu ndaka ya ngolu etshi Koshu wu ku kwikila kudi ami wa kwikila epi kudi oyu wa thumini ⁴⁵ Oyu wa mbona ami wa mona epi oyuna wa ngu tumini. ⁴⁶ Ami niejidi mudi mwania mu kifutshi koshu wa ngu kwikila ka sala oku epi mu pipa. ⁴⁷ Yivwa moshu wevwa ndaka jiemi kashi ku jisweka lo ami ni ku mu fundisa oku kikuma niejidiku mu ku fundisa kifutshi kashi mu kuhulusa kifutshi. ⁴⁸ Oyu wa ngu leka ami waleka kukumbula ndaka jemi wudi ni zuzi wendji Yidi ndaka yi nia kudidi yeni ya ka mu zengila ndola mu tangwa dia tshuka. ⁴⁹ Kikuma ami niakhediku kwakula mu luzolu lwemi. Yidi Tata oyu wa thumini mweni wa ngu hwedi kiyeka kia mambu moshu ma niakulanga ni ma nia khedi kwakula. ⁵⁰ Ami niejika etshi tshiku yendji yidi moyi wa mvula ni mvula kienikioki moshu ma ni kwakulanga ami nienda nia makula mudi kioki kia mandejidi mu kwakula.