¹ Kwakhedi ni muthu mumoshi jina dienji Lazare wakhedi wayela. Wakalanga ku Betani dimbu dia Madiya ni pangi enji Marte. ² Lazare wakhedi pangi a Madiya oyuna wa washidi Fumu madiashi ku manima wa kukumuna miendu yenji ni suki jienji ³ A pangi jienji akhetu owu mbadi atumishini ndaka kudi Yesu etshi Fumu Iza wu tadi oyu wu wenda kuzola wa yela. ⁴ Yesu kievidi kienekina wakula etshi Makhashi menamana ma ku musenda oku ku lufwa kashi medi kikuma kia lukumu lwa Nzambi kikuma epi Mwana Nzambi aswakadi kunona lukumu. ⁵ Yesu wakhedi wa wazola owa asatu Marte Madiya ni Lazare. ⁶ Kiedidi Yesu wevwa etshi Lazare wenda wayela wahangidi epi yilumbu yadi hakhedi. ⁷ Kuma nima walejidi alonguki jienji etshi tuvutukenu ku Zude. ⁸ Alonguki a mulejidi etshi Longi Thama yini lo Ayuda edidi kukujiya ku mayala Wa zola epi ku kuvutuka. ⁹ Yesu etshi Kilumbu kimoshi ki kukhalanga oku ni matangwa kumi ni madi. Yivwa muthu wenda wa kiba mu mwania ka kudibula oku sasa kikuma wenda wamona pwelele. ¹⁰ Yivwa muthu wenda wa kiba mu pipa wukudituta sasa kikuma mwania wushiku mu katshi kenji. ¹¹ Kumanima ma kwakula mambu menamana wayikidi etshi Futa dietu Lazare wudi wa langala tulu ni kutula koku mu ku mu tokimisa. ¹² Alonguki a muleza etshi Fumu yivwa wudi wa langala wamba kutokama. ¹³ Yesu wakudilanga kienekina kikuma kia lufwa lwa Lazare kashi eni abanzanga etshi wakhedi kwakudila tulu. ¹⁴ He Yesu wa wa leza kitelengi etshi Lazare wudi wafwa. ¹⁵ Nidi ni kieshi kikuma kienu kikuma ami nia khediku koku enu nu swakadi kukwikila. Twendenu kikimweni. ¹⁶ Toma wakhedi kutambika Didimi waleza Alonguki etshi twendenu nietu tufu njila yimoshi ni Yesu. ¹⁷ Kiela Yesu watula wa wanini Lazare wahanga kadi yilumbu yiwana mu mjiamu. ¹⁸ Betani diakhedi penapena ni Yeluselemi mu kitamina kia makulu makumi matanu mu kutanga. ¹⁹ Ayuda lawu ejidi kunzu ya Marte ni Madiya mu kuwa katula khenda kikuma kia pangi owu. ²⁰ Kiela Marte wevwa etshi Yesu wenda weza wendidi kuwa waningina mu njila kashi Madiya wasadidu kunzu. ²¹ He Marte waleza Yesu etshi Fumu nga wukhala haha pangi wemi nga kafidiku. ²² Ata kikimweni niejika etshi koshu ki wu kulomba kudi Nzambi wu ku kuhwa. ²³ Yesu wa muleza etshi pangi eyi wu kujinga epi. ²⁴ Marte wa muleza etshi niejika etshi wa katokama mu lufwa mu kilumbu kia tsuka. ²⁵ Yesu wa muleza etshi Ami nidi lufutumuku nienda kuhana moyi kosu wakwikila ami wu kukhala ni moyi ata wafwa. ²⁶ Kosu wudi ni moyi washia lukwikila kudi ami ka kafwa oku ata kiehi. Wa kwikila mu menamana. ²⁷ Mweni wa muleza etshi eeh Fumu nia kwikila etshi wudi khidishitu Mwana wa Nzambi wu kwizanga mu kifutshi. ²⁸ Kiela wa manisa mu kwakuka kienekina wa vutuka waya kutambika pangi Madiya mu kabeta. Wa muleza etshi Longi watula kadi wenda wa kutambika. ²⁹ Tangwa dievidi kienekina wazangulukidi tswalu waya kwakhedi mweni. ³⁰ Yesu katudidiku kadi hembu wakhedi kaka homa ha wawanini Marte. ³¹ He kiela Ayuda akhedi ni mweni munzu ni ku mukatula khenda amona etshi Madiya wazangulukidi wa wudika ni fishi a mu labidi ni kubanza etshi waya ku majiamu mu kwenda kudila. ³² Kiela aiya watula homa hakhedi Yesu wa mumona wabwidi mu miendu mienji wa muleza etshi Fumu nga wukhala haha pangiemi nga kafidiku. ³³ Tangwa Yesu amumweni ni kudila ni Ayuda akhedi kwiza ni mweni ni kudilanga wadiyangishidi hengi ya muhwedi pashi jingi ku mutshima wenji. ³⁴ Wa wehudidi etshi kwehi nwa mu zezidi. Eni etshi Fumu yiza wutadi. ³⁵ Yesu wadididi. ³⁶ Ayuda kama akula etshi Talenu pila ekhi akhedi kuzola Lazare. ³⁷ Kashi kiatshi kia athu mu katshi kowu akudidi etshi Muthu oyu wa kangudidi mesu ma pofu kalungidiku kuhanga etshi muthu pyu epi kafwa oku e. ³⁸ He Yesu wevidi kamu khenda jingi ku mutshima wenji wendidi ku majiamu. Diakhedi buku mu katshi ka mayala dia kukanga ni yala dijima. ³⁹ Yesu wakudidi etshi Katulenu yala. Marte pangi a Lazare wakhedi mvumbi waleza Yesu etshi Fumu mwila woshu wa tsakumuka kikuma wafidi kwahita kadi yilumbu yiwana. ⁴⁰ Mweni wa muleza etshi Nia kulezidiku etshi yivwa wa kwikila wu kumona lukumu lwa Nzambi. ⁴¹ HE akatudidi yala. Yesu wathuthidi mesu ku hulu wakula etshi Tata nia kuhwa matondu kikuma ayi wa ngwivila. ⁴² Niejika etshi wenda ku ngwivila tangwa dioshu kashi yidi kikuma kia hunji dia athu edi mu khulu yime nia kudila kienekina kikuma eni akwikidi etshi ayi wathumini. ⁴³ Kumanima ma kwakula kienekina wa nganini mu ndaka ya ngolu Lazare wudika. ⁴⁴ Mvumbi ya wudika mokhu menji ni miendu yenji yakhedi ya kukasa ni miledi mbunzu yenji ya kuwinda miledi. He Yesu wa walezidi etshi mu kasululenu nu tusudi endi. ⁴⁵ He kiatshi kia Ayuda kiejidi kunzu ya Madiya akwikididi Yesu kia mweni mambu mahangidi ⁴⁶ Kashi ekha avutukidi kudi Afadishi awatela mambu mahangidi Yesu. ⁴⁷ He A fumu jia Anganga Nzambi ni Afadishi atambikisa athu mu kuwaninia akwangana etshi ekhi tukuhanga Muthu oyu wenda wahanga yipedikisa lawu. ⁴⁸ Yivwa tu muleka kienekina athu osu aku kwikila kwa mweni Akwa Loma akeza kutambula palashi yetu ni kifutshi. ⁴⁹ Muthu mumoshi mu kasthi keni jina dienji Kayafwa wakhedi Mbuta dia a Nganga Nzambi mvula mwene yina wa wa lejidi esthi Enu nwijiku ata kima. ⁵⁰ Nushiku kwijikanga etshi kudi mboti kudi enu muthu mumoshi afwi kikuma kia athu osu mu pila etshi thothu yosu yileki kubeba. ⁵¹ Kashi mweni ka kudidiku mambu menamana mu mabanza menji mweni Wakhedi Fumu dia Anganga-Nzambi mvula mwene yina henihohu wa bikudidi etshi Yesu afeti kufwa kikuma kia makanda mosu Keshiku kasu kikuma kia makanda mosu ⁵² kashi kikuma kia ku wongika ana jia Nzambi edi a mwangana mu kifutshi. ⁵³ He yanjika kilumbu mwenekina ahangikidi fondu dia kujiya Yesu. ⁵⁴ Yesu kakhediku epi kumwekana kumesu ma Ayuda kashi wendidi kukhala ku thothu yimoshi mu tseki ha dimbu dimoshi jina diodi Efrayimi. Wakhedi hohu ni alonguki jienji. ⁵⁵ Paki dia Ayuda diekhinini penapena athu lawu akatukidi mu membu ma juinga endidi ku Yeluselemi ku thwala mu kudihangika pila yenda kwakula tshiku. ⁵⁶ Ahengidi Yesu kiakhedi munzu ya Nzambi ni kuhwangananga etshi kiehi nwa banza. Wu kwiza ku feti to lo. ⁵⁷ A fumu jia Anganga-Nzambi ni Afadishi alejidi athu etshi yivwa mwosu wejika kwehi Yesu akhedi awa leji aswakadi ku mu kwata.