¹ Nialunga kwakula etshi mwana wa lunga kunona kimvwama. Kidi khadi mwana mubibi wudi kadi pila yimoshi ni muhika ata yima yidi ya mweni. ² Kashi wu kukhala kaka ku mookhu ma athu edi ku mu sasanga tii kooku kwa kalungishila mvula jia mushila tatendji. ³ Etu epi tangwa di twakhedi ana abibi twakhedi mudi ahika ni kuhanga mambu ma hashi. ⁴ Kashi tangwa diashidi Nzambi ki dia lungidi watumishini mwana endji watetuka kudi mukhetu ni kujitisa tshiku jia Moshi. ⁵ Wa hangidi moshu kikuma etshi athu akhedi mu kihika kia tshiku mweni awa futidi fhuka, etu twikhini ana jiendji. ⁶ Enu nudi ana jiendji ,kikuma kioki Nzambi atumishini pevi ya mwana endji mu mitshima mienu yenda kwakula etshi "Abba Tata"(Tata wamemi). ⁷ Nushiku epi ahika kashi nwekhina ana akanona kimvwama kia nuswekila Nzambi. ⁸ Kashi ki nwa thethikididi kadi kukonda kwijika Nzambi nwakhedi ahika a nzambi jia yiteki. ⁹ Kashi eki he nwejika Nzambi, nzambi epi wa nwijika. Ekhi epi nu kuvutikalanga mambu ma a khakha jienu ma konda fhunu medi ma pamba pamba. Nwa zola nwikhini epi ahika e e? ¹⁰ Enu nwenda nwa jitisa tshiku jia tadila yilumbu a ngondi ma feti ni jimvula. ¹¹ Nidi ni woma etshi kisalu kiemi kinia hanga kudi enu kiaya pamba. ¹² A pangi ekhinenu mudi ami kikuma ami epi niekhina mudi enu. Ni kubola kumoshi nwa pangidiku. ¹³ Kashi nu feti kujika etshi tangwa di nia longidi ndaka ya Nzambi kudi enu thethi niakhedi nia yela. ¹⁴ Kioki kashu etshi nwambidi kuthukana to ku ngu kaya kikuma kia kikhashi kiemi, enu nwa ngu yambidi pimbu mudi wandjio wa nzambi, khutu mudi enjimweni Yesu. ¹⁵ Nwakhedi ni kieshi kingi. Kikimweni kiehi kieni? Kikuma nienda nia hana kithemu etshi mambu ama mambidi kuhangama ata mesu menu nwambidi kukatula nwa ma nguhwa namu ami. ¹⁶ He niekhina mbeni wenu kikuma nienda niakula mambu ma kiedika. ¹⁷ Kudi ni athu edi ku nu hunanga etshi a nu zola, kashi enda a henga kaka mamboti mowu mweni. ¹⁸ Medi kuwaha mu ku khalanga ni nzala ya kuhanga kaka mambu ma pimbu tangwa dioshu, keshiku kaka tangwa di nidi nienu. ¹⁹ Ana jiemi, niekhina mudi mama wudi ni misongu kikuma kienenu, tii kooku ku nwa kejikila kamu khidishitu mu moyi wenu ²⁰ Niakhedi ni nzala yingi ya kutula kudi enu,mu ku nwakusa kikuma nishiku kumonanga kiehi ni ku nu hanga. ²¹ Enu nwenda kuzola kukhala ahika a tshiku.Nwejika etkhi kamu tshiku yidi kwakulanga? ²² Kikuma mukanda wa Nzambi wakula etshi Abalahami wakhedi ni ana mbadi, mumoshi mwana wa tetidi ni muhika, mukowu ni mukaji endji wa kishina. ²³ Ata kioki oyu wa muhika wa tetukidi kienda kutektuka ana oshu kashi oyuna wa tetukidi kudi kishina wudi mwana wa kilaji. ²⁴ Yima eyi afwana kuyitendula mu yingana, kikuma akhetu mwenawana mbadi edi mudi ma kwivwangana madi mumoshi wejidi ku mundonda Sina, wa tetidi ana mbadi edi mudi ahika, wudi Agar. ²⁵ Kikimweni Agar wudi mundonda Sinai ku Arabie eh ya lombulusa Yeluselemi ya kikimweni, kikuma wudi mu kihika ni Ana jienji. ²⁶ Kashi Yeluselemi yidi ku wulu wudi mu kimpwanza, wudi mama wetu. ²⁷ Kikuma ya sonama : mona kweyi kieshi, Mukhetu wa mukhobu, ayi wa konda ana, shanga mulolu ya kieshi, ayi wa lekidi kumona pashi ya kubuta, kikuma ndambu yitshotu edi ana amukhetu owu akonga kudi awa amukhetu wudi ni yala. ²⁸ Kikimweni, enu apangi, mudi Isaac, nudi ana ja tshiku. ²⁹ Mu tangwa dienedina, owu wa tetukidi mu kimutu, waka monisa owu wa tetukidi mu kipevi pashi. Kiehi kioki yidi lelu mwenedi. ³⁰ Ekhi yakula yisona? kaya Mukhetu wa kihika ni mwana wa muhika kakanonoku kimvuama pila yimoshi ni mwana wa mukhetu wa kipwanza. ³¹ Eh apangi etu tushiku ana amukhetu wa muhika kashi tudi ana a mukhetu wudi ni kipwanza.