¹ Kumanima Yala mumoshi jina diendji Anani ni Safila mukaji endji a sumbishidi kiheshi kia kimvwama kiowu ² aswekidi kiatshi kia fwalanga jia sumbishidi ( mukaji endji epi wejikidi) wendidi kuzeza kiatshi kikowu mu miendu mia Athumwa. ³ Kashi Petulu wakudidi etshi Anani kikuma kiakhi satana azadila ku mutshima weyi wa kusenda tii wu huni Pevi ya Longu wa sweka kiatshi kia thalu yata kilanga. ⁴ Tangwa di kia lekidi kadi kusumbishiwa kia khedi kaka kia yeyi. Ki wela wa kisumbisa kiakhediku kiaye e. Kiehi kamu wa bandjidi mambu ma pila mweyi mu muthsima weyi. Wa huniniku athu kashi Nzambi. ⁵ Kievidi ndaka mwenejina Anani wa bwidi wafwa. Athu oshu evidi mambu menamana woma wingi wa kwatidi. ⁶ A ngunza amala ejidi a mu winda mu ku mujika. ⁷ Ma tangwa masatu mahitidi mukaji endji watudidi kwijikanga lo kiehi mahitidi. ⁸ Petulu wa mu lejidi etshi ngu leji yivwa nwa sumbishidi kilanga mu thalu yeneyi. Mweni wa vutudidi etshi he mu thalu yeneyina. ⁹ He Petulu wa muleza etshi kiehi enu mbadi nwevwangananga mu kumeka Pevi ya Nzambi.Tala awa ajikanga mulumi eyi edi ha kishu eni a ku kusenda. ¹⁰ Wa bwidi kaka mu tangwa mwenedina wafwa angunza amala ejidi epi a mu wana wafwa. A mu zangudidi a mujika penapena ni mulumi endji. ¹¹ Woma wingi wa kwatidi dibundu dioshu ni awana evidi mambu menamana ki mahitidi. ¹² Mambu mengi ni yipedikisa yingi yakhedi kuhangama kudi Athumwa. Akhedi ku wongama homa ha moshi valanda dia Salomoni. ¹³ Kashi ni muthu kakhediku ni kikesa kia ku wa wana. Athu akhedi ni lujitu lwingi kudi eni. ¹⁴ Kinga lo lawu diathu akwikididi akhedi kuyikama kudi Fumu akhetu nia amala ¹⁵ tii anehanga akhashi mu ndjila a wa shanga a kipoyi ni a yandu mu pila etshi yivwa petulu wahita kininga kiendji kiswakadi kuwinda koshu awana. ¹⁶ Athu engi akhedi kukatuka mu ma vidi ma penapena ni Yeluselemi ezanga epi kunahe akhashi ni ekha akhedi kuyangisa pevi jia bola eni oshu akodidi. ¹⁷ Kashi mbuta dia Anganga Nzambi wa zangulukidi ni athu ekha akhedi ni mweni(akhedi akwa dibundu dia Saduse) azadidi ni tsoki. ¹⁸ Akwatidi Athumwa a womba mu boloku dienda kushia athu oshu. ¹⁹ Kashi mu pipa wandjio wa fumu wanzuludidi yisu ya boloku wa wa wudisa wa wa leza etshi ²⁰ ndenu wa makininenu mu nzu ya Nzambi longenu athu ndaka jioshu jia moyi wenohu. ²¹ Kievidi mambu menamana engididi mu nzu ya Nzambi mu bwididi ni kulonganga. Kashi mbuta dia Anganga Nzambi wa tudidi ni awana akhedi ni mweni endidi fondu a mambuta oshu a Yiseledi atuma a hengi Athumwa ku boloku. ²² Kashi a fumu jia Asuta endidi koku ka wa mweniku mu boloku avutukidi ata fishi etshi ²³ Twa wana boloku dia kwandjidika a sinzidi edi a makana ha kishu kashi ki twela twanzulula twameniku muthu mu katshi. ²⁴ Tangwa dievidi twadishi wa nzu ya Nzambi ni mbuta dia Anganga Nzambi ndaka mwene jina ayandjika kuhupa ni kuditala ni kutala ekhi yi ku wejila kutwala. ²⁵ Kaka mu tangwa mwenedina muthu mumoshi watudidi mweni etshi Athu a nwa shidi mu boloku edi mu nzu ya Nzambi enda alonga athu. ²⁷ He Kapiteni ni a fumu jia asuta endidi kuwa nona kashi ka wa habgidiku kima kikuma akhedi kwivwa woma aleki kuwasa mayala kudi athu. ²⁶ Kiela awa senda awashia ku mesu ma athu. Mbuta dia anganga Nzambi wa wehula ²⁸ etshi Etu twa nu lekishidi mu kulonga mu jina dienedina kashi enu nwa zadisa Yeluselemi ni malongi menu nwa zola ku tushia mu mulonga kikuma kia mashi ma muthu mwenoyuna. ²⁹ Kashi Petulu ni Athumwa a vutudidi etshi Etu tufeti kulemvuka kudi Nzambi keshiku kudi athu. ³⁰ Nzambi wa tata jietu wa tokimishini Yesu mu lufwa wu nwa jihidi ni ku mu khokha ha wulu dia mutondu. ³¹ Nzambi wa mushia ku khokhu diendji dia kitata bosu Fumu muhulushi Yisaledi abaludi mithsima awa vidishidi kubola kwowu. ³² Etu tudi athemu mu moshu pila yimoshi ni Pevi ya Longu ya hanini Nzambi kudi awa enda kulemvuka. ³³ Kiela enia akhedi ku fondu evwa kienekina evidi khabu azodidi ajiyi Athumwa. ³⁴ Kashi mu Fadishi mumoshi jina diendji Ngamadiela longi wa ji tshiku wa khedi kujitisa athu oshu wazangulukidi wa lomba kudi awudishi atumwa mu tangwa ditshiotu. ³⁵ Kumanima wa wa leza etshi Akwa Yisaledi kebenu mu mambu ma nu kuzolanga kuhanga athu awa. ³⁶ Kikuma kwahitidiku kadi yilumbu lawu Tedashi wa wudikidi mweni etshi wudi muthu mujima kiatshi kia athu kitezu kia khama ji wana a mu labidi. A mu jiyidioshu akhedi ku mwivila a wa mwangini kwasala oku ata kima. ³⁷ Kumanima mendji Yudashi wa ku Ngadidi wa wudikidi mu tangwa dia kusonikisa majina mowu kiatshi kia athu kia mu labidi. Mweni epi wafidi oshu amwivilanga a mwanginini. ³⁸ Kikimweni nienda nia nu leza etshi tshinenu athu mwena awa wa lekenu adikhedi kikuma yivwa mabanza to kisalu eki kidi kia athu ki kubela. ³⁹ Kashi Yivwa kienda kia katuka kudi Nzambi nu ku wa nunga oku nu kwiza kashu kwibukila etshi nwenda nwa nwana ni Nzambi. He eni akwikila kia. ⁴⁰ Kumanima a tambika Athumwa wa wa budishisa wa walekisa mu kwakula mu jina dia Yesu he wa wa tushula aya. ⁴¹ Eni awudikidi mu mbaji ni kieshi kia ku nona lukumu lwa ji pashi jia wahwedi mu jina dia Yesu. ⁴² Kumanima ma moshu menamana koshu kilumbu mu nzu ya Nzambi to mu koshu nzu ni nzu alonganga tangwa dishu etshi Yesu wudi Khidishitu.