¹ Kumanima Petulu ni Yowani endidi ku nzu ya Nzambi mu tangwa dia yisambu mu trwazere dia kingweji. ² Kwakhedi ni muthu mumoshi watetukidi konzu yilumbu yoshu ezanga nendji ni ku mu zeza ha kishu kia nzu ya Nzambi kia tambikanga etshi Kia waha kikuma alombingi lusadisu kudi athu akhedi kwingila mu Nzu ya Nzambi. ³ Kia mweni Petulu ni Yowani ni kwingila mu nzu ya Nzambi wa wa lomba a mu sadishi. ⁴ Petulu wa mu tala ni Yowani wa mu leza etshi Tu tadi. ⁵ Mwana wa khonzu wa wa shianginina ni kumakinina anoni kima kudi eni. ⁶ Kashi Petulu wa muleza etshi Nishiku ni wola fwalanga epi lo kashi eyi yi nidi nayi nienda nia kuhwa. Mu jina dia Yesu wa ku Nazaleti Ndanga. ⁷ Petulu wamukwata ku khoku dia kitata wa mu zangulusa mu mbala yimoshi miendi miendji mionunuka tokhoshu twendji twakweta. ⁸ Kikata kia zanguluka fishi fishi kia yandjika kudiata wengila ni Petulu ni Yowani mu nzu ya Nzambi ni kudiata ni ku sotuka ni kuhwa Nzambi lukumu. ⁹ Athu oshu amweni etshi wenda wa diata ni kuhwa Nzambi lukumu. ¹⁰ Eni ejikidi etshi yakhedi muthu oyuna wa khalanga tangwa dioshu wa shikama ni kulomba lusadisu ha kishu kia tambikanga Kia waha a yitukidi mayela ma wa suka mu kumona mambu ma mu bwila. ¹¹ Kiakhedi kaka ni Petulu ni Yowani athu oshu ayanga fishi kudi eni ku velanda dia tambikanga etshi dia Salomoni ni kieshi kingi. ¹² Kiela Petulu wa wamona wehula athu etshi Athu a Yiseledi kikuma kiakhi nu kuyitukanga. Kikuma kiakhi nwa tusila mesu mudi etshi etu mweni twa zangulushidi muthu oyu mu ngolu ni mu kiyeka kietu mweni. ¹³ Nzambi wa Abahami ni wa Yizaki ni wa Yakobi Nzambi wa a tata jietu wahwa musadi wendji Yesu lukumu. Oyu wu nwa hanini mukwala kudi Pilatu kiakhedi kuzola ku mu kula. ¹⁴ Enu nwa yekudidi muthu wa vedila ni wa mboti nwa zodidi a nu kudidi Muloki. ¹⁵ Enu nwa jiyidi Mwana watha mukwa moyi Oyu wa tokimishini Nzambi mu lufwa etu tudi a themu a mambu menamana. ¹⁶ Kieneki mu kukwila mu jina diendji muthu oyu wu nu kumonga wu nu kwijikanga kaka jina mwenedina dia muhwa kikesa. Lukwikilu lwendji kudi Yesu lwa muhwa ndjila ya kukola mu mesu menu ni mwila wa pimbu. ¹⁷ Kikimweni a pangi niejika etshi nwa mahangidi konda kujika ni a fumu jienu. ¹⁸ Kashi mambu moshu Nzambi akudidi mu kanwa dia a mbikudi jiendji oshu etshi khidishitu wendji afeti kumona pashi wa ma lungisa he. ¹⁹ Balulenu mitshima mienu vutukilenu Nzambi mu pila etshi kubola kwenu a ku jimi kikuma tangwa dia kuhuluka dia lunga kudi Fumu ²⁰ aswakadi ku nu tumisa Khidishitu wa sodidi kikuma kienenu Yesu. ²¹ Wudi oyu afeti kukhala ku wulu tii tangwa dia ka waha mambu moshu amana makudidi Nzambi mu ndjila ya a mbikudi jiendji. ²² Moshi wakudidi etshi Fumu Nzambi wa ka wudisa mbikudi mumoshi mudi ami mu katshi ka a pangi jienu. Enu nu feti ku mwivilanga mu moshu ma ka bula ku nu leza. ²³ Koshu wa ka leka kwivila mbikudi oyu a ka mukatula mu ndonga ya kikanda. ²⁴ He a mbikudi oshu akhedi kaka kwakula yandjika Samwela akudidi epi mambu ma yilumbu mweneyi. ²⁵ Enu nudi ana jia a mbikudi awana evinginini Nzambi ni a khakha jietu mudi kia lejidi Abalahami etshi Yikanda yoshu ya hashi nia ka yi sakumuna mu ndjila ya kikanda kieyi. ²⁶ Kia kela Nzambi wa wudisa musadi wendji wa ka thethikila ku nu tumisa nendji kikuma a sakumuni koshu a ka leka kubola kwowu.