¹ Kumanima ma mambu menamana Polu wa katukidi ku Atene waya ku Kolinto. ² Kwenokuna wa wanini muyuda mumoshi jina diendji Akilashi mukwa Pon wakatukidi ku Itali ni mukaji endji Pidisila kikuma Kuloti wa lejidi Ayuda oshu a katuki ku Loma he Polu wendidi kudi eni. ³ Polu wa jinganga ni kuhanga nieni kikuma akhedi kikuma akhedi kuhanga kisalu kimoshi owu oshu. Akhedi kutunga ma hema. ⁵ Polu wa longanga mu nzu ya yisambu kosu Lumingu. Wa sendanga Ayuda ni A Greki mu ku kumbula. ⁴ Kashi tangwa Silasi ni Timote akatukidi ku Masedwani Polu mu ngolu ya Pevi ya longu watedi kithemu kudi Ayuda etshi Yesu wudi khidishitu. ⁶ Kiela Ayuda aleka ni ku mu tukana Polu wa pupudidi miledi yendji mweni etshi Leka mashi menu mabu ha mutwa wenu ami ma thadidiku kikimweni niaya kudi apani. ⁷ Mu kuhita henahana wa hitididi ku nzu ya Titusi Yusitus muthu mumoshi wakhedi kujitisa Nzambi. Nzu yendji yakhedi penapena ni Nza ya Yisambu. ⁸ Khidispushi fumu wa nzu ya Yisambu ni kikanda kiendji kioshu a kwikididi kudi Fumu. Lawu dia athu ku kolinto evidi Polu a kwikididi anona mbotika. ⁹ Fumu wa lejidi Polu ku thulu etshi Wivoku woma kashi akula wudi bata oku. ¹⁰ Kikuma nidi niayi ata muthu ka ku kuhanga oku kubola athu jiemi lawu edi ha vidi edi. ¹¹ Polu wa jingi hohu mvula yimoshi ni ndambu wa longanga ndaka ya Nzambi mu katshi kowu. ¹² Kiela Gadioni wekhina Kuvernere wa Akayi Ayuda oshu evwangana mu kuhanga Polu kubola a mu sendidi a mbaji. ¹³ Eni etshi Muthu oyu walumuna mitshima mia athu ku sambila Nzambi mu pila yi kulekanga tshiku. ¹⁴ Polu kiedidi kwakula Gadiono wa lejidi Ayuda etshi nga yikhala kubola to mambu ma khoni niela ku nwivila. ¹⁵ Kashi ki mengila mu mambu matadila malongi ni majina ni tsiku yenu ma hangikenu enu mweni. Ami nia zodidiku kukhala zuji mu mambu ama. ¹⁶ Gadioini wa wa wudishidi mu mbaji. ¹⁷ He owoshu alumukina Sositeni fumu wa nzu ya yisambu a mu bula mu mesu ma athu mu mbaji. Kashi Gadioni ka wa kipidiku. ¹⁸ Polu kia jingidi hengi ni a pangi wa wa shishidi waya ku Siri nzila yimoshi ni Pidisila ni Akilashi. Ku kiawu kiakhedi kumakinina kukatuka a mu kuludidi dingwa ku Sankidi kikuma wa manisa yilumbu ya zengidi mu defi ya tedi kudi Nzambi. ¹⁹ Kiela atula ku Efesu Polu washisa Pidisila ni Akilashi henahana kashi wa zodidi enjimweni engidi mu nzu ya Yisambu mu kusolula Ayuda. ²⁰ Eni alombidi Polu mu kukhala epi mwa tangwa wa lekidi. ²¹ Kashi wa katukidi wa waleza etshi Nia ka vutuka epi kudi enu yivwa Nzambi wa zola. He wendidi ku Efeze. ²² Kiela wa tula ku Sezare wa kandukidi ku Yeluselemi mu kuhwa dibundu dia Yeluselemi mboti he wa kulumukini ku Antioshi. ²³ Kia jingidi koku ka ndambu Polu wendidi ku thothu jia Galati ni Friji mu kuhana kikesa kudi alonguki. ²⁴ Mu yuda mumoshi jina diendji Apolo mukwa Alekzandele wakatukidi ku Efesu. Wakhedi Mbaku mu makudidi ni ngolu mu mambu ma Nzambi. ²⁵ Apolo walongukidi kamu pimbu malongi ma Fumu. Wakhedi ni pevi ya ngolu wakulanga ni kikuma mambu matadila Yesu kashi wejikidi kaka mbotika ya Yowani. ²⁶ Apolo wa yandjikidi kwakula pwelele mu nzu ya yisambu. Kashi kiela Pidishila ni Akilashi a mwivwa a bundangana ni mweni mu ku mu tendudila pimbu pimbu ndjila ya Fumu. ²⁷ Kiakhedi ku kana kwenda ku Akayi a pangi a muhwedi kikesa a sonikinini alonguki ku Akayi mu ku yamba. Kia tudidi wa sadishidi hengi awana a kwididi mu khenda jia Nzambi. ²⁸ Apolo wa lezanga Ayuda mu mesu mathu ni kikesa kioshu etshi eni abila ndjila ni kuwa tendudila mikanda mia Nzambi mi kwakulanga etshi Yesu wudi Khidishitu.