¹ Polu watudidi epi ku Derbe ni ku Listre tala mulonguki mumoshi jina diendji Timote wakhedi koku mamendji muyuda tatendji wakhedi Greki. ² A pangi akhedi ku Listre ni ku Yikoni a mu telanga kithemu kia pimbu. ³ Polu wa mu zodidi mu kukibanga nendji wa mu nonini wamwingisa mukanda kikuma kia Ayuda akhedi dambu mweneyina oshu ejikidi etshi tatendji wakhedi Greki. ⁴ Tangwa dia hitanga mu ma vidi wa shisanga jindaka mu mabundu etshi alemvukingi mu moshu ma wa longidi Athumwa ni a mambuta ma dibundu a ku Yeluselemi. ⁵ Mabundu makhedi kwikhina ngolu mu lukwikilu athu akhedi kuyikama koshu kilumbu. ⁶ Polu ni athu akhedi kukiba nawu a vukidi pata aya ku thothu ya Friji ni Galati kikuma Pevi ya Nzambi ya walekishidi ka longa oku ndaka ya Nzambi mu thothu ya Azi. ⁷ Kiela atula penapena ni Misi edidi kwingila ku Bitini kashi Pevi ya Yesu ya wa lekisa. ⁸ He a hitila mu ndjila ya Misi a kulumuka ku vidi dia Trowas. ⁹ Polu walotidi mu pipa mukwa masedwani mumoshi wa makana ni ku tambika mweni etshi Yiza ku masedwani wu tu sadishi. ¹⁰ Kiela Polu walota ndoji mu mbala yimoshi twazengidi mu kwenda ku Masedwani etu etshi Nzambi wa tu tambika twendi kuwa longa tsangu ya mboti. ¹¹ Ki Twengididi mu masuwa ku Trowasi twendidi kaka tii ku Samotrasi mu kukhia twaya kutula ku Neapolisi. ¹² Katuka henahana twendidi ku fidipa vidi dimoshi dia Masedwani diakhedi vidi dia lukumu mu ma vidi moshu mayadidi akwa Loma twakhedi hohu ka ndambu yilumbu. ¹³ Kilumbu kia Lumingu twa wudikidi twaya ku khulu ya meya kwakhedi ni homa ha kusambila Nzambi. Twashikimi hohu ni ku longa ndaka ya Nzambi kudi akhetu akhedi awongama. ¹⁴ Mukhetu mumoshi jina diendji Lidi musumbishi a miledi yibenga ku vidi dia tiyatire wa sambilanga Nzambi hengi wakhedi ku twivwa. Fumu wanzuludidi mutshima wendji aswakadi kulaba pimbu mambu makulanga Polu. ¹⁵ Kiela a mu botika ni nzu yendji yoshu wa tulombidi etshi Yivwa nwa mona etshi niekhina mukhidisitu yizenu kundjiemi nu jingidingi kwenoku. Washidi kingolongolu tii wa tu nunga. ¹⁶ Kilumbu kimoshi ki twa khedi kwenda ku nzu ya yisambu ndumba wa mukhetu mumoshi wakhedi ni pevi ya kuta ngombu wejidi kuwaningina nietu. ¹⁷ Wakhedi kuta fwalanga jingi kikuma kia a fumu jiendji. Mukhetu mweni walabanga Polu ni etu ni kungangumuka ni kwakula etshi Athu awa edi asadi jia Nzambi wudi ku wulu. Enda atulonga ndjila yi twa lunga kuhulukila. ¹⁸ Wa hanganga kienekina yilumbu lawu. Kashi Polu wevidi khabu walumuka wa nganina pevi etshi Nia kulomba mu jina dia Yesu etshi wudika mudi mweni. Mu mbala yimoshi ya wudikidi. ¹⁹ Tangwa a fumu jiendji amweni etshi kwenda kushila mutshima kwahwa anwanisa Polu ni Silasi a wasenda ku zandu ku mesu ma akwa Leta. ²⁰ Kiela awa tudisa ku mokhu ma Zuji akula etshi Athu awa edi Ayuda enda ashia kisakasaka ha katshi ka Vidi dietu. ²¹ Eni enda alonga mambu mabola ma twenda kuleka kuhanga ni kulaba etu akwa Loma. ²² Hundji diathu dia lawukila Polu ni Silasi A Zuji abhaka miledi miowu a hana ndjila a wa budi ji fimbu. ²³ Kiela a ma ku wa bula a womba mu boloku. A lomba kudi athu enda kutala boloku mu ku wa talanga. ²⁴ Kiela aleza athu enda kutala boloku kienekina eni a womba mu kashio a ma kuwa kasa miendu ni mabaya majima. ²⁵ Mu katshi ka pipa Polu ni Silasi akhedi kusambila ni kuyimbila Nzambi athu ekha akhedi nawu mu boloku awa hwidikilanga. ²⁶ Mu mbala yi moshi mavu manikinini yibaka ya boloku yabwa yishu yanzuluka miyololu ya kashidi athu akhedi mu boloku ya mana kubetuka. ²⁷ Muthu wakhedi kutala boloku watokimini ku tulu wa mona yishu ya boloku wululu wa nonini poku yendji ya mwela wakhedi kuzola kudikudika kikuma wabandjidi etshi athu oshu mu boloku atshinini. ²⁸ Kashi Polu wakudidi mu ndaka ya ngolu etshi Wudi hanga oku kubola kikuma etu oshu tudi mumu. ²⁹ Muthu wa talanga boloku wa lombidi mwinda wengididi fishia fishi ni kutekita ni woma woshu wabwa mu miendu mia Polu ni Silasi. ³⁰ Wa wa wudishidi handji wakula etshi A Fumu ekhi nia lunga kuhanga mu kuhuluka. ³¹ Eni a mu lejidi etshi Kwikila Fumu Yesu wu ku huluka ayi mweni ni nzu yeyi. ³² A mu longidi ndaka ya Fumu ni athu oshu akhedi munzu yendji. ³³ He muthu wakhedi kutala boloku wa wanonini kaka mu tangwa mwenedina dia pipa wovwa yitu yowu mu mbala yimoshi eni a mu botika ni nzu yendji. ³⁴ Wasendidi Poli ni Silasi kunzu yendji wa wahwa luku. Wevidi kieshi pilaloni ni nzu yendji yoshu kikuma eni oshu a kwikididi kudi Nzambi. ³⁵ Tangwa dia khiedi kuma a zuji a tumisini ndaka kudi athu a talanga boloku etshi Tusulenu athu mwenawana endi. ³⁶ Muthu watalanga boloku waleza Polu ndaka mwenejina etshi A zuji athumisa ndaka ni tusudi nwendi kikimweni wudikenu nwendi ni shipidi dioshu. ³⁷ Kashi Polu wa waleza etshi atubudidi mu mesu ma athu oshu tudi akwa Loma twa hangidiku ata kima kia bola. Atushidi mu boloku kikimweni enda atuhudisa mu kitsweki. Loni yishiku kienekina eji kutuwudisa owu mweni. ³⁸ Athu akhedi kutala boloku alejidi a zuji ndaka mwenejina jia wahwa woma kievidi etshi Polu ni Silasi akhedi akwa Loma. ³⁹ A zuji ejidi kuwa bondila kiela a wa wudisa mu boloku aleza Polu ni Silasi mu ku katuka a vidi. ⁴⁰ He Polu ni Silasi a wudikidi mu boloku aya kunzia Lidi. Kiela Polu ni Silasi amona a pangi jiowu a wahwa kikesa kumanima a katuka havidi mwenedina.