¹ Mu tangwa mwenedina Fumu Herode wa kwatidi kiatshi kia athu mu katshi ka dibundu mu ku wa mwesa pashi. Wa jihidi Jaki pangi a Yowani ni poku ya mwela. ² Kia mweni etshi ma hwedi Ayuda kieshi wa kwatidi epi Petulu kiakhedi kilumbu kia lumingu. ³ Kiela wa mu kwata wa mushia mu boloku wa tuma ndonga jia asuta ji wana koshu ndonga mu ku mu langidilanga. ⁴ Wakhedi ni ngindu ya ku mu sambisa ku mesu ma athu kumanima ma Pâki. ⁵ Petulu wakhedi a mu sweka mu boloku kashi dibundu dia dihanini ngolu mu ku mu lombila Nzambi. ⁶ Kilumbu kia sadidi kimoshi etshi Herode a mu sambishi Petulu wa langididi akatshi ka asuta mbadi wa kukasa miyololu miadi ni asuta akhedi ki kishu ni ku talanga boloku. ⁷ Kadi kasatu wandjio mu moshi wa Fumu weza ku mu wudikila kieji kimoshi kia kienzula boloku. Wa bula Petulu mu mbamvu wa mu tokimisa mweni etshi Zanguluka tswalu. He miyololu ku mokhu yabwa. ⁸ Wandjio wa mu leza etshi Vwata miledi ni yidiatudi yeyi. Petulu wa vwatidi. Wandjio etshi Vwata kazaku keyi wu ngu labi. ⁹ Petulu wa labidi wandjio wa wudika. Ka khediku kwijiya etshi yoshu yakhedi kuhanga wandjio yakhedi ya makiedika. Mweni wa banjidi etshi ya khedi ndoji. ¹⁰ Kiedidi a hita asuta athethi ni asuta akiadi atula ha kishu kia yibende kia kwendila ku katshi ka vidi. Kia dianzulukila okimweni. Mweni wa wudika wa kulumuka mu balabala dimoshi wandjio washisa Petulu. ¹¹ Kiela Petulu wa dijiya wakula etshi Nia mona kamu etshi Nzambi wa tumisanga wandjio wendji wezanga ku ngu katula ku mokhu ma Herode ni Ayuda akhedi a ngu makinina. ¹² Kiela wa bakisa kienekina waya kunjia Madiya mama ya Yowani wahwedi jina dia Malaku kwa wongimini athu lawu akhedi kusambila. ¹³ Kiela wa kokuta ku kishu musadi mumoshi wa mukhetu jina diendji Rode weza kwanzulula. ¹⁴ Kievidi ndaka ya Petulu wevwa kamu sangu sangu wa jimbangana mu kwanzulula kianzuluku waya fishi ku wa leza etshi Petulu oyuna wudi ha kishu. ¹⁵ Eni a muleza etshi Ayi wudi ni laji. Kashi mweni kaka etshi ma kiedika. Eni akula etshi Yidi wandjio wendji. ¹⁶ Petulu wakhedi kaka kukokuta tangwa dianzuludidi kianzuluku a mu mona a yandjika kuyituka. ¹⁷ Petula wa zangulusa khoku diendji mu pila etshi a dibati wa wa tela kiehi Fumu a mu wudisa mu boloku. Mweni etshi Ndenu nu lombuludi mambu ama kudi Jaki ni a pangi oshu. kumanima wa katuka waya kuma kwekha. ¹⁸ Tangwa dia khiedi kuma kisakasaka kiengila mu katshi ka asuta mu mambu ma bwididi Petulu. ¹⁹ Kumanima kiela Herode wa mu henga ku mu mona lo wehula asuta akedi ku mu tala wa hana ndjila a wa jihi. He Mweni wa kulumuka ku zude ni ku Sezare mu kukhala kwenokuna. ²⁰ Herode wakhedi ni khabu jingi kudi akwa Tire ni akwa Sidoni. Eni sohu ejidi mu kimvuka kudi mweni. A lombidi Balasata mulopu wa fumu mu ku wa sadisa. Kumanima eni alombidi ngemba kikuma thothu yowu ya khedi kunona yima ya kudia ku thothu ya fumu. ²¹ Kilumbu kimoshi kia zengidi Herode wa vwatidi miledi ya watha wa shikama muyombu wendji wa yandjika kwakula. ²² Athu a yandjika ku nganguka etshi Yidi ndaka ya nzambi mu moshi keshiku ya muthu. ²³ Mu mbnala yimoshi Wandjio mumoshi wa Fumu wa mu bula kikuma ka hwediku Nzambi lukumu. Wabwidi mavunia wafwa. ²⁴ Kashi ndaka ya Nzambi ya mwanginini a khidishitu ekhinini lawu. ²⁵ Barnashi ni Sawudi a manishini kisalu kiowu ku Yeluselemi. Mu kuvutuka kowu endidi ni Yowani wa tambikanga etshi Malaku.