¹ Tangwa edi nienda nia sonika kudi enu a pangi jiemi a nienda kuzola mukanda wa kiadi muku nuleza nu kanguki mu mabanza nuleki kulangala tulu. ² Nu zimbanganoku malongi ma nulongidi ambikudi tangwa dia thama bambukenu tshiku ya nuhwedi athumwa mu zina dia fumu Yesu muhulushi wetu. ³ Nu feti kwijika theti etshi mu yilumbu yikwiza kumesu athu lawu akawudika akabula kunuseya ni kuzinga pila yidi nzala yowu. ⁴ Akabula kwakula etshi Yesu washishidi kilaji kia kwisa epi kuvutuka mwehi mweni kia atata jetu a fwa kadi thama kashi mosu medi kaka kitezu kimosi yanjika koku kwa hangidi Nzambi tshiku tii lelwedi. ⁵ Ivwa enda akula kienekina ajimbangana etshi Nzambi wa hangidi yima yanjika thama kaka ni ndaka yenji wulu ni mavu ma wudikidi mu meya wahudishidi mavu mu meya wa hangidi mavu ni meya. ⁶ Kieni kioki nuku monanga etshi mu tangu dia thama Nzambi wajiyidi athu osu ni meya amana mazadidi tshi yosu. ⁷ Mambu mosu ama makula Nzambi masweka wulu ni mavu kikuma waka yosha kimakulu ni thuya mu kilumbu kiaka sambisa ni kujiya athu abola. ⁸ A pangi jiemi a luzolu nufeti kwijiya etshi kudi Nzambi kilumbu kimoshi kidi mudi funda yimoshi funda yimoshi mudi kilumbu kimoshi. ⁹ Athu engi enda abanza etshi fumu Nzambi wasukinina mu kulungisa lushilu lwenji loni wenda athu osu abaludi mitshima kikuma mweni kakuzolanga oku muthu mumoshi abidi. ¹⁰ Kashi kilumbu kia keza fumu kia ka khala mudi kilumbu kienda kwiza mweji. Wulu dia kakhaloku tangwa dia kabila mayema maka khala kamu mengi yima yosu ya kahia thuya mavu ni yima yosu yaka beba. ¹¹ Ivwa yima yosu ya kafwa mutshindu wenowuna ekia enu kia yikalulu nufeti kukhala nayi. Nufeti kukhala ni yifu ya athu avedila. ¹² Tangwa nukuma kininanga kilumbu kia Nzambi nufeti kukasa mutshima nufeti kukhala ni yifu ya waha kilumbu mwenekina wulu dia kahia thuya yima yosu ya khekina ya lembwa. ¹³ Kashi twenda twa makinina wulu dia pa ni mavu mapa pila ya tulakidi Nzambi. Kwenikoku masonga makayala. ¹⁴ Kieni kioki apangi aluzolu tangwa tukumakininanga kilumbu mwenwkina shiangenu ngolu mu kujinga mu ngemba ni Nzambi jinga enu mudi athu nwa kobda kifu kiabola kumesu menji. ¹⁵ Ejikenu etshi kukasa kwa mutshima kwa fumu kudi mudi njila kudi enu mu kuhuluka pila pangi etu Polu utwenda kuzola hengi athu sonikinini mu mayela ma nuhwedi Nzambi. ¹⁶ Polu wenda watu leza mambu menama mu ikanda yenji yosu ya nusonikina. mambu mekha mu mikanda yenji medi pashi muku mabakisa kieni kioki athu ekha enda kukonda kujika mambu enda kuleka kukasa mitshima enda kwalumuna mambu pila yekha mambu ma Nzambi enda ha dihengila lufwa lwohu mweni. ¹⁷ Kieni kioki apangi ziemi a luzolu mudi kinwejiya kadi mambu ama kebenu ivwa loni athu abola akunu bendumuna mu kunusenda mu nzila jiowu zia bola ti ohu nwa kakonda ngolu mu lukwikilu. ¹⁸ Kashi shangenu ngolu zingi mu kukula ni kujinga mu disu dia mboti dia fumu Yesu Khidishitu nushi ngolu mu kumuhenga. lukumu lukhadi kudi mweni yanjika kikimweni ti mvula ni mvula amen.