parfait-ayanou-pnq_jud_text

Jon-nyun 1

¹ Mɛ Judé, Yezu Krissa walibi , ni Zaki nyibi ni bébi so vari so a na na, a pa léma k'a komo laa ma-ɲumɔ Vamara yan , Yezu Krissa ni yʋrʋgi leema. ² VA gânri magɔsʋ-jwan ni hèrè na ni ma-ɲuma pân ɛ na yan. ³ Apa lema ɲuma-mɛ na , mɛ y'o yan a da ma lakala yilé so vari so y'a na San ɛ mun nyun-zeri ma la yiléna , mɛ câna a gûn so wa a kʋrʋg'ana bɛlɛbiyo yilé a mun jʋgʋ a cîri-wéri a sa lanaya la bɛn le ko'o niɲɔn lanacâla na bissatén-kwélé. ⁴ La gɔssa dariya zwan'ana sɛrɛn léma ɲé-piyan jɔn k'o gʋn o ya jɛɛra, léma ye dala o na ba , na lamissi Vamara maa la na do da sam-cén na n'ana ni nyémi na pa nyiné ɛ cî Yezu Krissa ba. ⁵ Bissasso, o nyun mɛ na a c'ana hacîri, Hali n'a nyinu wan, ni ɛ nyun-cî la seya zé so zama so nyûn ezipiti, na dapôn , léma ye dala o na ba o pïy nariya nyétan. ⁶ Nani mɛlɛkɛ léma ye zangali a zangala-nɔn n'ana jina nɔn ma, Vamara cé nariya baa kôru wôn , tâan bino la wôn, ana jà lʋrʋ le wôn ni ka busûré mʋrʋ la wura ba. ⁷ O yé'n dama sodɔm ni gomɔrʋ na la, n'ana ɲésan zéré ya, léma jûn a sa biran dama soriya, da-sam-koo kʋsé la ni a sa bɛlɛ-yilé Maya la wôn, ana paa yé'n dama laya léma k'o bɔrɔ pïmɛn na, ni pɨsâan-mʋrʋ la yiléna. ⁸ Na laya la saa da magɔsuya ana saa Sân jɔssaya la wôn, ana gɔra pân-lō nyun ma ,na dé jɔn kʋsé na pʋgʋmi von layilé-lʋrɔya la. ⁹ Mɛlɛkɛ-mʋrʋ, Misɛli ni suntani ni céri nyuncʋrʋ Moyizi cɔ la bɛn léwéré, na pén-pémi da ɲé, na missé ye cʋssa da , o nyamu lé, na'a ké: " É nyʋcî la sé nyɛni n'yilé" ¹⁰ Na laya là ma nyiné cʋssa le tâan ba, ana de na, ana ye dama biyan hacîri ténbélencâ, naa nyɛn'ana mun kwiin na. ¹¹ A na nyini da ni bɔnɛ na ! maleyilena ana tʋra caïn ba-niya, naa-c'ana légéri la wôn péela-yilena dama balamʋ, a na nyini nyɛna nyûn-kɔɔli la wôn dama ni Koré. ¹² A na pa'a ye yaraa na , zama sɛrɛn jiri-jiri wéré la. À na déré-cî ba, yil'ana pôla va, a na ye dama wulabʋrʋ kuu, wânmi na ni tʋrʋ n'o kwir'n'o na, à na ye dama duruya lema céré bɨ ba, ana lôri là gʋssi a guru-tan a cʋ. ¹³ À na ye dama taami min'a, mini-bʋlʋ la ni jugi lesiri la, à na ni d'a sa cî ma-yala, ana ye dama kan-seri ya lema jina tân-tén nɔn ma, naa cé a na jé tamu tân-bino la ni karibini na wôn lé'n wura. ¹⁴ Enɔki leké Adama bobiyo la lepi-jéré, na mun nyama so laya so cʋnma, ni wo: A sùmété ! E nyun-cî la jé ko ni laa câna la na jân-jânni. ¹⁵ Ana jé magɔsʋ daricâ la ni lana-bɛlɛcâ la buusu à na dari wali gɔsʋya la n'a na jina-ko gɔsʋya nani ana jɔn-dariko kùsé yala lakala na. ¹⁶ A na pa'a bɛlɛ k'o nyɛnɔ , n'a gûngûnni n'a sùsùri lé'n wéré, ana ni kwïri ana saa bɛlɛyilé-yiya yan, ana ni gânr'a sa nyun, na bisiri laya la ɲé, yil'ana na yi. ¹⁷ Wân, mɛ nyibi-câna, cé n'hacîri tônbiyo la nyamu ɛ nyun-cî Yezu Krissa Jɔn lema la ko; Ni wo. ¹⁸ " Ni dunyɛn zwa wéré la ni daba , see-nyamacâ la jé ko' a saa nyamu n'a d'a sa bɛlɛyilé-maya la . ¹⁹ " Nariya ni kwé'ni la ta-cîra la na, à na d'a sa hacîriwôn maya la mini yan, Vamara hacîri t'ana yan ma. ²⁰ A pa ma, lema ma- ɲun mɛ na , n'à saa lanaya la n'a saa vazira la ni gânr'a o wani cîla na, hacîri câna pân la wôn. ²¹ A jé tamu Vamara see nyini ma-ɲuma la wôn, a bani ɛ cî Yezu Krissa nyini magɔsʋ-zwan la, nani jɔmɔn gémissi le zoré ba la yilena. ²² A nyiné siga-sigacâla zɛmi zun'ana wôn. ²³ A da-cîné, a tʋr'ana a biri pïsâan la wôn; A bir'a-ɲé laa tɔma la n'ana sân-dura wʋrʋya la lakala san, lema k'a bino ana jina-ko gɔsʋ la wôn. ²⁴ Bissaso, lo lé gʋlʋ o paari magɔsʋya la ɲé o bir'ana bɛn, à jin'a bã bɛn bɛn-yuma-mʋrʋ wôn, f'o se kôri-weré mʋrʋ wùra là yi. ²⁵ Tanduni, mawali, nɔrɔ nani sée-cîri yà yi Vamara bitén ni ɛ nyun-cî n'ɛ bira-cî la san, bélé ni bélé ya wôn. Amina.