¹ Mu yene muthu yagasue, udi nayo gutumaga egi muthu nu muthu atumage gudi fumu, ndaga gushigo nu ufumu udi muza gudi Nzambi, nu wago udi luenyelu wa agasue gudi Nzambi. ² Mukunda nu ngenyi, ayo ashigo mutumaga adi mutuna ufumu wa Nzambi nu ago adi mutuna mba alumbuluishiwa gudi Nzambi ene hakhawo. ³ Ndaga ya mafumu ashigo hene mukunda nu guhana malamba, uvi adi guene mukunda nu ndaga jia bonga. Uvi mukunda nu ndaga jiabola, mushigo mutshigina gukhala athu adi muvua woma gudi mafumu? Tshitenu muabonga mba mushimanewe. ⁴ Ndaga, adi atshitshi a mudimo wa Nzambi mukunda nu gubonga guenu uvi gula mudi mutshita gubola khadienu nu woma, ndaga ya ishigo githuhu adi nu jingolo jia guhana malamba. ⁵ Hene, mushigo nayo ha gutumaga ndo sha mukunda nu lamba, uvi mukunda nu matangi a mukatshi dia'athi, mukunda nu ngenyi, futshienu nji gitadi. ⁶ Idi mukunda nu ngenyi, muana futa nji gitadi ndaga ya mafumu adi atshitshi a mudimo wa Nzambi, adi muhatesa ndaga jinyi masugu agasue. ⁷ Hanenu gudi muthu yagasue, imudi nayo gumuhana, gitadi gudi yago mudi nayo guhana, nu ginemua gudi yago yo mudi nayo guhana ⁸ Mukhadigo nu mukudi gudi muthu, khuta gudizumba enue-enue, ndaga yago udi muzumba muko, wataganesa mukhuala. ⁹ Ndaga ya, ushi nayo gutshita uthambi, mba ushiyigo muthu, gukuya ndo, mba uminyigo mate gu gima gia ngane ( inyi yagasue ya sala, idi gudibungisa gu matangi angoshi.). Mba uzumba mukuenu gifua mu wadizumba aye hakhaye. ¹⁰ Guzumba guana manesa ndo phangi'enji, hene mukunda nu ngenyi guzumba gudi gutaganesewa gua mikhuala yagasue. ¹¹ Mukunda nu ngenyi, mudi mujiya kumbi egi dia tagana gale ha enue guzuga gu tulo. Ndaga ya luenyelu guhuluga guetu gudi diago hehi, ya gubalega kumbi di tua tshiginyine. ¹² Phipha idi muya nu guhua, gosa gudi gale mukia. Tukatudienu midimi ya phipha nu tusudigienu mata a muanya. ¹³ Tuwendenu gifua idi mu lombela guwenda mu muanya, uvi guwenda ndo mu ndaga jiabola nga mu gukuatewa matombe nga mu uthambi, nga mu matangi ashigo ha nduedi, nga mu ndaga jia gulua, nga mu giphi. ¹⁴ Uvi sudigenu Fumu Yesu-klisto , nu mutangiza go mila nu iheho yanji.