¹ An'etu gutshigina gua mutshima wami nu gulomba guami gudi Nzambi mukunda nu ene, gudi egi, ahuluishiwe. ² Ndaga ya ngudi mu londolola gu ndaga yawo egi adi nu gazango-zango mu ndaga ya Nzambi uvi ishigo mu ndunge. ³ Ashigo mujiya giamatshidia gia Nzambi, ha gulola guhaga giamatshidia giawo. Atumagelego gu giamatshidia gia Nzambi ⁴ Klisto udi gutagenesewa gua mikhuala mukunda nu gubingishiwa gua muthu yagasue udi nu gutshigina. ⁵ Mu yene, Mose wa sonegele ha ndaga ya giamatshidia gidi muza mu mukhuala egi :" Yago udi mutshitshila giamatshidia gia mikhuala, mba ukhala nu monyo mu giamatshidia giene." ⁶ Uvi, giamatshidia gidi muza mu gutshigina gidi muzuela egi: " Guzuela mu mutshima waye egi, nanyi mba ukanduga mi dilu? ( ngenyi idi mubulumuisa klisto.). ⁷ Nu guzuela ndo egi: " Nanyi mba ubulumuga mu mabengi a gufua? ( ngenyi nji idi mu fuzumuisa Klisto gu gufua.). ⁸ Uvi itshi idi muzuelewa? Mbimbi idi hehi nu enue; mu kano guaye nu mu mutshiima waye. Yene inyi idi mbimbi ya gitshigina tuana longesa. ⁹ Ndaga ya gula wazuela nu kano guaye egi Yesu udi Fumu nu gula watshigina mu mutshima waye egi Nzambi wa muzugishile mukatshi dia'athu agufua, mba uhuluishiwa. ¹⁰ Ndaga ya, idi mu mutshima muthu gana tshigina mukunda nu giamatshidia nu idi mu kano muthu gana longesa mukunda nu guhuluga. ¹¹ Ndaga ya idi ya gusonegewa egi: " Muthu yagasue udi nu gutshigina gudi muene, mba gafishiwa ndo sonyi. ¹² Gushigo nu gudiyila mukatshi dia muenya Yuda nu muenya Gelega. Fumu muene mungoshi muene udi Fumu mukunda nu athu agasue nu udi mumonyi gudi athu agasue adi gumutamega. ¹³ Ndaga ya muthu yagasue watamega jina dia Fumu mba uhuluishiwa. ¹⁴ Luholo tshi ajiya gumutamega, muene yago adile gutshigina ndo ? Nu luholo tshi mba atshigina gudi, muene yago avilego muzuela? Nu luholo tshi ajiya gumuvua gula gushi muthu udi mulongesa? ¹⁵ Nu luholo tshi ajiya gulongesa mbimbi ya Nzambi gula atumiwego? Idi ya gusonega egi: " Adi abonga, malu a'athu adi mulongesa lukuma lua bonga." ¹⁶ Uvi khungi yawo yagasue avilego lukuma luabonga. Ndaga Izaya udi muzuela egi: " Fumu, nanyi watshiginyile gu mbimbi yetu?". ¹⁷ Luenyelu gutshigina gudi muza mu yago itudi muvua, yene itudi muvua gu mbimbi ya klisto ¹⁸ Uvi ngudi muzuela egi: << Avilego ba ? >> Ayi idi ngenyi sha, a ivile ! << Majui awo aviwe ha mavu amudidi nu mbimbi yawo ya ile unu gu gisugishilo gia mavu.>> ¹⁹ Mu holu dia yene, ngudi muzuela egi: << Isalele gajiyilego ba ? >> Gudiangela, Mose udi muzuela egi mba nguvumbumuna giphi gienu mu yago idi ishigo gifutshi. Mba nguzola khabu jienu holu dia ifutshi idi ishigo nu ndunge.>> ²⁰ Nu Izaya udi makhaso nu udi muzuela egi: << Nga nonewe gudi ago adile gu ngukamba ndo. Ngadijijigile gudi ago adile gu ngutamega ndo.>> ²¹ Uvi mukunda nu Isalele wazuelele egi: << Nga kangudile mago ami lusugu lua mudidi gu khanda ya athu ashaga.>>