¹ Anedu aluzolu,lu Nzambi nufana gugieba mwila wenu,mu mwila mowu wena mwila u Nzambi. ² Anu lo nufana guwu sadila mu luzolu lu gifudji,anu nufana gudisoba mu gudidwadi mu gusoba manunga menu,mu gio anu munu gesiya mununga ma Nzambi. ³ Ye ami iba guhosa,mu ngolu ziga pedi Nzambi,lo gwena ye mudu mu gadji dienu ufana gudigadula mu nfunu yo yi Nzambi mu mpila yo yena,ha mu mpila yi ndungi,giena mu dela di lugwigilu alo luga muwedi Nzambi. ⁴ Mu mwila gwena gifa gimosi,adu dwena ye ilamu yingi mu mwila umosi,ye kega ilamu yo yikima lo yena ye gisalu gi mpila yi mosi, ⁵ Gifa gimosi adu,dwena engi,duba gusala mwila umosi mu mbuga yi Klistu,ye hoshi mudu ena gilamu gi mugwedu. ⁶ Adu dwena ye magabu mengi mu ngolu zi gaduwedi Nzambi,mbi gwena ye mudu wena ye kabu di gubigula yeyi ufana gudisala mu mpila yi lugwigilu lwenzi. ⁷ Mbi gwena ye mudu wena ye kabu di gusadisa wega mbi yeyi asadisi.Mbi mudu mwega ena ye gisalu gi gulonga,wega mbi yeyi alongi. ⁸ Mbi mwega wena ye gisalu gi gikesa,wega mbi yeyi akadi gikesa,mbi gwena ye mudu wena ye gabu di gaba,wega mbi yeyi agabi.Mbi gwena ye mudu wena yena ye kabu di gudwadisa wega mbi yeyi adwadisi pimbu.Mbi gwena ye mudu wena ye kabu di kenda,wega mbi yeyi asadidi kenda zienzi mu muzima wenzi. ⁹ Wega mbi luzolu lu Nzambi lo gonzi gukala mu giswegi.Wegenu mabi,dusalenu mapimbu. ¹⁰ Mu yo idadila luzolu lu gipangi,lolu lukadi lu pimbu sila,mu yo idadila luzidu,wega mbi lolu lukadi gwena yenu ye yenu. ¹¹ Adu dukalenu ngolu,dugondenu gukala amolu,dusadi lenu Fumu Yisu mu muzima wedu ukima u gagidi. ¹² Dukalenu mu kiesi mu mapanzi makima madu bagusila muzima,dugandenu muzima mu minianga miedu.Dusambenu Nzambi mpungu mu dangu dikima. ¹³ Dusadisenu agwigisi ega ena mu minianga,duyambenu anzenzi pimbu mu manzu medu. ¹⁴ Dulombenu gwena Nzambi mpungu mugu sagu muna hadu akima o agu dudadisa pasi,dumu lombenu mbi yeyi asagu muni ha agonzi gwa hosila gubiya. ¹⁵ Anu nukadi mu kiesi ye owo ena mu kiesi,ye dilenu ye owo aba gudila. ¹⁶ Anu nukadi manunga mamosi yenu ye yenu,nugonzi gukala lulendu mu manunga menu,ha anu gumbulenu hadu o ena pwede. ¹⁷ Mbi mudu ugusala gubiya,ayi lo ufana gunginzigisa gubiya,salenu pimbu gwena mudu mukima. ¹⁸ Anu salenu ngolu zingi mu gukala kiesi ye hadu akima. ¹⁹ Anu nugonzi gwifa kabu,wegenu kabu zi Nzambi zi sadi.Mu mwila yoyi iga sonamana mbi:kabu ziena ziami ye,ami iga hana ndola gwena hadu,gihosa Fumu. ²⁰ Ha mbi mbeni wayi ena nzala,ayi ufana gumuwa yima yigudia,mbi yayi ena ya nzala yi mema ayi ufana guwa mema magunwa,mu mwila mbi ayi munu gusala mapanzi magifa gio,ayi wena mugu mudulu dila magala ma twiya awulu mudu wenzi. ²¹ Ayi lo ufana gidiega mbi mabi magu niadji,ha wega mbi ayi uniadji mabi mu gusala mapimbu.