¹ Ami beni ikogiga gigi mbi lo dufana guginzidiga gunwena nu mu mukenda. ² Mu mwila mbi ami inusa mu kenda na ufana gupa mi kiesi,mbi lo yoyo usenzidi kenda mu ngiena mi. ³ Ami isonigidi nga gigo sadidi mu mwila gugonda gukala mu kenda,mu gudula gwami,mu kenda gwena o agenzi gupa mi kiesi,mu gukala gu nwena nu akima minu mbi kiesi giami ye gienu gwena mudu mukima. ⁴ Gwena ye kenda zingi gu muzima ye pasi,ye sanga zingi gu mesu,ami iga nusonigididi,lo mbi mu mwila ami inushi mu kenda,ha mu mpila mbi anu nwisiyi luzolu lwingi lwami gumesu menu. ⁵ Mbi mudu maga kedi mbuga yi kenda,lo gwena mbi ami iga zodidi,gwena anu akima,mbi lo mwa ndambu mu gadji dienu mu mwila mu gugonda guhidjigisa. ⁶ Gulombugila gwena mudu ugifa gio gunioguga gufana gukala mu mwila yeyi gwana hadu engi. ⁷ Mu mpila mbi anu nufana pimbu sila mugu mulolula ye mugu musadisa,mu mpila mbi yeyi agonzi gukala mu kenda zingi. ⁸ Ami iba gunulomba mu gusala mapanzi ma zola gwena yeyi; ⁹ Mu mwila ami miga nusonigididi mu gwisiya ,mu gunusa mu gisalu,mbi anu nwena lemvu mu yima yikima. ¹⁰ Gisi gwena yo unuba gulolula,ami kega miga nulolula;ye gwena yo wiga lolula,mbi ami miga loludidi gima gimoshi,gwena mu mwila nu,gumesu ma Klistu. ¹¹ Mu mwila gugonda gwega tangu gwena Sadani mu guyala mu gadji diedu,mu mwila adu lo dufana gusenda manunga menzi. ¹² Muyo isala,mu dangu diga dudidi gu Toloyasi mu mwila gumwnga musamu u pimbu u Klistu,ata giogio giga nganzulididi Fumu mbelu,manunga mami lo mahulu luganga,mu mwila ami lo idalanga Tite,pangi wami; ¹³ Mu mwila gio,dangu diga gadugidi gwena owu,ami di gedi gu Masedwani. ¹⁴ Madodji mahana mani gwena Nzambi,ayo ugudu bingisanga mu mbuga yi Klistu,ye ayo ugu mwanganga mu ihani ikima gisulu gi gwisiya gwenzi! ¹⁵ Adu dwena mu gio gisulu gipimbu gi Nzambi mu mbuga yi Klistu,mu gadji di o aga bigi samanini ye gwena o agafidi: ¹⁶ Gwena amoshi gisulu gi lufwa,gigu hananga lufwa;gwena ega,gisulu gi luzingu,gigu hananga luzingu.Ye gwena guwa guguga mu mwila mapanzi mo? ¹⁷ Mu mwila adu lo duba guvunga isoni i Nzambi,nga gigu salanga hadu engi;ha gwena mu gagidi ,gwena mu mbuga yi Nzambi,adu duba guhosila Yisu gu mesu ma Nzambi.