¹ Kuna Ikone, Polo ye Balanabasi bakota vakimosi muna nzo a tukutakanu ya bayudayo, bavova mumpila yimosi vo nate mbidi a ndonga ya bayudayo ye bangeleki bakuikila. ² Kansi bayudayo bobo kabakuikila ko, bavana nganzi ye bayivisa mpeve za bapakanu mu bela zimpangi. ³ Kansi bavuanda ntangu ya nda kuna Ikone, bavovela mu vuvu kia wonso, mu ngolo za Mfumu, bavananga bimbangi bia mambu ma n'lemvo ani, ye wabavana luve kidi mu moko mawu mua vangamena masivi ye mangitukulu. ⁴ N'kangu wa Mbanza wavambana mu ndambu zole: Ndambu yantete yakala ku nima ya bayudayo, ndambu yan'kaka kunima ya zintumua. ⁵ Wuwu kina vo bapakanu ye bayudayo, kintuadi ye mfumu zawu, bakala mu nzila mu kubatuba matadi, ⁶ kiokio Polo ye Balanabasi bawa n'samu wowo, bayenda suamina kuna Mbanza ya Likaonia, kuna Lusitele ye kuna Delebe, ye muna kinzungidila. ⁷ Ye kuna balongela n'samu a mbote. ⁸ Kuna Lisitele, kuakala vuandanga muntu wakala m'vanguki a malu tuka kawutukila, ye kasala dita nkutu ko. ⁹ Wakala landa mpova za Polo, kiokio katoma kun'tadidila, ye kamona vo wuna ye minu kia niaka, ¹⁰ wavova mu ndinga ya ngolo: " telama nakekete mu malu maku. Vana vawu watelama ye wadiata. ¹¹ Kiokio bamona mawonso Polo kavanga, n'kangu watombola ndinga, ye wavova mu ndinga ya balakaonia: " Binzambi nzambi bina mu nitu a muntu bakulumukini kua beto. ¹² Bakala bokelela Balanabasi Yupitele ye Polo Melekule, kadi yani wakala ye mambu ma Nzambi. ¹³ Banganga za Nzambi ba Yupitele, bobo nzo a Nzambi yakala vana muelo a Mbanza, banata Ngombe za nene za bakala ye min'lele miasonukua vana ndambu a muelo, bawu ye n'kangu bazola kubayokela n'kayilu. ¹⁴ Kiokio Polo ye Balanabasi bawa wo, batiaza n'lele miawu, ye bazawula nate vana kati kua mbidi a bantu, ¹⁵ bakaya: " O bantu , mu kia bila lufuete sadila mpila yoyo? Beto mpe tuna bantu bonso beno; ye tutakulunatina nsangu zambote, tululombele mu yambula mambu momo ma mpamba mpamba, kidi lua bangumuka kua Nzambi a moyo, wavanga zulu, n'toto, m'bu ye biawonso bina mo. ¹⁶ Nzambi yoyo, mu mbandu ziviokele, wayambula zinsi zawonso zalanda zila zayawu kibeni. ¹⁷ Kana wuna kina vo kayambula vana kimbangi kia wuna kena ko, mu vanganga mambote, mu kuluvana zimvula ye nsungi za mbote beni zitukidi ku zulu, mu kuluvana madia mayimngi ye mu zadisa n'tima mieno kua kiese. ¹⁸ Mu mpova zani, walenda sima n'kangu mu kuba yokela n'kayilu. ¹⁹ Na biu bayudayo batuka ku Antiokia ye ku Ikone baluaka ye balenda bangumuna ngidu za n'kangu, ye kunima tuba matadi kua Polo, ban'tunta nate kuna mbazi a Mbanza, kadi babanza vo wafua. ²⁰ Kansi Min'longoki kio ban'zugidila, watelama, ye wakota muna Mbanza. Muna lumbu kia landa wayenda kuna Delebe kintuadi ye Blanabasi. ²¹ Kiokio balongela Mbanza yoyo ye tambula ntalu ya fioti ya min'longoki, bavutuka kuna Lysitele, kuna Ikone ye kuna Antiokia, ²² wakala siamisa balongoki, ye kubalongela vo batatamana muna minu ye kubatela vo yi muna nduanusunu zayingi tufueta kotela muna kimfumu kia Nzambi. ²³ Batula bakuluntu muna konso Bundu, ye kunima kubasambidila ye mina n'soki, babatambika vamoko ma Mfumu, ndondo bakuikila. ²⁴ Balutila kana Pisidi, Baluka kuna Panfili. ²⁵ Balongela mambu ma Nzambi kuna Pelezi, ye bakulumuka kuna Itali. ²⁶ Tuka kuna bayenda kuna Antiokia, kuna batuka kiokio bafilua kua n'lemvo a Nzambi mu salu batukidi sala. ²⁷ Ku nima nduaka awu, bakutikisa Dibundu, ba kamba nsangu mu mawonso Nzambi kasadidi mu bawu, ye weyi kazibudidi muelo wa minu kua zi nsi. ²⁸ Ye bavuanda ntangu ya nda ye min'longoki.