¹ Zintumua ye zimpangi zakala muna Yuda bawa vo bapakanu mpe batambula mambu ma Nzambi. ² Kio Petelo Katomboka ku Yelusalemi, kimvuka kia bawukua kibakala kia m'vovela mu mbele mbele, bavova: ³ " ngeye wabundane ye ba lembi wukua kibakala ye wadidi ye bau." ⁴ Kansi Petelo wayantika ku basasila diambu mu mpila zazo, wa vova: ⁵ " Kio yakala sambila kaka mu mbanza ya Yope ye yamona monameso lekua kia ntezila kiafuanana ye dala dia n'lele dia nene dia kala kulumuka tuka kuzulu mu konko biandi biabi ya. Dia kala kulumuka kua mono. ⁶ Yatadidila dio, ya fimpa dio ye ya mona bibulu bia malu ma ya bia vava n'toto, bibulu bia n'futa, bisielomokanga ye nuni za zulu." ⁷ Wana yawa ndinga yavova: " Telama, Petelo, vonda ye dia!" Yavutula: ⁸ " Ve, Mfumu, kadi kavena nkutu kima kia yivusua yevo kia sumuka kia kota munnua ame ko." ⁹ Kansi ndinga yavova diaka tuka kuzulu: " Kiokio Nzambi Kamuene kia velela, kumoni kio bonso kia sumuka ko." ¹⁰ Diodio dia vangama nkumbu tatu ye bosi biabio biavutuka kuna zulu. ¹¹ Tala, bantu batatu batelama vana n'tuala nzo tua kala, bafilua kua mono kua Sezale. ¹² Mpeve yampana luve mu kuenda yawu kondua kua vanga disuasuanu. Bampangi baba sambanu bayenda yame ye tua kota muna nzo ya muntu yuna. ¹³ Watutela bonso kamuena Mbasi a Nzambi ya telama muna nzo ani ye wan'tela vo: " Tuma bantu kuna Yope ye bokela Simon wu bokeleluanga Petelo. ¹⁴ si kakutela nsangu zikuvuluza ngeye ye nzo aku." ¹⁵ Kiokio yabavuvesa kaka, Mpeve a N'longo yakulumuka mu bawu bonso kua beto muna luyantiku. ¹⁶ Yabambuka moyo mu m'vovo a Mfumu wata: " Yowani wabotika mu maza, kansi beno si luabotukua mu Mpeve a N'longo." ¹⁷ Kiongolo, vo Nzambi wabavana n'kayilu mosi ye beto tuakuikila mu Mfumu Yesu-Klisto, nani yadikala mu tinguna Nzambi? ¹⁸ Kiokio bawa mambu momo, badingalala na pi ye basanisina Nzambi bavova: " Nzambi wavana mpilukulu a madiela kua bapakanu mpasi batambula mpe moyo." ¹⁹ Ikuma, bobo ba muanganesua tuka kuna Yelusamemi mu nzomono yayantikila mu lufua lua Tieni, bayenda na te kuna Fenisi, Sipele ye kuna Antikia. Basamuna mambu ma Nzambi kua bayudayo kaka. ²⁰ Kansi, ban'kaka mu bawu batuka ku Sipele ye ku Sileni bayiza ku Antiokia ye bavova kua bangeleki, baba samunina nsangu za mbote za Mfumu Yesu. ²¹ Koko kua Mfumu kua kala yawu ye bantu bayingi bakuikila ye baviluka kua Mfumu. ²² Nsangu zawu zaluaka nate mu matu ma Dibundu dia Yelusalemi; ye bafila Balanabasi na te kuna Antiokia. ²³ Kiokio kaluaka ye muene n'lemvo a Nzambi, wayangalala ye wabasiamisa mu lunda mbundani ye Mfumu mu n'tima miawu mia m'vimba. ²⁴ Kadi wakala muntu a mbote, wafuluka kua Mpeve a n'longo ye vuvu. Ye Bantu bayingi bakivana kua Mfumu. ²⁵ Balanabasi wayenda kuna Talasi mu sosa Sawuli. ²⁶ Kiokio kan'solola, wannata kuna Antiokia. Mu mvula ya m'vimba, bakutakananga ye Dibundu ye balongelanga bantu ba yingi. Yi kuna Antiokia balongoki babokelelua, munkumbu ya ntente, Baklisto. ²⁷ Mu ntangu yina mim'bikudi mia kulumuka kuna Antiokia tuka ku Yelusalemi. ²⁸ Mosi mubawu wabokeleluanga Agabi, watelama ye wavova mu kimpeve vo nsatu za ngolo si zabua mu nza. Diadi dia luaka mu ntangu ya Kolode. ²⁹ Mudiodio, balongoki batatamana fila, landila mbakulu awu, lusadusu kua zimpangi kuna Yuda. ³⁰ Bavanga wo, bafila mbongo kua bakuluntu mu moko ma Balanabasi ye Sawuli.