¹ Le gaxoxoxɔn mɛ, herodi tsi nyi tetraídi tɔ se enyɔn tsiwo kuȡo Yesu ŋti kudo yo nukunuwo. ² Etonɔn yo nusrɔnviwo be: Amɛtsɛ lɔ Ejan - Batishi yi nyi, efɔn sɔ amɛ kukuwo domɛ. ³ Mikpɔ nutsi ŋti yi Herodi ȡesusu nɛnɛ ȡoȡa: Herodi ȡe Herodiasi tsi nyi fofoɔ Philipu yo srɔn legatimɛ ele agbe. ⁴ Fifiɛ lɔ, Ejan tɔni be:" Nutsiwo o wɔ lɔ tsitre ȡo Mawu yo eseɛ ŋti." Fifiɛ nɛ yasɔ do dzidzɔ nɛ Herodiasi lɔ, Herodi dogbe asi nɛ yo sɔdzawo be wo nɛ le Ejan, yi wo blɛ yi sɔdo gaxɔmɛ. ⁵ Herodi dzibe yawui vɔlɔ evɔn dukɔnlɔ, ȡo dukɔn lɔ dodzesi be Ejan nyi nyɔnuȡɛtɔ tsile nuxo xoɔ so Mawu ŋti. ⁶ Gbeȡeka lɔ, legatsimɛ yo dzigbezan va, Herodiasi viɛ nyɔnuvi ȡu woe le amɛkpekpewo domɛ yi edzɔdzi nɛ Herodi. ⁷ Yi, yifian dzɔgbe be yela nɛ ŋȡekpekpe tsi yi yibiɔ ye. ⁸ Fifiɛ lɔ, Herodiasi viɛ nyɔnuviɛ biɔ enɔlɔ be ŋde ye la biɔ. Enɔlɔ toni be nɛ biɔ Ejan - Baptshi yo ta. Tsi enɔlɔ gblɔɛni vɔlɔ, eto be:" Mi nam Ejan- Baptishi yo eta le agbogblo dzi. ⁹ Efiɔ lɔ tsaka le yo nubiɔbiɔ ŋti, vɔ tsiyi yinyi adzɔgbe yi fian le amowo kpata tsi le nu ȡuwɔ yo ŋkumɛ lɔ, eȡegbe wo wɔɛ. ¹⁰ Yi yiȡo be wo nɛ so ta nɛ Ejan le yo gaxɔmɛ. ¹¹ Ye wo so amɛta ȡo gbogblon lɔ dzi yi wo sɔ na nyɔnuvia. Yi yisɔna enɔlɔ. ¹² Ejan yo nusrɔnviwo wova kɔ ŋtsilan lɔ vayiȡi. Yi yo ŋgbedomɛ lɔ, wo yi toe nɛ Yesu. ¹³ Etsi Yesu se nya tsɛ lɔ, eȡo tɔdzihun mɛ tuta Galileya. Tsi amewo selɔ, wo dzo le wo duamɛ yi kplɔɛdo kudo afɔ le tɔaŋti. ¹⁴ Yesu va wo gbɔ le etɔlɔ ŋti yi kpɔ amɛha gan ȡe. Ekpɔ nublanyui nɔ wo yi yiyɔdɔ nɛ edɔnɔ tsiwo le wodomɛ. ¹⁵ Gatsimɛ anyi tsɔn lɔ, nusrɔnviɛwo va gbɔ yi toni be:" Texoe tsɛ lɔ, zogbedzi yi yinyi, yi ezan tsan tsɔn vɔ. Yiŋti kankan amɛha nɛ woayi eduamɛ nɛ woa teŋ xle nuȡuȡu. ¹⁶ Vɔ Yesu tonɔwo be,"Wo ŋde hian be woayi afiȡe ayi dzi nuȡuȡu o.Mi nawo nuȡuȡu nɛ woa ȡu. ¹⁷ Nusrɔnviawo toni be: Kpɔnɔ kankan amatɔn kudo akpavi amɛve kpoyi le fiɛ nɛ mi. ¹⁸ Yesu to be:"Mi sɔ wo va nuu." ¹⁹ Yi Yesu ȡegbe na amɛha lɔ be nɛ woanɔ anyi ȡo egbe dzi. Yi esɔ kpɔnɔ amatɔn lɔ kudo akpavi ameve lɔ, yi ekpɔ dziŋkusi. Yi yi yra kudo efli kpɔnɔnwo, yi esɔna nusrɔnviawo be woamɛ nɛ amɛha lɔ. ²⁰ Amɛ siamɛ ȡu yi wo ȡɔ xo. Yi wo xotɛ kpɔnɔ kankan tsi kpɔtɔa wɔ kisi woeve. ²¹ Amɛ tsiwo ȡunu wo sun ŋsu kotokun atɔn (5000) tsi wo ŋde hlin nyɔnuwo kudo ȡeviwo. ²² Zeȡeka, etonɛ nusrɔnviawo ȡo tɔdzihun mɛ be nɛ woayi agoȡetɔ lɔ mɛ, le gaxoxo tsimɛ yiŋtɔ la ȡo amɛha ȡoȡa wo axoewo mɛ. ²³ Etsimɛ yi nya amɛha lɔ vɔlɔ, eyi etodzi yiȡeka be nɛ yayi dogbeȡa. Tsiyi woetrɔ ȡolɔ, ele texoe xɔn, yiȡeka. ²⁴ Vɔlɔ yo nusrɔnviawo tɔdzihun le tɔlɔ dodomɛ, aya xo alegbegbe be wo ŋde tinŋ le tɔdzihun lɔ lewɔ. ²⁵ Yo ŋgbedomɛ lɔ, Yesu ȡi le etoa dzi yi woagbɔ le etɔa dzi. Le gatɔn kudo gadin yo ŋdekĩnyɛ mɛ, ezɔn etɔ lɔ dzi yi to tɔdzihun lɔ gbɔ. ²⁶ Tsimɛ nusrɔnviɛwo kpɔ be ele tɔadzi zɔɔ lɔ, wo xɔse be aŋɔnli yɔ, yi wo vɔn yi do axoa. ²⁷ Yesu ȡoŋti nɔnwo ziȡeka be:" Mi dodzi, enyɛ yɔ. Mi ŋgbe vɔn." ²⁸ Piyɛ toni be: Axoetɔ, nɛ woe lɔ, ȡegbe nɛ mazɔn va gbɔwo le etɔa dzi. ²⁹ Yesu toni be: "Va" Yi, Piyɛ tole tɔdzihun lɔ mɛ yi ezɔn etɔ lɔ dzi yi Yesu gbɔ. ³⁰ Vɔlɔ tsi Piyɛ yo susu dzole aya xoxo dzi lɔ, evɔn, yi etɔ xuaxua, yi yido axua to be Yesu, xɔ nuŋ. ³¹ Yesu, Zeȡeka lɔ vlun alɔ ȡoȡa, yi ele Piyɛ, yi to ni be:" Ŋsu tsi ȡo xɔse viȡe, ŋdeŋti o vɔn ȡo, ȡe na ȡatsiwo yi wola yi etɔgɔmɛ? ³² Fifiɛlɔ tsi Yesu kudo Piyɛ woȡo tɔdzihun mɛa aya nɔte xoxo. ³³ Nusrɔnviawo dzeklo nɛ Yesu yi toni be: woe nyi Mawu vilɔ le nyawototomɛ." ³⁴ Tsi wo so etɔlɔ ke lɔ, wo va Genezarɛti yo anyigbandzi. ³⁵ Ametsiwo le texoe xɔnlɔ wo dzesi Yesu, yi wo ȡo amedɔdɔwo ȡoȡa afisiafi le du tsiwo trɔdo wo, yi wo hin amɛtsiwo ledɔwo va ni. ³⁶ Ametsiwo ledɔ wole kuku ȡeɔ ni be yewoa tɛŋ tɔ alɔ yo awu gbalo kpo, yi metsiwo talɔɛ lɔ kpɔ dɔdada.