¹ Amɛȡéo so Judé va kplanu amɛwo bé: " Nɛ ŋȡé sovo sɔ zɔn ȡo Moyizi o séɛ dji o wa, ŋȡa kpɔ hluɛngan o". ² Etsi Pɔlu kudo Barnabas dogo wo yi o djro énu mɛa, wo wa ȡoȡo bé Pɔlu, Barnabas kudo yéwo tɔ ȡéo nɛ yi Jéruzalɛm a vɛ dogo apotriwo kudo amɛ sinsin wo ȡo ényɔn lɔ ŋtsi. ³ Eha vɛ ȡowo yi wo zɔnmɔn to Fénisi ku Samari lé nuxo xoɔ nɔn amɛwo so vodu sunmɔntɔ wo djimɛ trɔtrɔ ŋtsi. Wo do djidjuɛ nɛ amɛ sugbɔ. ⁴ Tsi wo va ȡo Jéruzalɛm, éha, Apotriwo kudo amɛ sinsinwo xɔ wo yi wo kan aséŋ nɔn wo sɔ kuȡo énutsi Mawu wa to wodji. ⁵ Amɛ ȡéo so Farizia tɔ wo mɛ xɔsé yi wo sité nu bé: " Elé vévéȡé bé wa sovo nɔn wo, yi wa zi wo dji bé wo nɛ nɔn Moyizi o séɛ gɔnmɛ". ⁶ Apotriwo kudo amɛ sinsinwo xoxu ȡo du a sɔ butakpɔ ȡo ényɔn lɔ ŋtsi. ⁷ Tsi wo lé énu dɔ̂ɔ so ényɔn lɔ ŋtsia, Piyɛ sité yi to nɔn wo bé: "Nɔnviwo, mi nyan bé so gaȡémɛa Mawu tsan amɛ lé mia ȡomɛ, nɛ to énu nyɛ mɛa maxɔsétɔwo nɛ sé aŋɛn nyuiɛ nɛ wa xɔsé. ⁸ Yi Mawu tsi djisi édjiwoa, ȡu ȡasé nɔn wo, yi na wo gbɔngbɔn kɔkuɛ sigbé létsi i na miɔwo tsan nɛnɛ ⁹ yi ŋȡé do vovo toto miɔwo kudo wo domɛo ȡo ékɔ wo djiwo ŋtsi to xɔsé mɛ. ¹⁰ Fifiɛa, ŋȡé ŋtsi mi lé Mawu tékpɔ ɔ ȡo, yi sɔ agban tsi mia tɔwo kudo miɔŋtɔwo mi ŋȡé tɛŋ dro o wa sɔ lé dadaɔȡo nukplaviɛwo dji ȡo? ¹¹ Boŋa, mi xɔsé bé sigbé wo nɛnɛa, miɔwo tsan mi la kpɔ hluɛnga to Axuétɔ Yésu o amɛnu vévéɛ dji. ¹² Dukɔa ȡoȡa yi lé éto ȡoɔ Barnabas kudo Polo gatsimɛ wo lé nuxo xoɔ so djésido kudo amlimanu tsi Mawu wa lé maxɔsétɔwo domɛ to wo dji. ¹³ Tsi wo xonuxoɔ vɔa, Jaki xɔ nuxo yi nu bé: "Nɔnviwo, mi ȡotoŋ. ¹⁴ Simɔn xonuxo so létsi so gɔnmɛ djédjéa Mawu sɔ ŋkuvi daȡo dukɔnwo dji, yi sɔ édu ȡéka lé wo domɛ tsi dji i sɔ yio nyikɔ daȡo. ¹⁵ Enyɔ̂nudaȡɛtɔwo nuxo wo sɔgbé kui, sigbé létsi wo ŋlui ȡaȡɛ nɛnɛ bé: ¹⁶ Lé énutsɛwo godoa, na trɔva a va tu Davidu o zava gbangban lɔ. Na fuin yi na trɔ tui. ¹⁷ Lé éxɔn mɛa, amɛtsi kpɔtɔwo kudo maxɔsétɔ tsiwo dji yio nyikɔ léwo la dji Axuétɔa, ¹⁸ Axuétɔ tsi wa énu xoxo wo, yi i ȡéwo fia lé mavɔ mɛa yi nu nɛnɛ. ¹⁹ Yiŋtsi, énukpɔkpɔ tsinyɛ yi nyi bé, mi ŋȡé ȡo la tsaka susu nɛ maxɔsétɔ tsi wé trɔ ȡo Mawu ŋtsi o; ²⁰ vɔa mia ŋlɔn woma ȡoȡa wo bé wo ŋgbé xoȡi wo ȡokuiwo kudo énusinsin wo, ²¹ hasi wawa, élan tsi o tro ékɔ na wo kudo éhun o. Ðo xoxa, Moyizi ȡo ²² Apotriwo, éhamɛ mɛgawo kudo éha kéŋkéŋ kpɔɛ bé élanyɔn bé yéwa tsan Jude Barnabas kudo Silas tsi wué nyi amɛgan lé éhalɔ mɛ a sɔ kpé Polo ku Barnabas nɛ yéwa dɔwo ȡoȡa Antiɔshi. ²³ Yi wo ŋlɔn woma ȡo asi nɔnwo bé: "Apotriwo, amɛ sinsinwo kudo wo nɔnviwo ȡoȡa nɔnvi maxɔsétɔ tsi wué lé Antiɔshi, Siri kudo Silisi, mi dogbé nɔn mi! ²⁴ Mí sé bé, amɛȡéwo tsi mí ŋȡé sɔ égbé do asi naowa, djo lé míagbɔ va tsaka susu nɔn mi kudo énu kpakpla ȡéwo. ²⁵ Yiŋtsia édjé bé mía tsan amɛȡéwo sɔ bɔȡo amɛvévé míatɔ Barnabas kudo Polo ŋtsi nɛ mía ȡɔ wo ȡoȡa mi, ²⁶ ȡo amɛtsɛo sɔ wo gbé na ȡo míaxuétɔ Yésu Kristo o nyikɔ ta. ²⁷ Yiŋtsia mí dɔ Jude kudo Sila, wotsan o la nu ényɔnxɔn ȡékɛ ŋmɛ nɔn mi. ²⁸ Ðo ényôn lé miɔwo kudo gbɔngbɔn kɔkɔɛ o ŋmɛ bé ŋȡé djé bé mía sɔ énubu sɔ tsaka susu nɔn mi wu énu tsi lé vévéȡéo: ²⁹ bé mia tsri avɔsasa nɛ énu tatawo, mia ȡé asi lé élan tsi o tu gbɔngbɔn ȡo xo na wo ȡuȡu kudo hasiwawa ŋtsi. Nɛ mi téȡa lé énutsɛwo ŋtsia, éla nyɔn nɛ mi. Mi nɔn anyi nyuiȡé. ³⁰ Etsi wo djo lé wo ha lɔ mɛa, wo djémɔn yi Antiɔshi vɛ dogo amɛgbogboȡé yi sɔ womalɔ na wo. ³¹ Tsi wo hlin woma lɔa, wo kpɔ djidjuɛ so akɔfanamɛ nyɔn lɔ wo ŋtsi. ³² Enyɔ̂nudaȡɛtɔ Jude kudo Sila xonuxo sugbɔ nɔn wo, kpla énu wo, yi gbé do ŋsɛn wo. ³³ Tsi wo wa ŋkéké viȡé lé xɔ̂a, wo ȡo o lé ŋtsi fafamɛ nɛ wa trɔ yi amɛtsiwo ȡowo ȡoȡa gbɔ. ³⁴ Vɔa Sila yɛ kpɔɛ bé ya tsi xɔn. ³⁵ Vɔa Polo kudo Barnabas nɔn Antiɔshi ku nɔnvi buwo, wo fianu amɛwo, yi gbé xo nuxo so Mawu ŋtsi nɔn wo. ³⁶ Lé ŋkéké ȡéo godoa, Polo to nɛ Barnabas bé: "Mía trɔ yi édutsiwo mɛ mí to yi xo Mawu nuxo nɛ amɛwo avɛ kpɔ létsi wo fɔn ȡo. ³⁷ Barnabas dji bé yéwa kplɔ Ejan tsi wo gbé yɔnɔn bé Maki ɛ ȡo yéwo ŋtsi. ³⁸ Vɔa Polo yɛ kpɔɛ bé yéwo ŋȡa kplɔ ȡo ŋtsio. Yɛ tsi trɔ lé yomɛ nɛ yéwo so Panfilia ké, yi ŋȡé kpé ȡo yéwo ŋtsi lé édɔ wawamɛo wa. ³⁹ Enyɔntsɛ hɛn dɔmɛzui va wo domɛ, yi wo lé émɔn vovo. Barnabas kplɔ Maki yi wo djémɔn tuta Shipro. ⁴⁰ Vɔa Polo yɛ tsan Sila bɔȡo yiȡokui ŋtsi yi djémɔn étsimɛ nɔnviɛwo sɔɛ do asi nɛ Mawu o amɛnuvévéa. ⁴¹ Wo to Siri ku Silisi lé ŋsɛn doɔ Mawuhawo.