¹ Eva djɔ bé, lé Ikone Polo kudo Barnabas wo yi Yufuwo gbédoȡaxɔa mɛ, yi wo xonuxo nɛ amɛwo ȡoȡé bé Yufu sugbɔ kudo Grɛkiwo xɔsé. ² Vɔa Yufu tsi wo ŋȡé xɔséowa do agla djédjé susumɛ nɛ vodu sumɔntɔwo yi i na wo sé vévé ȡo wo nɔnvio ŋtsi. ³ Wo nɔn xɔn sɔ na ŋkéké sugbɔ, lé nuxo xoɔ vɔnvɔn ma nɔn mɛ tɔ, lé Mawu o ŋsɛn mɛ, yɛ tsi ȡu ȡasé so yio amɛnuvévé nyɔ ŋtsi gatsimɛ yi i na yi djésido kudo ŋdandonuwo djɔ to Polo kudo Barnabas dji. ⁴ Mama djé éduɔmɛ tɔwo domɛ. Amɛȡéwo lé Yufuwo kpadji yi amɛȡéwo lé apotriwo dji. ⁵ Gatsimɛ yi vodu sumɔntɔwo kudo Yufuwo vɛ tsa éka kudo dumɛ mɛganwo bé yé wa ȡigbɔ Polo ku Barnabas, yé wa xokpé wa, ⁶ o fí tofí nɔn wo xoxo yi wo si yi Likani, Listra, Dɛrba kudo édu tsi wé sɔ wogbɔ wo mɛ. ⁷ Lé xɔ̂a, wo do aŋɛn nyuin. ⁸ Lé Listra duɔ mɛa, ŋsu ȡé tsi anyi nɔ̂nɔ̂, ŋsɛn ŋȡé lé yio afɔwo mɛo, é nyi matakli so djidjimɛ yi ŋȡé zɔn kpɔo. ⁹ E sé Polo o nuxo. Polo lé ŋku ȡo ŋtsi yi i kpɔ bé ŋsuɔ ȡo xɔsé tsi la tɛŋ trɔ yo agbé. ¹⁰ Polo ȡégbé sinsínȡé bé: " Sité ȡo afɔwo o dji" Yi ŋsuɔ sité yi zɔn azɔnlin. ¹¹ Etsi amɛwo kpɔ énutsi Polo waa, wo kɔ égbé yidji yi wo xonuxo ȡo Likona gbémɛ: " Mawuwo sɔ agbétɔ o nɔ̂nɔ̂mɛ yi wo ȡiva miagbɔ. ¹² Wo yɔ Barnabas bé "Yupita" yi wo yɔ Polo yɛ bé "Mɛrkura" ȡo yi nyi amɛtsi lé nuxo xoɔ. ¹³ Zéȡéka, Yupita hũnɔn tsi o hũnkpa lé éduɔ o kéȡoŋtsia sɔ ényinwo kudo éȡonuȡéȡéwo va agbodji, yi yikudo dukɔ̂a dji bé yéwa savɔ. ¹⁴ Vɔa étsi apotriɛwo, Polo kudo Barnabas séa, wo zin awu wotɔwo yi wo ȡébla sidu yi amɛwo domɛ lé axua doɔ ¹⁵ lé nunuɔ bé: " Ŋsuwo, ŋȡé ŋtsi mi lé nɛnɛ waɔ? Amɛ mi nyi sigbé miɔwo ké nɛnɛ. Mí hɛn aŋɛn nyuiȡé va nɛ mi yi mi ȡo la trɔ ékɔ lé énu ma ȡinu xɔnwo godo, a djéŋkɔ Mawu agbéagbé tsi ȡo djiŋkusi kudo anyigban, axu kudo énu tsiwo lé émɛwo kéŋ. ¹⁶ Lé bléma mɛa, é ȡémɔn nɛ dukɔnwo bé wo nɛ zɔn lé woŋtɔ o mɔnwo dji. ¹⁷ Ŋȡé nɔnté ȡasé ȡuȡu so énutsi yiŋtɔ nyiɛ ŋtsio, élé ényui waɔ, gbé na édji lé djadjaɔ yi énukuwo lé wawaɔ, mi lé énu ȡuɔ yi édji miatɔwo ȡɔ kudo djidjɔɛ kpɔkpɔ. ¹⁸ Ðasé ȡuȡu tsɛwo ŋȡé xémɔn nɔn wo bé wo ŋgbé savɔ nɛ Polo kudo Barnabas o. ¹⁹ Yufu ȡéwo so Antiɔshi kudo Ikoni va xonuxo nɛ amɛwo yi wo sé. WO xokpé Polo yi duín to jo lé éduɔ mɛ, yi wo xɔsé bé éku. ²⁰ Vɔa gatsimɛ nukplaviwo va bɔ dui a, é sité yi ȡo éduɔ mɛ. Lé ŋkégbéa, yi kudo Barnabas djo yi Dɛrbe. ²¹ Etsi wo xonuxo so aŋɛn nyuiɛ ŋtsi nɛ amɛwo, yi wo kpɔ énukplavi sugbɔa vɔa, wo trɔ djo yi Listra, Ikona ku Antiɔshi. ²² Wo do ŋsɛn gbɔngbɔn nɛ nukplaviɛwo yi wo biɔ wo bé wo nɛ do vévénu lé xɔsé mɛ. Wo gbé nu nɔn o bé, vévé sésé, anyi djé a fɔn mɛ yi mi la yi ȡo Mawu o fiɔ duɔ mɛ. ²³ Wo tsan amɛ sínsínwo ȡo éha lɔwo kéŋ nu, wo blanu, dogbéȡa yi sɔ wo do alɔmɛ nɛ Axuétɔ tsi dji wo xɔséa. ²⁴ Wo zɔn to Pizidi va kɔȡo Panfili. ²⁵ Wo ȡégbéfan Mawu nyɔn nɛ mɔnwo lé Pɛrgi yi gbé trɔgbɔ va Atali. ²⁶ So xɔ̂a, wo djémɔn yi Antiɔshi, fitsi o sɔ wo do asi nɛ Mawu o amɛnuvévé sɔ kuȡo éȡɔ tsi wo wa ŋtsi. ²⁷ Tsi wo va ȡo Antiɔshia, wo xoxu éhalɔ kéŋkéŋ yi wo ȡogbé nɛ amɛwo so énu tsi Mawu kpéȡo woŋtsi yi o wa, kudo létsi i hun xɔsé gbo nɛ vodu sunmɔn tɔ wo. ²⁸ Wo nɔn xɔn didiȡé kudo nukplaviwo.