¹ Lé Antiɔshi ha mɛa, ényɔ̂nudaȡɛtɔwo kudo énu fiɔtɔwo lé. Barnabas, Siméɔn tsi tɔ Niger, Lukius tsi so Kirɛnu, Manahɛnu tsi nɔndu ku Hérodu tsi nyi Tétrarki lé énunyan xɔxɔ mɛ, Solu tsan. ² Gatsimɛ wo lé énublablamɛ lé Ahuétɔ sumɔ̂nwɔa, Gbɔngbɔn kɔkuɛ nubé: " Mi ȡé Barnabas kudo Solu ȡo vo nuŋ nɛ édɔ dasi tsi ŋ yɔ wo naa". ³ Etsi éha dogbéȡa lé énublabla mɛ vɔa, wo ȡo alɔ éta nɔn wo, yi wo ȡasi lé woŋtsi yi wo djo. ⁴ Exɔ̂a, Barnabas ku Solu sétonu nɛ Gbɔngbɔn Kɔkuɛa yi wo trɔ gbɔ va Séleuki. So xɔ̂a, wo djémɔn yi étɔdomɛ du tsi o yɔnɔn bé Shiproa mɛ. ⁵ Etsi wo vɛ ȡo Salamina, wo xo nuxo so Mawu ŋtsi lé Yufuwo gbédoȡaxɔ wo mɛ. Ejan Maki tsan lé woŋtsi si kpéȡowuítɔ nɛnɛ. ⁶ Etsi wo zɔn tɔdomɛ duɔ mɛ kaka vɛ kɔȡo Pafosua, wo kéȡo madjiki watɔ ȡé ŋtsi, amɛtsi nyi Yufu, nusu nyɔ̂nudaȡɛtɔ tsi o yɔnɔn bé Bar Jésus. ⁷ Tsi tsa éka kudo djiȡula, amɛ nyanu Sergius Polus. Ŋsu tsɛ na yi o yɔ Barnabas kudo Solu va ni ȡo édji la sé Mawu nyɔn. ⁸ Vɔa Elimas " madjiki tɔa" ( ȡo gɔnmɛ sésé tsi lé yio nyinkɔ si nɛ) gbé ényɔn wo tɔ ȡo édji bé ya trɔ kɔ nɛ djiȡula lé xɔsé yomɛ. ⁹ Yi Solu, tsi o gbé yɔnɔn Pɔlua, ȡɔ ku gbɔngbɔn kɔkuɛ, fɔ yio ŋkuviwo ȡo édji ¹⁰ yi nu bé: " Ewo légba o vi, o ȡɔ kudo nusu kudo éfínu wawa, djɔdjuɛ nyinyi o kétɔ, ȡé yi ŋȡa tɔté Ahuétɔ o mɔn wo tɔtrɔ wa?" ¹¹ Fifiɛa, kpɔȡa Mawu o alɔ lé djio yi o la trɔ ŋvanɔn. Ŋȡa gbé kpɔ éwué o kaka sɔ na gaȡémɛ. " Zéȡéka, vivitsi tsɔn Elimas dji; E tɔ fuflu yi tɔ amɛ djidji nɛ wa lé alɔ ni a kplɔɛ. ¹² Etsi djiȡula duɔmɛ tɔ kpɔ énu tsi djɔa, é xɔsé ȡo vɔnvɔn ȡui so énu fiafia tsi waɔ olé kuȡo Ahuétɔ lɔ ŋtsi. ¹³ Polo kudo éhlɔ lɔ wo ku aklo so kaka Pafos va kɔȡo Perge lé Panfili dumɛ. Vɔa Ejan djo lé wogbɔ trɔ yi Yéruzalɛm. ¹⁴ Polo ku éxlɔ lɔ wo zɔn émɔn so kaka Perge va kɔȡo Antiɔshi lé Pisidia. Lé xɔ̂a, wo yi gbédoȡa xɔmɛ lé sabati zangbé yi wo nɔn anyi. ¹⁵ Etsi wo hlin éséɛwo kudo ényɔ̂nudaȡɛtɔwo nyikɔ vɔa, gbédoȡaxɔ o mɛgan xonuxo nɔn wo bé: " Nɔnviwo, nɛ mi ȡo ŋsɛn doamɛ nyɔn ȡé nɛ dukɔ̂a, mi sɔɛ ȡoȡa. ¹⁶ Pɔlu sité, wa djési ku alɔ yi nu bé: " Izraɛli ŋsu wo kudo mi amɛtsi vɔ̂nɔ̂ Mawu o, mi ȡoto! ¹⁷ Izraɛli Mawu tsan mia tɔgbi wo, yi ina o bubu gatsimɛ wo lé Ejipto nyigban dji yi kudo yio alɔ sinsía égbé ȡéo to. ¹⁸ E kpɔ wo dji sɔna éxué amɛka lé zogbédji. ¹⁹ Etsi yi tsrɔn dukɔn ta amadrɛ lé Kana nyigban dji vɔa, é sɔ anyigban tsɛ wo na wo sigbé tsinɔn nɛnɛ. ²⁰ Etsɛ wo keŋ djɔ lé éxué kavé takpo téxué nɛ ku katsi wo domɛ. Egodoa, Mawu na kodjoȡotɔwo kaka va kɔȡo nyɔnuȡaȡɛtɔ Samuɛl dji. ²¹ So éhɔn djia, dukɔ̂a biɔ éfiɔ, yi Mawu sɔ Solu tsi nyi Kis o vi, amɛtsi so Binjamin o kɔtamɛ na wo nɛ ya kplɔ sɔ na éxué amɛka. ²² Eyomɛa, Mawu ȡi djo yi sɔ Davidu bé ya nyi éfiɔ nɔn wo. Davidu ŋtsi Mawu xonuxo so bé: " ŋ kpɔ Davidu, Izayi o vi nɛ ya nyi amɛ sigbé létsi édji nyɛ djro nɛnɛ, yi ya wa ŋȡékpékpi tsi ŋ djro". ²³ So dawué tsɛ o djidjimɛa, Mawu sɔ hluɛngantɔ ȡoȡa Izraɛl, Yésu, sigbé létsi i fian adjɔgbéɛ nɛnɛ. ²⁴ Kéŋgbɔxué ya va, Ejan ȡé gbéfan sɔsɔké o nyɔ̂nyrɔ̂a nɛ Izraɛl dukɔ̂a kéŋ kéŋ. ²⁵ Etsi Ejan wu yio ȡɔ nua, é nu bé: "Mɛȡé ŋmɛ mi bu bé ŋ nyi? Nyɛ ŋȡé nyi amɛ siami na lɔo. Vɔa amɛȡé lé ŋgbédomɛ gbɔnɔn, tsi o fɔkpaka wo nyɛ ŋȡé djé la tuo. ²⁶ Nɔnviwo, Abraxamu o djidjimɛ viwo, kudo miɔwo tsi vɔ̂nɔn Mawu wo, míɔn wo yi o sɔ hluɛngan o gbéfan ȡéȡé tsɛ ȡoȡa. ²⁷ Ðo Yéruzalɛmu tɔwo kudo o kplɔlawo dan Yésu yi wo so éku kodjo ni, wo wanu sigbé létsi ényɔ̂nudaȡɛtɔwo tui yi wo nɔ̂nɔ̂ hinhlíɔ lé sabati sia sabati gbé nɛnɛ. ²⁸ Etsimɛ wo ŋȡé kpɔ agɔdjényɔn adoduiȡé a sɔ so éku kodjo ni tsan o wa, wo biɔ so Pilato gbɔ bé nɛ wui. ²⁹ Wo wa énutsɛ o kéŋkéŋ sɔ zɔn ȡo ényɔn tsiwo o ŋlɔn so éŋtsi daȡɛ, éyomɛa, wo ȡi djo lé atsisoga dji sɔ do yɔdo mɛ. ³⁰ Vɔa Mawu fuín so éku. ³¹ Sɔ na ŋkéké sugbɔa, ézé nɛ amɛtsiwo kplɔɛdo yi Galiléa lé Yéruzalɛm. Amɛtsɛwo trɔzun ȡasé ȡutɔwo lé dukɔ̂a gbɔ. ³² Yi ŋtsia, míɔwo mi hɛn ényɔn nynui tsio adjɔgbé o fian nɛ mía tɔgbiwo va nɛ mi. ³³ Mawu wu étsɛ nu nɛ mí, miɔwo tsi nyi wo vio to Kristo o fɔnfɔn so éku mɛ. Yiŋtsi o ŋlui ȡo élododo o woma évégɔ̂a mɛ bé: " O nyi évi tsinyɛn, égbéa ŋ djio". ³⁴ E fuí so amɛ kuku o domɛ nɛ yio ŋtsilan ŋgbé kpɔ trɔtrɔ ȡéo, yi i lé nunuɔ bé: " Na nami kɔkuɛnyinyi kudo situ Davidu tɔ." ³⁵ Yiŋtsi i gbé nu lé élo dodo bu mɛ bé: " Ŋȡa ȡémɔn bé yéo amɛ kɔkuɛa o ŋtsilan nɛ gbléo ³⁶ Ðo Davidu sumɔn Mawu lé yio gamɛ sɔ zɔnȡo Mawu ŋtɔ o djro dji, é ku, o sɔɛ mlɔn étɔa wo gbɔ, yio ŋtsilan nyinyɔn, ³⁷ vɔa amɛtsi Mawu fɔn so ékua ŋȡé nyinyɔn o. ³⁸ Yiŋtsia nɔnviwo, nɛ nɔn nyânyâmɛ nɛ mi bé, to ŋsu tsɛ dji yi o do nuvuín o sɔsɔké o ŋɛn nɔn mi. ³⁹ To édjia, o so ényɔn djɔdjuɛ to énu o kéŋ mɛ nɛ amɛtsi xɔsé, ényɔn djɔdjuɛ tsi o ȡa tɛŋ so nɔn mi to Moyizi o séɛ djio. ⁴⁰ Yiŋtsia, mi kpɔ nyuiȡé nɛ ényɔ̂nudaȡɛtɔwo o nyɔnwo ŋgbé ȡi mia ŋtsio: ⁴¹ " Mi kpɔȡa, évlo dotɔwo, énũ nɛ ku nɛ mi ȡo ŋ lé édɔ ȡé waɔ lé agbé miatɔ mɛ. Edo ȡé tsi mi ŋȡa xɔséo, nɛ amɛȡé gbé tui nɛ mi tsan. ⁴² Etsi Polo kudo Barnabas wo toa, dukɔ̂a ȡé kuku nɔn wo bé, lé sabati zan tsi la va gbéa, wo nɛ gbé xonuxo nɛ yé o so énu tsɛwo ké ŋtsi. ⁴³ Lé bɔbɔa o kpakpa mɛ lé gbédoȡaxɔa mɛa, Yudatɔwo kudo vodu sunmɔ̂tɔwo zɔn ku Polo ku Barnabas tsi woé lé nuxo xoɔ nɔn wo, lé ŋsɛn do woɔ bé wo nin lé ȡo Mawu o amɛnuvévéɛ ŋtsi. ⁴⁴ Lé sabati zan tsi va vaa gbéa, dukɔ̂a mɛ tɔ sugbɔ va bɔ a tɛŋ sé Axuétɔ o nyɔn. ⁴⁵ Etsimɛ Yufuwo kpɔ égbɔ susu amɛwo tɔa, wo huanŋ yi wo djé agla ȡo Polo o nyɔ̂nunuwo ŋtsi yi wo tɔɛ zunzun. ⁴⁶ Vɔa Polo kudo Barnabas xonuxo ku kankan ȡodji lé nunuɔ bé: " Djéŋkɔa, élé vévéȡé bé wa xonuxo nɛ mi so Mawu o nyɔn ŋtsi. Ðo élé bé mi gbé ényɔa, yi mi kpɔɛ bé ŋȡé djé nɛ agbé mavɔo, yiŋtsia, mí trɔ djo yi maxɔsétɔwo gbɔ. ⁴⁷ Ðo nɛnɛ yi Axuétɔ nu nɔn mi étsi mɛ yi nu lé bé: " Ŋ ȡoo, nɛ na nyi kinklin nɛ maxɔsétɔwo, nɛ na sɔ hluɛngan yi na anyigban wo mama o kéŋkéŋ". ⁴⁸ Etsi maxɔsétɔwo sé ényɔn tsɛa, édji djɔ wo yi wo sɔ kafu kafu na Axuétɔ o nyɔn. Yi amɛtsi wo ŋtsi o ȡo énu daȡɛ nɛ agbé mavɔa wo xɔsé. ⁴⁹ Axuétɔ o nyɔn kankan ȡo dukɔ̂a kéŋ kéŋ mɛ. ⁵⁰ Vɔa Yudatɔwo do adjré nyɔnu tsiwo ȡo sisi nɛ Mawu kudo édu kplɔtɔwo domɛ. Wo sité ȡo Polo kudo Barnabas ŋtsi yi wo ȡéo to lé éduɔ mɛ. ⁵¹ Vɔa Polo kudo Barnabas xuxu afɔkɔ wo tɔwo kɔȡo wo ŋtsi yi to djo yi Ikonu dumɛ. ⁵² Yi énuklaviɛwo ȡɔ kudo djidjuɛ ku gbɔngbɔn kɔkuɛ.