¹ Lé gaxɔnmɛ kéa, éfiɔ Hérodu lé hamɛviȡéo atɛŋ ȡo funyan funyan nɛ wo. ² E sɔ dékpi yi i wu jaki tsi nyi Ejan o nɔnvi. ³ Etsi i kpɔ be éjɔdji nɛ jufo woa, éna yi wo lé Piyɛ tsan. Kpɔnɔn man mahuan mahuan o ŋkéké dji yɔ. ⁴ Tsinɛ yi li vɔa, ésɔɛ doga; yi trɔ ȡo gakpa dji kpɔ ha tsi mɛ sɔdja énɛ énɛ lé, nɛ watɛŋ nɔn ȡaȡiɛɔ. Susu yitɔ yi nyi bé, ya ȡo kodjo ni lé dukɔ̂a o ŋmɛ nɛ paké zan ȡuȡu va yi vɔa. ⁵ Piyɛ lé gakpamɛ, vɔa éha lé gbédoȡadji sɛnsíȡé ȡo éta ni. ⁶ Lé ézan tsimɛ yi i kpɔtɔ ésɔ nɛ Hérodu a ȡémɔn nɛ yio kodjo ȡoȡoa, Piyɛ lé kɔsɔ kɔsɔ mɛ lé alɔn dɔ̂ɔ lé sɔdja amɛvé domɛ, étsimɛ gakpa ȡiatɔwo tsan lé gaxɔ lɔ nu. ⁷ Yi kpɔȡa, zéȡékaa Axuétɔ o tsikplɛtɔ va zé ni yi kinklin ȡé na yi gaxɔ lɔ mɛ kɔ. E tɔ asi Piyɛ, fuí yi to ni bé: "Sité zéȡéka". Kɔsɔ kɔsɔ lɔwo gé lé alɔ ni. ⁸ Atsikplɛtɔ toni bé: " Bla godji yi na sɔ tsokotawo o do". Piyɛ wa ȡo édji. Atsikplɛtɔa toni bé: " Do awu hluaya tɔ o yi na kplɔŋ do!" ⁹ Piyɛ nɔn yomɛ nɛ atsiklɛtɔa yi to gakpalɔ mɛ. Ŋȡé kanȡo énu tsi djɔa dji o. E xɔsé bé yé lé édrɔ kuɔ yɔ. ¹⁰ Gatsimɛ wo to gakpadjikpɔtɔ tsutsugbɔn tɔ kudo évégɔn lɔ ŋtsia, wo gé ȡo égagbo tsi hun ȡo éduɔ mɛ dji. Agboɔ hun lé yiȡokui si lé ŋkɔ nɔn wo. Wo to yi gédjé émɔn dodo dji yi atsikplɛtɔa djo lé Piyɛ gbɔ. ¹¹ Etsi Piyɛ gbɔva yiȡokui mɛa, é to bé: " Ŋ dui djési ŋtɔ ŋtɔ bé Mawu dɔ yio atsikplɛtɔ ȡoȡa yi i va hluɛn lé Hérodu kudo Juifuwo dukɔn o ténɔnkpɔ tamɛ susu o si". ¹² Etsi i do djési énu tsɛ vɔa, é yi Maliya, Ejan tsi o ȡo nyikɔ na bé Maki o xomɛ, xɔsétɔ sugbɔ bɔ lé xɔn lé gbédoȡa mɛ. ¹³ Yi étsi i xo éhɔn lɔa, nyɔ̂nu sũmɔnvi tsi o yɔnɔn bé Rhodea va bé ya huin. ¹⁴ Tsi i do djési Piyɛ o gbéa, é ȡɔ kudo djidjuɛ kpɔkpɔ, ŋlɔnbé éhɔn lɔ hunhun yi sidu vɛ to nɔn wo bé Piyɛ yi lé éhɔn lɔ dji. ¹⁵ Wo toni bé: " Suku djéɔ yi o lé". Vɔa é tégbé ȡo édji bé nyawo yɔ. Wɔwo gbé nu bé yi o atsikpɛtɔ yi i la nyi. ¹⁶ Vɔa Piyɛ kpɔtɔ lé éhɔn lɔ xoɔ yi étsi wo huín a, wo kpɔɛ yi i kpatsa o. ¹⁷ Piyɛ wa djési nɔn wo ku alɔ bé wo nɛ bɔnu yi iȡé létsi Ahuétɔ ȡito lé gamɛ nɔn wo. E nu bé : " Mi yi to ényɔntsɛ o nɛ Jaki ku éhaviwo."E djo lé wogbɔ gbé yi afi bu. ¹⁸ Etsi éŋũ kéa, édji bibi nɔn sɔdja wo domɛ ȡo wo ŋȡé nyan énutsi djɔ ȡo Piyɛ djio. ¹⁹ Lé étsimɛ Hérodu djii yi ŋȡé kpɔɛ o wa, é biɔ ényɔn gakpa dji kpɔtɔ wo sé yi i ȡégbé bé o nɛ wu wo. E trɔ gbɔva Judéa lé Sézaréa, yi tsi xɔn.Ɔ ²⁰ Dɔmɛ vé Hérodu ȡo Tira kudo Sidona o dukɔ̂a ŋtsi. Wo wa ȡéka kudo Blasti, éfiɔ o kpéȡoŋtsi tɔ, wo zɔn yi éfiɔ gbɔ nɛ Blasti a xɔ nɔn wo. Wo biɔ ŋtsi fafa ȡo o dukɔ̂a xɔnɔn ŋȡuȡu so éfiɔ o du gbɔ. ²¹ Lé azan ȡé tsi wo ȡo gbéa, Hérodu sɔ éfiɔ wu do, nɔn anyi lé éfiɔ zikpi dji, yi ȡégbéfan nɛ dukɔ̂a. ²² Dukɔ̂a do axa: " Mawu ȡé o gbé ké, ŋȡé agbétɔ o gbé yɔ o ! " ²³ Zéȡéka Ahuétɔ o tsikplɛtɔ ȡé xui ȡo ŋȡé sɔ bubu na Mawu o. Eŋɔ̂vio dui yi i ku. ²⁴ Vɔa Mawu nyɔ̂a lé sísíɔn ȡo édji yi énukplavɛwo tsan lé gbɔ suɔ. ²⁵ Etsi Barnabas kudo Solu o wu édɔ nu lé Yéruzalɛm, wo trɔ djo, yi wo kplɔ Ejan tsi o yɔnɔn bé Mako a ȡo wo ȡokui ŋtsi.