¹ Apotriwo kudo amɛtsiwo lé Judé sé bé vodu sũmɔntɔwo tsan xɔ Mawu o nyɔn. ² Gatsimɛ Piyɛ trɔva Yéruzalɛm, amɛtsiwo so évososo o hamɛa sɛ̂nu kui yi nu bé: ³ " O wa ȡéka kudo amɛtsiwo ŋȡé so évo yi o ȡunu kudo wo. ⁴ Vɔa Pita djé ényɔn gɔnmɛ ȡéȡé nɔn wo ȡéka ȡéka bé: ⁵ Ŋlé ékui fâɔ lé Joppée o dumɛ, yi gbɔ̂gbɔ̂ ȡiva djinyɛn. Lé avimɛ nukpɔkpɔ mɛa, ŋkpɔ énuȡé zɔn gbɔnɔn gbɔnyɛn sigbé gaga tsi o doka éto énɛwo na nɛnɛ, tsi dja ȡi djé djinyɛn. ⁶ Ŋ kpɔɛ, gluikpɔ yi ŋkpɔ anyigbandjilan afɔnɛwo, gbémɛ lanwo, élan tsi o tanɔ̂wo kudo ayamɛ xévio. ⁷ Ŋ sé égbéȡé ȡi nuŋ bé: " Piyɛ, sité, wuo yi na ȡuo! Ŋȡo éŋtsi bé:" ⁸ Ooo, Ahuétɔ, ȡo énu xoȡi alo énu vuɛnȡi ȡé ŋȡé ȡo numɛnuŋ kpɔ o. ⁹ Vɔa égbéɛ gbé ȡi so kaka djiŋkusi bé: "énu tsiŋtsi Mawu ȡégbé so bé ékɔa, ŋ gbé kpɔɛ sigbé énu xoȡi nɛnɛo" ¹⁰ Enutsɛ zé zétɔn shɔ̂ŋ, éyomɛa, kéŋkéŋ trɔ yi djiŋkusi. ¹¹ Yi kpɔȡa, ŋsu amɛtɔn nɔnté lé axué tsimɛ mi léɛ o ŋkɔ, o ȡowo ȡoȡa ŋ so kaka Sézaréa. ¹² Gbɔngbɔn a xonuxo nuŋ bé nyɛŋ gbé bu éŋtsi kpɔ didiȡéo vɔa bé ma kplɔ wo do. Nɔnvinɔn amadɛnlɔwo djo kudoŋ yi mi vɛ yiȡo o Kornɛlio o xomɛ. ¹³ E kan aséŋ nɔnmi kuȡo létsi i kpɔ atsikplɛtɔ lɔ nɔnté lé yio xomɛ lé nunuɔ ni bé:" Dɔ amɛwo o ȡoȡa Jopé nɛ wa yi kplɔ Simɔn tsi dji o da nyikɔ ȡo bé Piyɛa va. ¹⁴ E la sɔ aŋɛ ȡé nɔn tsi dji o kudo axuédo tɔwo mi la kpɔ gangan to. ¹⁵ Tsi ŋ tɔ nuxo xoxo nɔn woa, gbɔngbɔn kɔkɔɛ ȡi ȡo wodji sigbé létsi i ȡi ȡo miadji lé gɔnmɛ djédjé nɛnɛ. ¹⁶ Ŋ ȡoŋku Axuétɔ o nyɔ̂nunu tsi bé: " Ejan nyrɔn amɛ o ȡo ési mɛ, miɔwo ya, o la nyrɔn mi ȡo gbɔngbɔn kɔkɔɛ mɛ. ¹⁷ Vɔa nɛ Mawu sɔ énu nana ȡéka ŋmɛ tsi i na mia mɛtsi wo xɔ Axuétɔ Yésu Kristo dji séa sɔ na wɔ o tsan, amɛ ŋȡé ŋmɛ yi ŋ nyi la djé agla ȡo Mawu ŋtsi? ¹⁸ Tsi wo sé ényɔn tsɛ woa, wo bɔnu yi wo kafu Mawu lé nunuɔ bé: " Mawu na djimɛ trɔtrɔ o mɔnu kpɔkpɔ maxɔsétɔwo tsan nɛ wa tɛŋ kpɔ agbé. ¹⁹ Eyomɛa, xɔsétɔ tsi wo kan tégbé lé Yéruzalɛm lé funyafunya tsi tɔdji so Etiɛnu o ku djia, wo djo yi kaka Fénisi, Shipri ku Antiɔshi. Wo yi do aŋɛnyuiɛ nɛ Juifu wo ȡéȡé. ²⁰ Vɔa amɛȡéwo lé womɛ tsi so Shipro kudo Siréné, wɔ o yi Antiɔshi vɛ do aŋɛn yuiɛ nɛ Grɛki wo, sɔ kuȡo Axuétɔ Yésu ŋtsi. ²¹ Mawu o alɔ lé wodji, amɛ sugbɔ xɔsé yi trɔ ȡo Axuétɔ lɔ ŋtsi. ²² Enyɔn ȡi so woŋtsi va ȡo Mawu ha tsi lé Yéruzalɛm o tomɛ: yi wo ȡo Barnabas ȡoȡa Antiɔshe. ²³ Tsi ivɛ ȡo yi i kpɔ Mawu o amɛnuvévéa, édji djɔɛ yi i do ŋsɛn wo bé wo nɛ tɛ ȡo Mawu ŋtsi kudo édji kéŋ. ²⁴ Ðo amɛ nyui tsi ȡɔ kudo gbɔngbɔn kɔkɔɛ ku xɔsé yi i nyi. Yi amɛ sugbɔ sité yi bɔ ȡo ŋtsi ²⁵ Barnabas djémɔn yi Tarse vɛ dji Solu. ²⁶ Tsi i vɛ kpɔɛ a, é kplɔɛ gbɔva Antiɔshi. Exué ȡéka shɔnŋ a, wo nɔndu kudo Mawu ha, yi wo fianu amɛ sugbɔ. Antiɔshi yi o yɔ nuklaviɛwo lé tsutsugbɔn bé Kristo tɔwo. ²⁷ Lé gaxɔn mɛa, ényɔ̂nudaȡɛtɔwo djo lé Yéruzalɛm va kɔȡo Antiɔshi. ²⁸ Amɛȡé lé wo domɛ tsi dji o da nyikɔ ȡo be Agabus, sité yi ȡé gbéfan lé gbɔngbɔn o nyikɔ mɛ bé fivé ganȡé la to lé xixéɛ mɛ. Eva émɛ nɛnɛ lé Kaizaro Klodu o gamɛ. ²⁹ Nukplaviɛwo wa ȡoȡo bé sɔ kuȡo ŋtété tsi nɛ lé yé wo sia, yé wa sɔ alɔdo ȡoȡa nɔnvi tsi wé lé Judéa nyigban dji. ³⁰ Wo wɛ nɛnɛ, wo sɔ éga ȡoȡa amɛganwo to Barnabas kudo Solu dji.