¹ Vinyɛn lɔnlɔntɔwó, ŋlé nutsɛwó ŋluɛnwɔ nɔn mi , bé né miŋgbé woa nuvuin o. vɔ lɔ, nɛ mɛnȡé woa nuvuin lɔ, amɛtáhluitɔ le miashi le étɔ lɔ gbɔ, tsi nyi Yesu Kristo djɔdjɔɛtɔ lɔ. ² Yí nyí mɛtsi va kú ȡo mian núvɔn ȡéȡédjo ŋtsi, ŋdé nyi miɔntɔ ȡéȡé o, vɔ nɛn mɛntsiwó le xixeɛ mɛn tsan. ³ Sɔ to yɛ dji lɔ, mi nyan bé mi djeshi, nɛ mi le yio sédodo mɛn ȡo ashi. ⁴ Mɛtsi nu bé : " ŋdjeshi Mawu ", vɔ ŋdé le nɔn yio sédodo mɛ ȡo ashi o lɔ, enyi núsúkantɔ, yí nyɔntéxoéɛ ŋdé le mɛn o. ⁵ Vɔ lɔ mɛnshiamɛ tsi le nɔn le yio nyɔn mɛ ȡo ashi lɔ, Mawu yio lɔnlɔn de blibo la meɛmɛn nyɔnyexoé tɔ. Le tsɛ mɛ lɔ, mi nyan bé mi le mɛn. ⁶ Mɛtsi bé ye le Mawu mɛ lɔ, ȡo la zɔn nɔn shigbe letsi Yesu kristo yíŋtɔ zɔn lɔ. ⁷ Lɔnlɔntɔwó, nyɛn ŋdé le sédodo yeye ŋluɛnwɔ nɔn mi o, vɔ sédodo xoxo yi nyi mi xɔ le gɔnmedjedjeɛ mɛ. Sédodo xoxo lɔ, yí nyi nyɔn tsi mi se. ⁸ vɔ lɔ, ŋle sédodo yéyé ŋluɛnwɔ nɔn mi, tsi nyi nyɔntéxoé le Kristo kú miɔnwɔ mɛ, ȡo lɔ vivitiɛ bu, yí kɛnklɛn ŋtɔŋtɔ lɔ, le kɛnklɛnwɔ vɔ. ⁹ Mɛtsi nu bé ye le kɛnklɛn mɛ, vɔ ŋdé lɔn yio háví o lɔ, kpɔtɔ le viviti mɛ. ¹⁰ Mɛtsi lɔn yio háví lɔ, éle kɛnklɛn mɛ, yi gégé yo mɔnnu ȡé kpikpi ŋdé le mɛn o. ¹¹ Vɔ mɛtsi tsri yio háviɛ lɔ éle viviti mɛ, yi yi le zɔnzɔnwɔ le viviti mɛ; ŋdé nya fitsi yiɔ yi leo ȡo viviti gban ŋkú nyi. ¹² ŋlé nuŋluɛn nɔn vinyɛn lɔnlɔnwó, ȡo lɔ wó sɔ miá nuvɔn ke mi ȡo Kristo yio ŋkɔ ŋtsi. ¹³ ŋlé nuŋluɛn nɔn mi étɔwó, ȡo mi djeshi mɛtsi le so gɔnmedjedjeɛ. ŋlé nuŋluɛnwɔ nɔn mi ȡékadjɛviwó kú túgbedjɛwó, ȡo lɔ mi ȡu bosanŋ dji. ŋ ŋluɛn nu nɔn mi, ȡeviwó, ȡo mi djeshi etɔ lɔ. ¹⁴ ŋ ŋluɛn nu nɔn mi etɔwó, ȡo mi djeshi mɛtsiyí le so gɔnmedjedjeɛ. ŋ ŋluɛn nu nɔn mi ȡekadjɛviwó kú tugbedjɛwó, ȡo lɔ mi sɛnŋ, yí mawunyɔn le mia mɛn, yí mi ȡu ayémetɔ lɔ dji. ¹⁵ Miŋgbe lɔn xixeɛ mɛ kú nutsiwó le xixeɛ mɛn o. Mɛtsi lɔn xixeɛ mɛ lɔ, etɔ yó lɔnlɔn ŋdé le mɛn o. ¹⁶ Ðo nushianú tsi le xixeɛ mɛ, ŋtsilán yió núdjódjró, ŋkúvíwó wó núdjódjró, yí egbeamɛ yio dadá, wó ŋdé so etɔ gbɔwɔ, vɔ lɔ wó so xixeɛ mɛ. ¹⁷ Anyigban kú yió nudjódjrówó la vayi, vɔ lɔ mɛntsi woanɔn Mawu yió lɔnlɔnnu lɔ, e le so mavɔ yi mavɔ. ¹⁸ Vinyɛnwó, mi le gaxoxo kpɛtɛwó mɛ, yí tsi mí si bé Kristo yió futɔ lava lɔ, Kristo yió futɔ sugbɔ fifiɛ, yí le eyɛ mɛ lɔ mi nya bé mi le gaxoxo kpɛtɛwó mɛ. ¹⁹ Wó to le mian domɛn, vɔ wó ŋdé nyi miantɔwó sáa, ȡo nɛn wó nyi miantɔwó lɔ, wó la ke yi mɔnzɔnzɔn lɔ dji kú mí. Vɔ, wó to le mian mɛ, bé wó aȡifia bé wó ŋdé le mian dji o. ²⁰ Vɔ lɔ, miáwó yɛ, mi xɔ amishishi so metsi le kɔkɔɛ gbɔ, yí miɔn keŋkeŋ mi djeshi nyɔntexoéɛ. ²¹ ŋle nu ŋluɛnwɔ nɔn mi, ŋdé nyi bé miŋdé nyan nyɔntexoéɛ lɔ, vɔ lɔ mi nyí ŋtsíwɔ, yí nusúkánkán ŋdé nɔnɔn nyɔntexoé mɛ o. ²² Mɛȡé nyi nusúkántɔ, nɛ ŋdé nyi mɛtsi gbé bé Yesu nyi Kristo lɔ? Mɛnxɔn yí nyí Kristo yio futɔ, tsi yi la nɔn nugbéwɔ le etɔ kú eviɛ gbɔ. ²³ Mɛshiamɛ tsi gbénu le viɛ gbɔ lɔ, etɔ ŋdé leshio, yí mɛshiamɛ tsi ȡo eviɛ yó shidjedje lɔ, djeshi etɔ tsan. ²⁴ Nɛ miɔnwó yɛ lɔ, nutsi mi se so gɔnmedjedjeɛ me lɔ, ne nɔn miá mɛn, yí to yɛ dji lɔ, mí la nɔn eviɛ kú etɔ mɛ. ²⁵ Yí ŋgbédódó tsi yi woa nɔn mí, yí nyí tsɛ : agbe mavɔ. ²⁶ ŋ ŋluɛn nutsɛwó nɔn mi ȡo mɛtsiwó kplɔ nɔn mi djo le emɔn lɔ dji ŋtsi. ²⁷ Nɛ miɔnwó yɛ lɔ, amishishi tsi mi xɔ lɔ le mian mɛ, yí miŋdé hian nufiáfiá buo. Vɔ, tsi yió mishishi fia nɔn mi nushianú, yí mi le nyɔntexoéɛ me, ŋdé nyi nusúkánkán lɔ; mi nɔn yɛ mɛ ȡo nufifia tsi xɔ lɔ nu. ²⁸ Fifiɛ lɔ, vinyɛnwó, mí nɔn yɛ mɛn, bé né gaxoxo tsi mɛ yi la vá vá lɔ, mian ȡo kánȡodji, yí ŋgbé va nyi djijínjín nɔn mi bé mian nɔn djidjixoé ni to ŋkpɛn mɛ, gatsimɛ yi la va lɔ o. ²⁹ Nɛ mí nyan bé éle djɔdjɔɛ lɔ, mí nyin bé mɛshiamɛ tsi woa nɔn djɔdjɔɛnyínyí lɔ wó dji so yɛ mɛn.