TE JESÚS JA' TEJK'ANBIL TA K'OP YU'UN TE YACH'IL TRATOE. ¹ Jich yu'un, yakotik ta yalel sk'oplal ja in to, te ayix te muk' sacerdote jku'untik te nakalix ta swa'el smuk'ul snaktijib te mach'a k'ax bayal yutsilal ta ch'ulchane. ² Ayix ta at'el ta bay ch'ul awilal, ja te smelelil nail pak' te pasbil yu'un te Kajwaltike, te ma jauk pasbil yu'un te ants-winiketike. ³ Melel spisil te muk' sacerdoteetik tsabilik yu'un te ya yak'beyik xcha'-chajp'al majt'aniletik sok milbil majt'aniletik. Ja swentail te ya me sk'an te ay beluk ya yak' uuk te Cristoe. ⁴ Jauk me to te ayuk ta balumilal te Cristoe, ma jauk sacerdote te jichuke, melel ay te mach'atik ya yak'ik majt'aniletik jich te bit'il ya yal te mantalile. ⁵ Ja yakalik ta at'el ta bay snail pak', te ja lok'taybil tel sok te ja snojk'teal te beluk ay ta ch'ulchane. Jich te bit'il ak'bot sna' te Moisés yu'un te Dios te k'alal jajch' spas te nail pak'e: La yal te Diose, "JICH ME YA APAS SPISIL TE BELUK LA JKAK'BAT AWIL TA BAY WITS.'' ⁶ Jich ta ora to te Cristo ja yich'ojix te mero lekil yat'ele. Jich tejk'ambil ta k'op ta sk'asesel te yach'il tratoe, te ja ak'bil ta swenta te beluk mero lek yaloj te Diose. ⁷ Te manchuk ay ch'ayem te sbabial tratoe, ma yejt'aluk ay xan te xchebale. ⁸ Te k'alal la sta te Dios te banti ch'ayemik te lume jich la yal: ''ILAWILIK, YA ME STA YORAIL, JICH YA YAL TE KAJWALTIKE, YA ME JPAS YACH'IL TRATO SOK TE SNA TE ISRAELETIKE SOK TE SNA TE JUDIOETIKE. ⁹ JA IN TO, MA JICHUK TE BIT'IL TRATO TE LA JPAS SOK TE MACH'ATIK JA CHICHMAMIK TE K'ALAL LA JTSAKBEY TE SK'ABIK YU'UN TE LA JNIT LOK'EL TEL TA SLUM TE EGIPTOE. MELEL MA JAUK LA ST'UUNIK TE TRATO JKU'UNE, JICH YU'UN TE LA JKIJK'TEY JILEL, JICH LA YAL TE KAJWALTIKE. ¹⁰ JICH AY TE TRATO TE YA JPAS SOK TE SNA TE ISRAELETIKE TE K'ALAL YA STA YORAIL, JICH YA YAL TE KAJWALTIKE: "JO'ON YA JKAK'BEYEX JA NA'IK TE MANTALILE SOK YA JTS'IBUBEYEX TA AWOT'ANIK. TE JO'ONE DIOS YA XK'OON AWU'UNIK SOK JA LUM JKU'UN YA XK'OATIK. ¹¹ MA YEJT'ALUK YA SNOJP'TESIK TA TULUTUL TE SPATXUJK'E SOK TE YERMANO SBAIKE, TE JICH YA YALIKE: ''NA'BEYA ME SBAIK TE JKAJWALTIKE." MELEL SPISILIK YA ME SNA'BONIK JBA TE MUK' BIK'ITE. ¹² MELEL TE JO'ONE YA JNA'BEY YOBOLIL SBAIK YU'UN TE BELUK AMEN SPASOJIKE, SOK MA BA YA JNA'BEY XAN TE SMULIKE." ¹³ Te k'alal ya yal ''YACH'ILE'', yu'un pokobenix k'oem yu'un te sbabial tratoe sok te beluk ma ba ya xtuunixe sok te yakix ta pokobele le' nopol ya xtubix bael a.