MUK'UL JKOLELTIK ¹ Jich yu'un, ya me sk'an ya jkich'tik ta muk' te beluk jkaiyojtik stojole, jich me ma ya jkijk'teytik te beluk jnopojtike. ² Melel te sk'op Dios te la yich' alel yu'un te ch'ul abatetik ta sneelal toe, smelelil stukel ja yu'un te mach'atik ya sle smulike sok te ya xk'axintesik mantale, ya me yich'ik kastigo yu'un. ³ ¿Bit'il me ya stak' ya jkoltaybatik lok'el teme ma jch'uuntik te ay jun kolel te mero muk' stukele? jai to janix te Kajwaltik te la xcholbey sk'oplal ta sneelal te jkoleltike sok te mach'atik la yaiyik stojol te sk'ope, ja'ik la yalbotik te smelelil te k'op te beluk la yale. ⁴ Janix te Diose la yak' ta ilel te senyailetik, te chajp' at'eliletik te la yak' ta ilel ta swenta te yu'ele, sok te la yak' majt'aniletik ta swenta te Ch'ul Espíritu chikan bit'il la sk'an yot'an stukele. ⁵ Melel te Diose ma la yak'bey te ya spasik ta mantal te ch'ul abatetik ta stojol te yach'il balumilale, te ja yakotik ta xcholel sk'oplale. ⁶ Jauk me to, ay mach'a la yal ta sjun te Diose: ''¿BI SWENTAILUK AWU'UN TE ANTS-WINIK, TE YA ANA'ULEYE? ¿SOK TE YAL-SNICH'AN TE WINIK, TE YA YA'AN AWOT'AN YU'UNE? ⁷ PEK'EL LA AWAK' TEBUK TE ANTS-WINIKETIK YU'UNA TE CH'UL ABATETIKE; LA AWAK'BEY SKORONAIN TE AWUTSILALE SOK LA AWAK' ICH'EL TA MUK'. SPISIL JA LA AWAK'BEY TA SK'AB." ⁸ Melel ja ta swenta te Dios te la yak' te ya spas mantal spisil te beluk aye. Mayuk beluk ma yak'oj te ya spas ta mantale. Jauk me to ta ora to, ma jkiltik te ch'uunbil te smantale. ⁹ Jauk me to te jo'otike ya jna'tik te ay tul te pek'el ak'ot jun chebuk k'aal ta stojol te ch'ul abatetike, ja bi ja te Jesuse, jauk me to ta skaj te k'ax swokol sok te laj ta milele, la yich' te skoronae te ay yutsilal sok la yich' ich'el ta muk'. Jich yu'un, ta swenta te yutsil yot'an te Diose, te Jesuse la yak' sba ta lajel yu'un te ants-winiketike. ¹⁰ Melel te Diose ja yu'un spisil te beluk aye, ja ta swenta te pastaje, swenta yu'un jich ya stak' yik' tel a te yal-snich'ane sok te ya yik' bael ta utsilale. Ja yu'un te la yak' tul wolwanej te k'ax bayal swokol ta swenta te la yak'botik jkoleltik sbajt'el k'inale, ja te Jesuse. ¹¹ Melel pajal ta xcha'chajp'al, te mach'a ya xch'ulteswane sok te mach'atik la yich'ik ch'ultesele, junax me te Statike. Jich yu'un te Nich'anile ma xk'exaw ta yalel te ja jkermanobatik soke. ¹² Jich ya yal: ''YA ME JKAK'AT TA ICH'EL TA MUK' TA STOJOL TE JKERMANOTAKE; YA ME JK'AJINTAYAT TA BAY YOLIL TE MACH'ATIK STSOBOJ SBAIKE.'' ¹³ Sok jich la yal xan: ''AY SMUK'UL JKOT'AN TA STOJOL DIOS.'' Sok jich la yal xan: ''ILAWILIK, LE' AYON TO SOK TE ALNICH'AN TE LA YAK'BON TE DIOSE.'' ¹⁴ Jich yu'un te bit'il ch'ich'-bak'et ayik te alnich'anetik yu'un te Diose, janix jich uuk ch'ich'-bak'et k'ot te Jesuse, swenta yu'un jich ju' yu'un tsalaw a ta swenta te laje, jich la stsal te yip te lajele ja bi ja te pukuje. ¹⁵ Jich la spas ta swenta yu'un te la yak' ta libre te mach'atik mosoinbilik yu'un te ya xi'ik te lajel te jayeb k'aal kuxulik ta k'inale. ¹⁶ Ma jauk ta swenta te ch'ul abatetik te ya smel-yot'ane, jauk me to, ja ya smel yot'an yu'un te sts'umbal Abrahame. ¹⁷ Jich yu'un puersa me la sk'an te jich k'ot te bit'il te yermanotake, swenta yu'un jich xk'ot ta muk' sacerdote, te ay xk'uxul yot'ane sok te jun yot'an ta stojol te Diose, jich me ya staik ta stojol Jesús te perdón yu'un te smulik te ants-winiketike. ¹⁸ Melel te Jesuse k'ax swokol sok la yich' ilbel yot'an, janax stukel te ya xju' yu'un skoltey te mach'atik ya yich'ik ilbel yot'anike.