JAUK ME YA JTOJLINTIK TA ILEL TE JESUSE. ¹ Jich yu'un, te joytabilotik yu'un te bayal testigoetik te la yak'ikix ta ilel te ay xch'uunjel yot'anike, aka me jkijteytik jilel spisil te jkijk'atstike sok te mulil te ja ya smakotike. Aelmajukotik bael ja to teme k'ootik te banti albilotike. ² Aka me jtojlintik ilel te Jesuse, te ja la yak'botik jkiltik ta sneelal sok te ja la stojtesotik yu'un te xch'uunjel ot'anile. Ta skaj te sbujts' yot'ane te la sts'ik swokol te la yich' milel ta cruz, ma ba la ya'an yot'an yu'un te la yich' k'exlaltesele, jich la snajk'an sba ta swa'el sk'ab te Dios ta banti muk'ul snaktijibe. ³ Jich yu'un na'aik me te Jesuse, te ja la sts'ik swokol yu'un te kontroinot yu'un te mulawiletike, jich me ma spejk'tsaj awot'anik sok ma me awich'ik tsalel a. ⁴ Te ja'atike ma ba amalojik a ch'ich'elik yu'un te kontro awilojik te mulile. ⁵ Sok te ja'atike ch'ayix ta awot'anik te tak'uyel te la awich'ik te bit'il yal-snich'anatik te Diose: ''JNICH'AN, MA ME AKUY TE MAYUK SK'OPLAL TE TAK'UYEL YU'UN TE KAJWALTIKE SOK MA ME XLUJBAT TE K'ALAL YA AWICH' TOJTESEL YU'UNE. ⁶ MELEL TE KAJWALTIKE YA STOJTES SPISILIK TE MACH'ATIK SK'ANOJE SOK YA ME YAK'BEY KASTIGO SPISIL TE MACH'ATIK YA YIK' YAL-SNICH'ANINE. ⁷ Ts'ikameik te awokolik jich te bit'il ya awich'ik tojtesele. Te Diose jich ya skuyatik te bit'il yal- snich'anexe. Jauk me to, ¿Ay ba tuluk nich'anil te ma yich' tojtesel yu'un te sme'-state? ⁸ Jauk me to teme ma awich'ik tojtesele, jich k'oem te bit'il ma ba atatik te Diose sok jich k'oem te bit'il ma ba yal-snich'anex abi. ⁹ Jich yu'un te jo'otik te ay jtatik ta balumilal te ja ya stojtesotik sok te ya jkich'tik ta muk'e. ¿Jauk to ba ma ya jkich'tik ta muk' a te Jtatik te ay ta ch'ulchane, sok te ja ya yak'botik te jkuxlejaltike? ¹⁰ Melel te me'-jtatik la stojtesotik jich te bit'il la sk'an yot'anik jun-chebuk nax k'aal te bit'il le' kuxulotik ta balumilal to. Jauk me to te Diose ja ya spas yu'un te jich ya xlekubotik a, sok te jich ya xk'ootik te bit'il ch'ultesbile. ¹¹ Mayuk tojtesel te binax jkot'antik yu'une, k'ux ya jkaiytik. Jauk me to, ta patilal ya me sitin ta swenta te beluk toj ta pasele sok lamal k'inal ya yaiy yu'un te mach'a ya xch'uun te tojtesele. ¹² Jich yu'un ak'beyaik xan yich' yip te ak'abik te saybujemixe sok te sjol awakanik te mayukix yipe. ¹³ Leaik me te toj bee, jich me ya xtojob te koxoe sok jich me ya yich' poxtayel a. ¹⁴ Leaik me te lamal k'inal sok spisil te yantike, sok ch'ultesbilukex me, teme ma jichuke mayuk mach'a ya xk'o yilbey sit te Kajwaltike. ¹⁵ Tsajteya me abaik te manchuk ayuk tuluk te ma ba yich'oj te yutsilal te Diose sok te manchuk ya xch'i ta awot'anik te beluk ma lekuke, swenta yu'un ma me ya yak'atik ta wokol sok jich me ma tsobol ya xbolob yot'anik yu'un. ¹⁶ Tsajteya me abaik te mayuk ni tuluk ya xyal ta mulil sok te mayuk xch'uunjel awot'anike, jich te bit'il la spas te Esaú, te mayuk sk'oplal bajt' yu'un te bit'il ba alale melel ta pajch'nax we'lil te la xchon te bendición te albil te ya yich' te k'alal bejk'aje. ¹⁷ Melel ya me ana'ik, te ma ba ak'bot xan te bendición te k'alal la sk'an xan ta patilale, ma la yich'ix k'anel, melel ma la stak'ix sut'es te yot'ane, manchuk me bayal xan la yok'tesba yu'un. ¹⁸ Melel ma jauk talatik ta wits jich te bit'il te israeletik te noptsajik bael le'a, te ya xju' ta pikele, te yak ta tilel ta k'ajk'e, te ijk'naxe, sok te ijk' maxan te k'inale, sok xlemlajanax chawuk sok bayal ik' le'a. ¹⁹ Te ja'exe ma talatik yu'un te k'alal k'opoj te ok'ese, sok te k'alal k'opoj te Dios ta stojol te lume, te mach'a la yaiyik stojole la yalik wokol te manchuk ya xk'opoj xane. ²⁰ Melel ma ju' yu'unik te la yaiyik stojol te beluk albotik ta mantale: ''TEME AY KOJT' CHAMBALAM TE YA STEK' TE WITSE, YA ME YICH' CH'OJEL TA TON.'' ²¹ Kaxem to xan la xi'ik te beluk ak'botik yilik te jich la yal te Moisese: ''YAKON TA XIWEL SOK YAKON TA NIJK'EL''. ²² Yan te ja'exe ja talatik te banti ay te wits Sión sok ta banti ay muk'ul lum yu'un te kuxul Diose, ja te Jerusalén te ay ta ch'ulchane sok te bay tsobol bayal ta mil te ch'ul abatetik te yakalik ta spasel k'in. ²³ Te ja'atike ja talatik te banti stsoboj sbaik te sbabial alnich'anetike, te la yich'ikix najk'anbel sbiilik ta ch'ulchan. Talik ta stojol Dios te ja chajbanwanej yu'un spisil te ants-winiketike, sok te banti ay te espírituetik te la yich'ikix utstesele. ²⁴ Te ja'atike talatik ta stojol te Jesuse, te ja la yich' tel te yach'il trato, sok te la yich' tsijts'anel te xch'ich'el te ja lek stukele, ma jichuk te bit'il xch'ich'el te Abele. ²⁵ Ma me xa bajik te mach'a yak ta k'ope. Melel ma kolik te mach'atik la sbajik te tak'uyel te la yak' le' ta balumilale, jauk to bal a te jo'otik, teme la jkijk'teytik sok teme lok'otik ta anel yu'un te mach'a yak ta stak'uybelotik k'alal to ta ch'ulchan. ²⁶ Te k'alal k'opoje nijk' yu'un te balumilale. Jauk me to jich k'axel yaloj jilel sok te jich ya xk'ot ta pasele: ''JUN XAN BUELTA, YA XNIJK' JKU'UN TE BALUMILALE, SOK TE CH'ULCHANE.'' ²⁷ Jai k'opetik to: ''JUN XAN BUELTA'', ja ya sk'an yalbotik spisil te beluk pasbile, ya me stak' ta jinel, melel pasbil stukel, ja xanix ya xjil te beluk ma stak' ta jinele. ²⁸ Jich yu'un, te jo'otik te ya jkich'tik ak'el ta ba ay ta ajwalinel te Diose, te ma stak' ta jinel stukele, aka me jkaltik wokol yu'un sok aka me jkich'tik ta muk' sok xiwel sok te ya jlajinbatik ta stojol te Diose. ²⁹ Melel te Dios jku'untike jich te bit'il k'ajk' te ya xchik'otike.