¹ Melel te mantalile jich te bit'il snojk'teal nax te beluk lek yak ta taele, sok te ma jauk smelelil te beluk aye. Te mach'a ya x-oxtaj tel ta stojol te Diose, ma xju' te ya xlekub ta swenta te milbil majt'aniletik te ya yich'ik bael te sacerdoteetik ta jujun ja'wile. ² Te yakuk xju' yu'un te ya xkolteywan te milbil majt'aniletik te la yak'ike, ma me ayukix mulil te jichuke, sok ya me yijk'teyik yak'el te milbil majt'anil te jichuke, melel la yich'ikix sapel yu'un spisil te smulike, te mach'atik ya yich'ik ta muk' te Diose, sna'ojikix te mayuk smulik te jichuke. ³ Jauk me to ma ba xch'ay te mulil yu'un te milbil majt'aniletik te ya yak'ik ta jujun ja'wile. ⁴ Melel ma xju' yu'un xch'aybelotik jmultik te xch'ich'el te stat wakaxetik sok te stat tentsunetike. ⁵ Te k'alal tal ta balumilal te Cristoe, jich la yal: ''MA JAUK TE MILBIL MAJT'ANILETIK SOK MA JAUK TE MAJT'ANILETIK TE YA AK'ANE, JA LA ACHAJP'ANBON TE JBAK'ETALE. ⁶ MA JAUK YA AK'AN SPISIL TE CHIK'BIL MAJT'ANILETIK SOK TE MAJT'ANILETIK YU'UN TE MULILE. ⁷ Jich la jkal: "ILAWIL, LE' AYON TO TA SPASEL TE SK'ANJEL AWOT'ANE, JICH TE BIT'IL TS'IBUBIL JK'OPLAL TA BALBIL JUNE.'' ⁸ Neel la yal te Cristoe: ''MA JAUK TE MILBIL MAJT'ANIL NI JAUK TE CHIK'BIL MAJT'ANILETIK, SOK MA JAUK TE CHIK'BIL MAJT'ANIL YU'UN TE MULIL TE YA SK'AN AWOT'ANE.'' Ja in to ja te milbil majt'aniletik te ya yich'ik ak'el ta swenta te mantalile. ⁹ Jich la yal: ''ILAWIL, LE' AYON TO TA SPASEL TE SK'ANJEL AWOT'ANE.'' Jich te Cristoe la xch'aybey sk'oplal te majt'aniletik te ay ta ak'el ta neelal toe sok ja tulan k'ot sk'oplal te majt'anil te la yak'e. ¹⁰ Ja yu'un te la spasbey sk'anjel yot'an te Dios te la jkich'tik ch'ultesele, ta swenta te la yak' te sbak'etal te Jesucristoe, junax buelta la yak' sba ta lajel sbajt'el k'inal. ¹¹ Jauk me to, spisil te sacerdoteetik ya xjajch'ik ta jujun k'aal ta spasel te yat'el te Diose. Ja yakalik ta yak'el ta spisil ora te milbil majt'aniletike, jauk me to te milbil majt'aniletike ma xch'ay te mulile. ¹² Yan stukel te Cristoe la yak' jun milbil majt'anil ta sbajt'el k'inal yu'un te mulile; jich la snajk'an sba ta swa'el sk'ab te Diose. ¹³ Ja yak ta smaliyel ja to te ya yak' ta yanil yakan te ya jkontroe. ¹⁴ Melel ta swenta te la yak' junax buelta te majt'anile, te k'axel ju' yu'un te ya slektes ta sbajt'el k'inal te mach'atik jayeb ya yich'ik ch'ultesel yu'une. ¹⁵ Te Ch'ul Espíritue jich la yalbey sk'oplal ta jtojoltik. Melel jich la yal ta neelal: ¹⁶ ''JA IN TO JA TE CHAPIL TRATO TE YA JPAS SOK TE ANTS-WINIKETIK TE K'ALAL YA STA YORAILE, XI' TE KAJWALTIKE. JO'ON YA JKAK'BEY TA YOT'ANIK TE MANTALILETIK JKU'UNE, SOK YA JTS'IBUBEYEX TA AWOT'ANIK. ¹⁷ MA BA YA XTALIX TA JKOT'AN TE AMULIK SOK TE JAYEB BUELTA TE LA AK'AXINTESBONIK TE JMANTALE." ¹⁸ Jich yu'un ta ora to, teme k'axel la yich'ix ch'ayel te jmultike ma ba yejt'alix te ya jkak'beytik te Dios te milbil majt'anil yu'un te jmultike. ¹⁹ Ja yu'un, kermanotak, te jo'otike jun jkot'antik ya x-ochotik bael ta ba ay te ch'ul awilal ta swenta te xch'ich'el te Jesuse. ²⁰ Ja me te yach'il be te ya yak'botik te jkuxineltike, te ja la sjambotik ochel te pak' te jok'ole, te ja ta swenta te sbak'etal stukele. ²¹ Melel ay me jku'untik tul muk' sacerdote ta sna te Diose, ²² ya me x-oxtajotik bael sok spisil jkot'antik sok smelelil xch'uunjel jkot'antik, ta swenta te xch'ich'ele, sapilix me te jkot'antik yu'un te beluk amen ya jnoptike sok te jbak'etaltik sapilix me ta lekil ja'. ²³ Ma me jkijk'taytik ta yalel te yakotik ta xch'uunel sok jkot'antik te ya xk'ot ta pasel te beluk yalojbotikixe, manchuk me ya ya'an jkot'antik yu'un, melel te Diose, ja k'axel la yalbotik te sk'ope, sok ma me ya spas lot stukel. ²⁴ Aka me jkak'tik ta ilel te bit'il jech jkak'beybatik yip jkot'antik sok te xk'uxul jkot'antik sok yakuk jpastik te lekil at'elile. ²⁵ Ma me xkomotik ta jtsobelbatik, jich te bit'il mach'atik ya spasike. Yan te ja'exe jech-muk'tesbeyame k'inal awaiyik xan, k'axem to me xan a te bit'il ya awilik te yak ta nojptsajel tel te sk'alelal te ya xtal te Kajwaltike. ²⁶ Jauk me to, teme spasemal jkot'antik ya jleuleytik xan jmultik te bit'il jna'ojtikix te beluk lek ta pasele, mayuk me xan yan milbil majt'anil ta swenta te mulile. ²⁷ Ja xanix me kechelotik ta jun chajp'anel te k'ax xi'bantik sbae sok ta chik'el ta k'ajk' te ya smil spisil te mach'atik skontroinejik te Diose. ²⁸ Te mach'a ma la xch'uun spasel te mantaliletik te yaloj te Moisese, ya me xlaj sok ma me xna'bot yobolil sba yu'un, teme ay che'oxeb testigo yu'un te beluk amen spasoje. ²⁹ ¿Ma ba k'axemuk to xan ya yich'ik kastigo te mach'atik la spech'ik ta tek'el te Snich'an te Diose, sok te ma tulanuk sk'oplal la yaiyik te xch'ich'el te yach'il chapbil trato, te ja ta swenta te xch'ich'el te la yich' ch'ultesel yu'un te Diose sok te la yich' bol k'optayel te Espíritu te yak' yutsil ot'anile? ³⁰ Melel jna'ojtik te mach'a la yale: "JO'ON ME AY TA JWENTA TE SPAKOLE; JO'ON YA JKAK'BEY STOJ." Sok la yal xan: "TE KAJWALTIKE JA ME YA SLIKBEY SMUL TE SLUMALE." ³¹ ¡K'ax xi'bantik sba teme la stsakotik ta sk'ab te kuxul Diose! ³² Jauk me to juluk me ta ajolik te bin k'aalil te la ana'ik stojol te smelelil k'ope, te la ats'ikik bayal te awokolik te k'alal ayatik ta woklajel a. ³³ Te ja'exe la awich'ik k'exlaltesel ta komon sitil te k'alal la sbol-k'opteyatike sok te la awich'ik nutsele, sok nix te la akoltayik uuk te mach'atik jich k'ax swokolik uke. ³⁴ Melel te ja'exe la ana'beyik yobolil sba te mach'atik ayik ta chukel a, sok te la ats'ikik sok sbujts' awot'anik te k'alal la awich'ik pojbel bael spisil te beluk ay awu'unike. Melel ja na'ojikix a te ay xan beluk lek majt'anil ya ataik ta patilal. ³⁵ Jich yu'un manchuk me ya xch'ay te smuk'ul k'inal awaiyik ta stojol te Diose, melel ay muk'ul majt'anil yu'un. ³⁶ Melel te ja'exe ya me sk'an te ayuk smalib awu'unike, yu'un me jich ya stak' awich'ik te beluk k'axel yaloj te Diose, te k'alal spasojix a te sk'anjel yot'ane. ³⁷ "MELEL MA ME XJALAJ XAN, TE MACH'A YA XTALE, YA ME XTAL, MA ME XJALAJIX. ³⁸ TE MACH'A TOJ YAT'ELE, YA ME XKUXIN TA XCH'UUNJEL YOT'AN. TEME SUJT' TA SPATE, MA BA BINAX JKOT'AN YU'UN." ³⁹ Jauk me to, te jo'otike, ma jo'okotik te mach'a ya sujt' ta spat te ya yich'ik jinele. Jauk me to, jo'otik me te mach'a ay xch'uunjel jkot'antik ta sk'ejel te jch'uleltike.