10 ¹ YUMTZILÉ tu a'alaj ti Moisés: "Xeen ti Faraón, tumen dzoc in dsukunsik u puks'i'ik'al yetel u puks'i'ik'aloob u k'oosoob. Dsok in meetik lelá yolal in e'esik lu ch'ikulaj in pajtalil ichiloob. ² Beyxan dsok in beetik le lelá yolal u beytal a tsik'batik ta paalal yetel a wabiloob le baaloob dsok in beetik, buk'aj nojchil dsok in ds'akimba ti Egipto, yetel bix dsok in ds'aik yak'ach u chikulajoob in pajtalil ichiloob. Beytuna yan a ojeltik teene ten le YUMTZILÓ." ³ Beyó Moisese yetel Aarone vinó ti Faraón ka tu a'alajó ti: "YUMTZILÉ u jajal Dios le hebreosoobo, ku a'alik le jelá: '¿Ti buka' k'iin má' a k'aat a p'onkintabá ti teen? Cha'aj u bin in kaajal u ti'al ka pajtal u kikit'anken. ⁴ Bale wa teech ma' a k'at a cha'aj u bin in kaajal, ch'enxikinté, sámal in tuxtik sak'oob ta lu'um. ⁵ E lelooba yan u pixkoob yook'ol lu'um u ti'al mix maak ka beylak u paktik lu'ume. Yan u jaankoob u yalab ti le bax p'uts te bató. E leloxaná yan u jaankoob tu laakal pakal bi ché ku nuktá ta ka'ax. ⁶ E lelobá yan u chuupkoob a najiloob, yetel ti a k'oosoob yetel ti tu laakal le egipcioiloobo - jun p'eel báa mix u yum mix a nool mix jun teen u ilej, mixma dsok u ilaaj takte k'iin ka kaajoob te lu'uma tak te k'iiná."' Dsoke Moisese ka biní ka luk' tu tan Faraón. ⁷ Le u k'oosoob farone tu a'aloob ti: "¿Baax k'iin u xuul le wíinka jun p'eel sajkilil ti toon? Cha'aj u bin le israelitaoob u ti'al u kikit'antoob YUMTZIL u jajal Diosoob. ¿Má' patak a naatik Egiptoe dsok u xuulsatí?" ⁸ Moisés yetel Aarone tasabo ka'aten tu tan Faraón, le maax a'atioob: "Xeenex yetel kikit'anteex YUMTZIL a jajal Dioseex. Bale ¿Baax kaajil ku bin?" ⁹ Moisese tu a'alaj: "Yan in binoon yetel ak tantankelmoob yetel nuxibiloob, yetel ak jpaalaloob yetel ak xpaalaloob. Yan ak bin yetel ak t'amanoob yetel ak alak'oob, tumen yan in beetkoon junp'eel kimbesaj ti YUMTZIL." ¹⁰ Faraone tu a'alaj tioob: "Le YUMTZILÓ yanak ta weteleex, wa u p'it sutul ka in cha'aj a binexe yetel a mejen paalaleex. Ilawileex, yaatex k'ak'as tuukul. ¹¹ ¡Má'! Xeneex che yetel le xiiboobo yan ichileex ka kikit'antex YUMTZIL, tumen e leló leti' a k'aateex." Ka'atun Moises yetel Aarone josaboob tu tan Faraón. ¹² Ka'atune YUMTZILÉ tu a'alaj ti Mois'es: "Tich yetel a k'aab yook'ol u lu'umil Egipto le sáakoobo, ti'al le leloba ka u ch'apachto u lu'umil Egipto yetel u jaankoob le ka'axoob yan te'eló, tu laakal le baax p'at tumen le bató." ¹³ Moisese tu ticha' yetel u xolte yook'ool u lu'umil Egipto yetel YUMTZILÉ tu tasaj jun p'ell lak'in iik yook'ool le lu'um te k'iin yetel te áak'abó. Ka saslajé, le lakín iik'o tu taasaj le sáakoobo. ¹⁴ Le sáakoobo tu áalkabtoob tu laakal u lu'umil Egipto yetel tu k'ask'antoob tu laakal tuux. Mix jun teen yanchaj u woloma sáakoob te lu'umó yetel mixbáa jen bix le lel ku taal tu dsokol. ¹⁵ Tu baloob tu laakal yook'ool lu'um u ti'al ka yanak ejoch'eni. tu jaantoob tu laakal ka'ax te lu'umo ytel tu laakal u ich le pak'aloobo pát tumen le bató. ti tu laakal u lu'umil Egipto má p'at mix jun p'eel ka'ax yaaxí. mix ch'e mix pak'al te ka'axoobo. ¹⁶ Ka'atune Faraone tu seblakil tu t'aanaj Moisés yetel Aarón ka tu a'alaj: "Teené k'ebanchajen ti YUMTZIL a jajal Dioseex yetel ti teex. ¹⁷ Tiak tun, sa'aseex in k'eeban bejlae yetel payachi'neneex ti YUMTZIL a jajal Dioseex u tial ka u tsel ti teen le kíimilá." ¹⁸ Beytuno Moisese tu tselubá tu taan Faraón ka payachi'naj ti YUMTZIL. ¹⁹ YUMTZILE tu tasaj jun p'eel k'amkach chik'in iik ka tu moolaj tu laakal le sákoobo yetel tu laj ch'ochintaj te Chak K'aanabo: Mix jun p'eel sáak p'at tu lu'umil Egipto. ²⁰ Bale YUMTZILÉ tu dsuukinsaj u puks'i'ik'al Faraón yetel Faraone má' tu cha'aj u bin le israelitaoobo. ²¹ Ka'atune YUMTZILÉ tu a'alaj ti Moisés: "TIch a k'aab tak te ka'anó u ti'al ka yanak ejolchéinil yook'ol u lu'umil Egipto, ejoch'enil je u beytal u yubaal." ²² Moisese tu t'icha' u k'aab tak ka'anal ka yanchaj jun p'eel nojoch ejolch'enil ti tu laakal u lu'umil Egipto ichil ooxp'eel kíin. ²³ Mix maak u pajtal u yilik mix baa'; mix maak jook' tu najil ichil ooxp'eel kíin. Chen baaltune, tu laakal le israelitaoobo yan sasilí tioob te kuchil tuux kaajakbaloobo. ²⁴ Faraone tu t'aanaj Moisés ka tu a'alaj ti: "Xeen a kikit'antej YUMTZIL. Tak a wotoch u pajtal u binoob ta wetel, baale a taamanoob yetel a alak'oobe k'aabet u p'aatloob." ²⁵ Bale Moisese tu a'alaj: "K'aabetxan a ds'aik toon alak'oob u ti'al kinsaj sibal yetel tokbi sibal u ti'al toone u beytal in kinskoon u ti'al YUMTZIL in jajal Diosoon. ²⁶ In wakaxone beyxan k'abet u bin tak eetel, mix jun péel u mayoob yan u p'atal pachí, tumen toone k'aabet ak chik u ti'al ak kikit'antik YUMTZIL ak jajal Dios. Tumen tooné má' in ojlon baax yetel k'aabet ak kikit'aan YUMTZIL tak le chen k'uchkoon teeló. ²⁷ Bale YUMTZILE tu dsukinsaj u puks'i'ik'al Faraón yetel má' tu cha'aj u binoobi. ²⁸ Faraone tu a'alaj ti Moisés: "¡Tselabá ti taan! Kanaltaba ti jun p'ell baá, bik ka sunakech a wilen, tumen le kíin ta paktá u taan in iiché, yaan a kíimí." ²⁹ Moisese tu a'alaj: "Tech dsook a a'alik. Teené má' in ka suut in iil u taan a ich."