¹ Minyaano kinawoveleliherani n'rokorihu Febe, nan'teko okeretja eri o Cencreya, ² wera n'khale mwakhelaka wa Pwiya, wo ethu pithu yenani n'halawe ophela wa nyenyuva. Ni yenanitho hokhala namakhavihera athu entji, hataa ni minyaano. ³ Mwinselihaka Priscila ni Aquila, asikwaka mwintekoni mwa Yesu Kristu, ⁴ wo ekumyaaka aholevatja ekumyayeyo. Mi kinawasukhuru, ni wohikhala minyaano pahi, masi tjitjan'mo ekeretja tjotene tjamalapo. ⁵ N'seliheketho ekeretja eri owanyatja yeyo. Mwinseliheketho Epaneto on'fentaka, n'hokorokho wopatjera wa Asia mwa Kristu. ⁶ Mwinselihe Maria, varale n'teko wovirikana mwa nyenyuva. ⁷ Mwinseliheke Andonico ni Junias, asun'naka ni asikwaaka mothukiyani, ari ovuwa mwarumwa, wo tjitjan'mo yaari mwa Kristu kihinaya minyanoo. ⁸ Mwinseliheke Ampliato, on'fentaka mwa Apwiya. ⁹ Mwinseliheke Urbano, n'kwihu mwintekoni mwa Kristu, ni onfentaka Estaquis. ¹⁰ Mwinseliheke Apeles, olawihiya mwa Kristu. ¹¹ Mwinseliheke yaale ari amutjaawe mwanseliheke yaale ari amutjawe Narciso, ari mwa Pwiya. ¹² Mwinseliheke Trifena ni Trifosa, an'vara n'teko wa Pwiya. Mwinselihe onfentaka Perside, varale n'teko tjinene wa Pwiya. ¹³ M winselehe Rufu, othanliya naa Pwiya, ni anumwanawe yenani awaka. ¹⁴ Mwinselihe Asincrito, Flegonte, Hermes, Patrobas, Hermas ni asun'nawe ari ni yenani. ¹⁵ Mwinselihe Filologo ni Julia, Nereu ni mwanrokorawe, Olimpas ni athakattifu otene ari ni yenani. ¹⁶ N'khomatjeke nthu ninkwaawe nipetju emotja yottakattifuhiya. Ekeretja tja Kristu tjootene anawokhomatjani. ¹⁷ Vano, kinawokhanherihani nhenhuvatja, asun'naka, wera mupuwele wo yaale ankhala akumihatja okawanyaatja nukwakwathuwatja, anrwa wohikhala tjosomiya tjinthutjalehu. Mwahapuwatje. ¹⁸ Phimana athu n'toko ala khanpwanela wapwiyehu Yesu Kristu, masi mwerukuliniwaya. Ni mulumwaya orera ni opepetja, ayenatja anawottotha mirima tjokhya. ¹⁹ Phimana n'thonherwenhu wo winwenlela onawapwanha athu otene min'nhyano kinateliya, phimana, wanhenhuva, masi kinphela wera n'khaleke otjuwelatja wovirikana yorera, ni yorera wovirikana yotakhala. ²⁰ N'luku on'retele wowakuvyatja nan'nhakatta satana vathi wonha tjinhu. Wo mahala Apwiyehu Yesu Kristu akhale ninhu. ²¹ Timoteo, n'kwaaka omwintekoni, nawokhomatjani, woorera n'toko amutjaka Lucio, Jasao ni Sosipatro. ²² Minhaano, Tercio, kinlepa n'na niwarakhan'na, kinawokhomatjani wa Apwiya. ^{23 24} Gaio, on'makaka minhaano ni ekeretja yootene, nawokhomatjani. Erasto, namasun'ka owapoma, ni tjitjan'mo man'na Quatro, nawokhomatjani. ²⁵ Vano, yoole ri ottonkomanya wo wopankani okhala owemela, wo winwananya ni tjalalya tjaka ni wolalen'ya Yesu Kristu, wonayeli yowoniheriya yonteko osunkiye eri esiri okhumela mahukuokhalayi avirale. ²⁶ Vano n'natjo eri yowoniheriya, ni ehokhala yotjuweliya elapo tjotene mwatjolepiya tjohimiya, yonayeli ekettelo ya N'luku ohimala, wo winwenlela wo wamini. ²⁷ Phiyaayo pahi ni otjuwela N'luku, eriyari ya Yesu Kristu, okhale waarya wo mahuku otene. Amem!