1 ¹ Paulu, nanthukiya a Yeesu Kristu, wamotja ni munna Timoteo, kim-wantikhela wee Filemon, oofentiya , ni namakhavihereehu, ² Ni nrokorihu Apiya, ni Aquipo munniihu ommitekoni, ni nantikhelaka ekeretja erii owaannhaa; ³ Mahala ni nnema Nanluku Paapehu, ni naapwiya Yeesu Kristu. ⁴ Nenne nenne kinansukuru Mulukwaaka, kuwuupuwelala mmavekeloniwaka. ⁵ Kiniira kiiwaka nifentonaa ni ororomelawaa wa Pwiiya Yeesu ni naathakathifu ootene. ⁶ Minnhaano kinaavekela wira waatana wo nroromelona nihii wintjive muutjuwelani wo tjuthu tjooreera tjiri mwa Yeesu Kristu. ⁷ Nlathu wo nifentonaa, munna, kiniira kitteeliyaka nuumaalihiya, kontha mirima tjaathakathifu, tjinkhala tjootjivatjivihiyathi nlathu wawaa. ⁸ Pimaana kinookhalanaru ehathuwa wa Kristu kuurume emphwaneela opanka ⁹ mwantjina no nifento kinaakupali owiihana, minnhaano, Paulu, nlopwana owuuluvala ni, vano nanthukiya nlathu wa Yeesu Kristu. ¹⁰ Minnhaano kinaawulepela esonthe mwaha wa mwanaka Onesimo, yooyo kin-yaralyaaka kinari okalaposso. ¹¹ maana yena, ekhalayi, khaari ethu mmatataniwaa; massi, nnavaa, tofayita, pooti okhala ni mi hataa ni wee. ¹² Minnhaano kinawuuvahenratho, yena ori nrimaaka. ¹³ Minnhaano kan-hala okupali wira akhale ni minnhaano, wo wiira yena akikhavihere, opurwaa, kinaryeene nanthukiya nlathu wo hapari. ¹⁴ Pimaana, nkipankale ethupiithu woohiwiwanana, wo wiira othunawaa okhale woohikanhenrihiya, massi ninrimaa wootene. ¹⁵ Pooti pimaana yena amwalaka niwee okati vakaani, wo wiira onkhalane mahuku ootene, ¹⁶ kahii ntokoo epotha, massi woovikana epotha, munna oofentiya, ventji awaka, ni tjitjommo awaa, mwiiruthuni mpaka waapwiiya. ¹⁷ Vano, we wakhala wiiraonaakikupaleela okhala nkhwaa, omwaakenle ntoko tjaarwaa okaakhela minnhaano. ¹⁸ Yena akhala wiira ohuupukuta walaani onanlokiha, okihimeere minnhaano. ¹⁹ Minnhaano, Paulu, kinaathikha ela ni matataaka: mi kinrwaa wooliva, woohitafiti wiira niwee kinamuulokiha. ²⁰ Aayo, munna, wira mi kaakheele nno okaviheriyanno ni wee, mwaha wa Pwiiya. Olipihere nrimaaka mwa Kristu. ²¹ Kikhuluvelaka ehisimatjaa mi kihowantikhela, kitjuwelaka wiira we onaahala opanka tjithu tjoovikana nnha tjinuhimeryaka. ²² Kinawuulepela tjitjommo okaavere opuro woopheela okhala, maana eriyari wo mavekelwennhu, kuuhokoleeleni orinnhu. ²³ Ahoosenliha: Epafras (nkhwaaka nkalapooso mwa Yeesu Kristu), ²⁴ Marku, Aristarco, Demas ni Luka (anamakhaviheraaaka omuntekoni). ²⁵ Mahala apwiiyehu Yeesu Kristu akhale ni nnepenhu. Amen!