¹ Ola Meiquisedeque, mwene oo Salem, weekweeli namkutho amluku owiirimu, yenani hokumaana ni Abrao owakatthi waahokolyaawe wiiviyaaya mamwene, ni aahonreeriha. ² Phiyenani Abrao aahonvaha mwaavulo wooteene. Mtjinanawe "Meiquisedeque" nihimya "mwene osariya" ni tjitjon´mo "mwene o Salem" wala tjoo "mwene onrethele". ³ Yenani khanaatthumwaane wala khanaanumwaane, wala amutji, woohikhala wuupatjeroni womahuku wala makwelwaawe. Alikanihiyaka nimwaana amuku, yenani nkhala namkutho omahuku ooteene. ⁴ Mooneke eyuulupale yaari yanlopwana oonanyaaka okhala Abrao aahonvaha mwaavulo tjootepesa oreera. ⁵ Womphanthi n´motja, nloko na Levi amwaakhenla namkutho, aahaana mlamulo nimotja yonayeeli, ekethelo wira avahiye mwaavulo waathu, eyo phiila, waasun´nawe wo tjitjon´mo mloko na Abrao. ⁶ Masi wa ekwaawe, Melquisedeque, khaari nloko na Levi, aakhenle mwaavulo wa Abrao ni aahoreeriha, wa yooyo aahaana tjookhuluveliha. ⁷ Khaavottho makhothelo wira mwankaani naareerihiya ni muulupale. ⁸ Yeela ethwiila, yaari alopwana ookwa ankhala yaakhelaka mwaavulo, Melquisedeque, aakhenle mwaavulo wa Abrao, en´himya wira haavo. ⁹ Ni, wotjitjon´mo, mpaka Levi, aakhenle mwaavulo, tjitjon´mo holiva mwaavulo mwaha wa Abrao. ¹⁰ Yenani aari hinaaya oyariya, owakatthi Abrao waakhumalyaawe ni Melquisedeque. ¹¹ Masi vano waari wira onasariya waari mwaha wamkutho namloko na Levi (mlathu wayenani athu ahaakhela ekethelo) vano aakookhumenla tjani namkutho mkwaawe nloko na Melquisedeque ni niihaniyaka nloko na Arao? ¹² Maana mkutho waarukunusiyaka ekethelo ehaana toottho orukunusiya. ¹³ Mooneke, yoole naatjiya wa yeela yowantikhiya eri mwanloko nikwaawe wa yeela n´naakhala nthu mkwaawe themkatjale hikhanlettho oothemkatja waaltari. ¹⁴ Eri yootjuweliya wira apwiiyeehu ari nikhoto na Yuta, mwaha womloko nen´no Mosi khahimyale ethu etafitiyaka mwaha waanamkutho. ¹⁵ Ni yeeyo enkhala yootepesa otjuweliya yakhala, yookhumenla namkutho mkwaawe oolikana ni Melquisedeque. ¹⁶ Khayaari ekethelo yonayeeli namloko nomwiiruthuni wa yenani khanlyaawe namkutho, masi, waahikhala eyo, mwaha wokuru weekumi emotja yaahokwanhuwatja. ¹⁷ Phimaana tjowantikhiya tjin´himyaaya wohisimatjawe. "we onamkutho omahuku ooteene, wonayeeli tjooruma tja Melquisedeque. ¹⁸ Tjitjon´mo ekano tjokhalayi tjiri tjoomalihiya komttha tjaari tjootheethyaatja ni tjoohipwanhiya ethu. ¹⁹ Weekweeli, ekethelo khatjimalelihiye, nen´natjoo, yooreera wanriiha eri yoowuulumiya, wira nimwaathamele mluku. ²⁰ Ni yeeyo khikhumelenle woohikhala olapha. Womphanthi m´motja, ayenatja yaahomwaakhenla namkutho oohilapha. ²¹ Wiikwaawe, yesu, yoole, aahookhala namkutho oolapha ni yoole niira: Apwiiya aholapha ni khan´hokoleela othuli: "weeyova onamkutho omahuku ooteene". ²² Yaala manan´naala, yesu n´nolipihera waataana wuulupale. ²³ Mooneke, ayenatja athu entji anawiipamka onamkutho, masi ari owinkithiya okwa woohokoleela. ²⁴ Phimaana, konttha yesu mkhala omahuku ooteene, onamkuthwaawooyo ori wo mahuku ooteene. ²⁵ Phiyeeyo, yenani nawoopola woomalela ni yaale, weeriyaryaawe, amphiya wamluku; Akhalaka mahuku ooteene wira aavekelelaka ayenatja. ²⁶ Phimaana namkutho muulupale naapwanela: Thakathiifu, ohitheka ethu, opwanelela, oreera, mwalanihiye naanamatheka, khanle oovuwihiya otjulu wiirimu. ²⁷ Ovirikana naanamkutho uulupale akwaawe yenani khampheela ovaha okutho khula nihuku, woopatjera tjoothekatjawe, ni toottho etampi tjaathu. Yenani hopamka eyo emaara emotja waathu ooteene, owakatthi hiivahemralyaawe yenani. ²⁸ Ekethelo tjinaakhaliha anmkutho uulupale athu ankhala atheethyaaka, masi nuulumo noolapha, niwaale ehiinaaya ekethelo, ohontthanla mwaana, oopwanela omahuku ooteene.