¹ Hyi tootho, nihorukureeriya naanamoona uulupale omahuthe, nikhothe yooteene yoolemela niitampi yoowaakuvyaa othara, nithawe nuuvilela, ori ohoolowihu. ² Nin´wehaka yesu paasi yooyo ori oopatjera ni oomalihera waaminiwihu. Yooyo aahohiya otheeliya mrima, khuvilela wamwiikimanho aahotanhifu ehaaya ni ookomale moono weelopwana weehitjeni wamluku. ³ M´muupuwele ratha yoole ovilenle waanatampi wira m´hootjyee wala m´hivolole. ⁴ Ekhotho enwaneenhu mwaha wo tampi, khan´naaya ovilela mpakha omwaresa ephomeenhu. ⁵ Ni nhu n´holiyala matjuu yaahimeeriyeenhu toko asaana "Mhitanhifu mwiivaanhihaka naapwiya, wala n´hirusiye yoopwapwelani. ⁶ Kontha apwiya anan´himeerya yoole nonfentaaya ni anontharusa yoole m´mwaakhelaaya okhala mwanaya- ⁷ Mvileleke moohaawani toko ohiimeeriya, mluku nootafini toko asaanaawe, vano mwaanani hintharusiya naathumwanawe? ⁸ Masi mwakhalaka woohipwapweliya n´nari ooteene n´neethela, vano nhu munkhala asaana oohiphuanela ni oohikhala asaanaawe. ⁹ Ohiya vaa naahaana asithumwanihu omwiiruthuni, yanivaanhiha nihi naanawaahisimu, khawakhalenle wiiwelela athumwaninhu omun´nepani ni tjitjon´mo nikhalaka? ¹⁰ Womphanthe mkwaawe, asithumwanihu yaanonivaanhiha ni mahuku makwaawe yaakhala toko ekweeli. Masi mphanthe mkwaawe, mluku naanivaanhiha wira nikhale ratha wowiira nikhalele mphanthe oweryawawe. ¹¹ Ovaanhihiya wooteene, nen´navaa, khunakhala wira phuutheeliyawene, masi wooriipiha mrima. Vano, owakatthi mkwaawe, onawaana n´hokhorokho woomaalelyaa niisariya, wayaale yaari oweethela tjoohimeeriya. ¹² Phimaana nlipihe matateenhu owootjyaatja ni makuttha ootheethyaa. ¹³ Mookolole mithala wira enhaa, ooteene yooole ri ootheethyaa wira hisirikan´nane, woovirikana aakhale oovonihiya. ¹⁴ Mthare mrethele ooteene ninthakathiifu, woohikhala yeeyo khaavo n´hala owoona apwiya. ¹⁵ Ratha wira hikhale n´hala ohaaleela mahala amluku, ni ohikhale ntitthaari m´motj woowaawa, wuunuwaka ohootankulatjeni wamphiyaaya owaaphuanhiha entji. ¹⁶ Mrathvenle wira hikhale hinthithimiha toko Esau, yooyo aatumihale niiyoolya ekulupalyaawe yoopatjera oyariya. ¹⁷ Kontha ntjuwele wira owakatthi waapheelalyaawe ohiyeriya tjooreerihiya, oyo aahokhotheliya, vano khaakwitinri opithikusa muupuwelelwaawe, okhalaa wira aanunla ventji arweelaka. ¹⁸ Kontha khan´naphiya wamwaako wooreerela ovara, mwaako yooyo ompharela mooro, hata mweepiphini, mooripelatja, hata ephyoo yuulupale. ¹⁹ Khamwiiwale nipenka, wala ntjuu nomoolumo, yaale yiiwale yaakenlyaaya wira ahaakuleletho wiiwa. ²⁰ Maana khayaakwitiri ovilela tjooruma tjaahimiya, hata mwan´nama, khukwanha yooyo mwaakooyo, aanaavonhakatjiya nimaluku. ²¹ Yootepa woopiha yaari yowoonyaa, wira Mosi aahiira: Kin´noova nuuthukumela. ²² Masi n´hophiya omwaako Siao, epooma yamluku mkumi, ojerusalem wowiirimu, ori malaikha oohaalikelyaa, athujuman´ne nuuthapa. ²³ M´hophiya ekeretja yaasun´na owiithutjiya, alepiye matjinaaya wiirimu, moophiya wamluku mphuki aathu ooteene, ni minepa tjaathu osariya, ooreera mrima woomalela. ²⁴ M´homoona yesu, mwaakiho wo waataana wonaanaano, ni weephome yeekumi, yowuuluma saana woovirikana ephome yaabel. ²⁵ M´wehe wira m´himvaanhihe yoole noohimeeryani, maana athu amkhothale yoole aamweethaaya vatthiva khanthawa, weekeekhayi hyii khaninthawa. Hyii nan´hapuwaka yoole nneethihera wiirimu. ²⁶ Yooyo, hoovahani ethaya, masi yena hokhuluveliha iiraka: nalelo wamotja kinaahala ovaha kahi ethaya paasi, masi toottho erimu. ²⁷ Yaala moolumwaala, nanlelo wamotja, onaatjiya ohapusiya tjen´nho tjithun´nho, wala, tjithu tjunpiye, wira tjikhalele tjoohivahiya. ²⁸ Phimaana, naakhemleene omwene ohin´hala omala, nikhalane mahala ni manan´na yaala nimweethihere mluku womanan´na ooreera, niihisima niwoova. ²⁹ Maana mlukweehu mooro wowooriya.