¹ Vano, waamini onkhala ekupaleelo wo tjithu tjinanriihiya. Olawohiya wotjithu tjihinoonya. ² Maana, mwaha wowaamini, athu okhalayi yaahompwanha namoona ooreera. ³ Mwaha wowaamini, ninamoona wira olumwenku opathusiye ni nuulumo namluku, ni manan´na yeele enoonyaa khipankiye niithu enoonyaa. ⁴ Waari mwaha wowaamini Abel wanvahalyaawe mkutho womaana mluku woovirikana Caim, mlathu woyeeyo ahooniya okhala nasariya, ni mluku honvaha osaahiti mlathu watjoovahatjawe. Ni mwaha wowaamini Abel mpakha n´na nawuuluma noowaru. ⁵ Waari mwaha wowaamini Enoque waakusiyaawe mpakha ohimoona nookwa. "Yena khaapwanhiye, okhala wira mluku homkusa". Maana hinakusiya aahompwanha namoona omaana wontheeliha mluku. ⁶ Woohaamini onaarika ontheelihamluku, phimaana, onaapwanela yoole n´mwaathamela mluku haana okupali wira yena haavo ni nawaathuvela yaale anomrweela. ⁷ Waari mwaha wowaamini Noe, waafunthihiyaawe nimluku mwaha wotjithu tjaari tjihinoonyaa, nuutjuwela wamluku, aahopamka ekalawa wira oopole enupaawe. Apankaka yeeyo, aahothukela olumwenku ni aahokhala nasariya owaale eriyari yowaamini. ⁸ Waari mwaha wowaamini Abrahamu, wiihaniyaawe, aahiiwelela ni aahokhuma arwaaka opuro warwaawe waakhenla yoohiyeriya. Yena aahokhuma, hitjuwelaka waarwaawe. ⁹ Waari mwaha wowaamini waapwanhalyaawe ethaya yookhuluvelihiya toko mthu eelapo yoothayi. Yena aahokhala ni Isaque ni Jaco, apwanhale okhuluvelihiya omotjaaru. ¹⁰ Kontha yena iira awehaka epooma tjiri tjootekiya, maana namaratha ni namateka mluku. ¹¹ Waari mwaha wowaamini Sara, wiiraawe hiyaraka, ahaakhela ekuru yookhalana. Eyo yiiranyaale anarina myaakha tjintji, maana ahonkhaliha mwaamini yoole pamkale ekhuluvelo. ¹² Phimaana, wonlopwana yooyo, ari oofentesiya, aahaayara athu entji, toko ethontho tjowiirimu tjohaalikelyaa toko mtthaka woopwaryaa. ¹³ Yaala ooteene ahokwa mowaaminini woohaakhela tjookhuluvelihiya, awehaka, asenlihaka nthayi nthayi ni alaphululaka wira yaari athu oothayi vathayani. ¹⁴ Wa yaale anuuluma tjen´nha tjithun´nha, naakhala owooneeha wira aniira arweelaka yookhuluvela. ¹⁵ Yaari owuupuwela ethaya ehiyalyaaya, yaanahala opwanha owakathi woohokolyaa. ¹⁶ Masi ayenatja apheelatjale okhuluvela woorera, eyo phiiyo, yowiirimu, mluku khari owoona ehaaya woowiihana mlukwaayatja, maana haatthomkomanihera epooma emotja. ¹⁷ Waari mwaha wowaamini Abrahamu, waathehathehiyaawe, aahonvaha Isaque, oomwiithutjaawe, yoole aakhelenle yookhuluvelihiya. ¹⁸ Yaari woyeeyo yena yaahimeeriyaawe: "mwa Isaque naahaala wiihaniya ni nikhotonawe". ¹⁹ Abrahamu aahonkhaliha wira mluku aari okuru wira aavuse mwa ookwa ni, niwoonyaa, homwaakhenlatho. ²⁰ Waari mwaha wowaamini Isaque aahomreriha Jaco ni Esau mwaha wotjithu tjaawa. ²¹ Waari mwaha wowaamini Jaco, wiiraawe akwaka, aahonreeriha khula mwaana a Jose ni, aahokhoroma nimkurukuru mkhoraawe, atthamalaka. ²² Waari mwaha wowaamini Jose, waathamenlyaawe wuumaleloniwawe, aahuuluma wa Exodo waasaana a Israel wEgito ni aahovaha nuulumo mwaha womakhuvaawe. ²³ Waari mwaha wowaamini Mosi, wayariyaawe, aahovitthiya, myeeri miraru, nan´nathumwaane, kontha yaanowoona wira mwan´himooyo aari oopwanela. Ayenatja khayoovatjale tjookoha tja mwene. ²⁴ Waari mwaha wowaamini Mosi, nuunuwaleene, aahokhotha wiihaniya waana a mwaana a Farao. ²⁵ Masi yena aahotthanla ohuva ninsovo wamluku, woovirikaniha opwanha wo tampi nuuwakatthi mkwaawe. ²⁶ Yena aakhalin´he wira ohinkokhorela kristu waari m´hakhu muulupale woovirikana tjoosunkatjiya weegito, kontha aaholipiha meetwaawe muupwanhani. ²⁷ Waari mwaha wowamini Mosi waahiyalyaawe Egito. Yena khoovale orusiya wamwene, maana hovilela toko noona yoole ri oohoonyaa. ²⁸ Waari mwaha wowaamini wanlyalyaawe paasica ni omwaryaa wophome, wira namakwanhula aasaana oolitjeriya haakwanhe. ²⁹ Waari mwaha wowaamini ayenatja yaaholapuwa epharyaa yooseerya toko ethaya towuuma. Atjiipitu wapheelalyaaya opamka tjitjon´mo, yaahomiryatjiya. ³⁰ Waari mwaha wowaamini mikotha tjoojerico waamoralyaaya, maana tjaahorukureeriya mahuku saapa. ³¹ Waari mwaha wowaamini Raabe, nluvi, khakhanle naathu oohiwelela, phimaana ahaakhela nimrethele. ³² Esiyanitho en´halaaka ohimya? Onaahala okihaleela owakathi wira kuulume mwaha wa Gideao, Baraque, Sansao, Jefte, Davi, Samuel ni marumeyi. ³³ Yaayo, mwaha wowaamini, ahopwanhatja omwene, ahokhalela esariya ni ahaakhela tjookhuluvelihiya. Yaahothuka eyano tjaakharamu. ³⁴ Yaahaana ekuru yomooro, yaahothawa mkatanani yoweetthesa, yaaholipiheriya mootheethyaani, yaahokhatja okuru mkhothoni ni yaahaathematja anakhotho oothayi. ³⁵ Atthiyana yaahaakhela athwaaya ookwa woohihin´mwani. Akwaawe yaahotharusiya, ahithunaka otaphulatjiya wira akhalane wun´wemla wo maana. ³⁶ Akwaawe yaanothehatheha oruwana nuuhanhuriha, hata nuunholo nuuthukelatjiya. ³⁷ Yaahohomakatjiya, okawanihatjiya, nuukwa niikatana. Yaaheetha ookhuneelatjiya ni mthapala nopwithipwithi ni nopuri, oothweiya, oomalihiya, nuuhukhumwatjiya. ³⁸ Olumwemku khawaapwanenle waayenatja. Ayenatja yaaheethatja avaraka tjootakhala mootthakoni, n´mamyaakoni, n´malukuni ni mphaani wo thaya. ³⁹ Wanookhalaru ooteene yaala yaahaana namoona ooreera mwaha wowaaminiwaya, khayaakhenle yookhuluvelihiya. ⁴⁰ Maana mluku honithenkatjera ethu yoopwanela, wira nihiivano nareerihiye.