¹ N'na Nulumon'na nekhweli: Akhala wira havo mphela okhala nkhulupale onkeretja, n'nophela nteko worera. ² Hana akhalaka ohimamatjiya, nlopwana onthiyana m'motja, othonkomania, ohissima, hana akhala owakhenla aletto, okhuitiri ossomiha. ³ Hikhale nan'hapaliya, owanihana, hana akhalaka ovilelea ni oomaala, hikhale ontjiva nssurukhu. ⁴ Hana akhala n'holeli orera wathokoniwawe, hana assomihaka assanawe omwiwelela ni nun'hissima. ⁵ Vano akhalaka wira khntjuwela wettihera ethokoaweyo ratta, n'hala wettihera tjani ekeretja ya Muluku? ⁶ Hikhale okela nanano, wira hikhale owikukhuliha, ni arwaka othukeliya ntoko tji thukeliyawe setuani. ⁷ Ni hana akhala ohissimiya naathu ontuniyani, wira hikhale ovanhihatjiya na pinatamu ni amorela mwitaphani na setuani. ⁸ Womanan'na wamotja, ma diacono ahana akhala omakhalelo orera, ahana akhalaka onulumo, ahikhale anan'hapaliya, ahikhale anassooyo, ⁹ ahana akhalanaka mupuwelelo orera ni ahana akhalanaka wamini. ¹⁰ Ahana alawihiyaka toko, vano yantjereke ovara nteko, yakhalaka ohimamatjiya. ¹¹ Womanan'na wa motja, mwarawe diacono hana akhalaka ohissima, hikhale ohimia-himia, hana akhalaka othonkomania ni okpalela wa tjithu tjotene. ¹² Ma diaconoayo ahana akhalaka nlopwana a nthiyana m'motja, ni hana aholelaka assanaya ni thokoaaya. ¹³ Yale anettihera oratta anapwanha n'ttittimiho no maana nu khalana ekupalelo wira ari ni Yesu Kristu. ¹⁴ Kinawantikhela tjithun'ya kiphelaka owa owotola phiyaturu; ¹⁵ massi, kapitjakavale, onahala otjuwela manan'na ophela wettihera enupa ya Muluku, enari ekeretja ya Muluku nkumi, enari elipihero ni eyissererio ye khweli. ¹⁶ Ni, ohirikarikaka, ekhweli yulupale ethonheriye yo wirimu: Yena hothonheria mwiruthuni, ohimiakatjiya mwi N'nepani, honiya ni malaikha, holalen'ya mwa malapo, hothuniya , ni avuwihiyaka wariawaya.