¹ Kupera kwezviro izvi, ndakaona ngirozi imweni, yeitchita kudhenga, yanga inosimba rikuru, uye nyika yakavenekerwa nokuguinya kwayo. ² Iona yaka dhaidzira noizwi rikuru, yetchiti: "Yambwera! Yambwera Babironi ikuru! uye yaita nyumba yemadimoni, bhaco remweya dzese dzakaswipa uye nozvinomburuka zvinorambwa. ³ Ngokuti nyika dzese dziri kumwa dhoro reupombwe wako. Madzimambo enyika ariku hura naro. Wanoita mabizi munyika wapfuma nosimba retxina yaunoita". ⁴ Ndakazuwa izwi rimweni reibva kudhenga, retchiti: "Bhudhai imona, anhu angu, kuti musawe anhu anoshaisha sa aona, uye kuti musabhathuwe ne makurundo atchawira; ⁵ ngokuti zvishaishi zvao zvaguma dzamara kudhenga, uye Mwari warangarira zviwi zvao. ⁶ Waripei se zvakaita ne amweni, uye ngaphuwe mubhairo se mabhasa ao; mucopo yaka venganidza nayo ngavenganidzirwhewo zvakapethwa. ⁷ Se zvakaita kudzi kudza patchezvake uye wakararama mu upfumi wakakura, mupeiwo mupimo umweu we kuthabhuswa uye nonhamo. Ngokuti rinoti mu mwoio waro. Ndakagara se mambokadzi, andiripi tchirikadze uye andizozii ku gurunguta . ⁸ Saka, nerimwe roga zuwa, makurundo ako atchauya: rufu, misodzi uye nzara. Irona ritchapiswa nomuriro, ngokuti Ishe Mwari ndiye nyamasimba uye Iena ndiye atcha tonga kwazvo". ⁹ Madzimambo enyika akahura naro atchatchema uye atchatsukwara pamusoro paro akaona tchutsi tchakawanda tchemuriro wawo. ¹⁰ Aona atcharamba arikure, nokuthiya kuthabhuswa, etchiti: "AI! AI! guta guru Babironi, rakasimba! Nokuti nonguwa imwe bhasi mubhairo wawo waguma." ¹¹ Wanoita mabizi munyika warikutchema ye arikumurunguta naro, nokuti apana arikutenga mabizi ao: ¹² zviro ingana siriva, ndarama, mapuwe akarungama, matchira kwao uye nematabhwa ese anosiririsa, zviro zvese zvakaita nyanga dzinosenza, matabhwa akafuritchuwa, boronzi, masimbe uye zvinosenzeswa pakuwaka, ¹³ zvinosenzeswa kuti anhu arungame, zvinosenzeswa kunakisa zvokurha, zvinonhuwhira, dhoro, mafuta, ufu wakasevuwa, zvinyama, mabhira, mbongoio, asenzi uye ne anhu. ¹⁴ Tchibhereko tchawaidha kaginji nesimba rese rako tchaenda kubhudha kwauri. Upfumi wako wese nokuguinya kwako kwatiza; uye azvizo onekwi. ¹⁵ Aya anoita mabizi ezviro izvi, uye akapfuma ngondaya yazvo, watcharamba wari kure ngokuthiya, kushuphuwa kwao, kurikutchema uye kugurunguta kukuru. ¹⁶ Aona atchati: "AI! AI! Guta riguru rakapfekedzuwa matchira anodura, nokunyanikira, uye akavenganidzuwa nesiriva, zvimapuwe zvakakosha uye zviro zvakarungama!" ¹⁷ Ngokuti, panguwa imwe bhasi, upfumi mwese wakatsweteka. Wese unotekenya ndeka, unotekenya bhande uye nowese wanofamba mubhahari, watcharamba wari kure. ¹⁸ Aona aka khuwa pakaaona tchutsi tchakakuru tcho urutswa wau. Wakati: "Guta ripi rakaezana neguta guru?" ¹⁹ Aona akanda djiwho musoro dzao uye kakkhuwa , kurukutchema uye etchigurunguta: "Ai! Ai kuguta guru, kuya kwekuti wese wanga wano mabhande mubhahari, wakapfuma ngokudha kwaro, nokuti, panguwa imwe bhasi raka putswa." ²⁰ Dhakarai pamusoro paro, imwi dhenga, imwi atswene, maphostoro uye nomaporofiti, nokuti Mwari waunzisa kutonguwa pamusoro paro." ²¹ Imwe ngirosi yakasimba yakabhata bhuwe rakaita bhuwe guru rinomburumbuka kakukhandira mubhahari, yetchiti: "Nomushobho uyu, Babironi, guta guru ritchaputswa novhinga uye aritcha oniwi narini. ²² Ngoma dzino embuwa, dzinoridzwa, wanoridza varimba, uye anoridza trombito anhu atchawazwi mauri. Akuna muumbi wemushobho upi utchaonekwa mauri. Akuna tchinoimbuwha tchitchazozika mauri. ²³ Tchiedza tche ruju atchizonyanikiri mauri. Izwi rotchikomba uye neremhandara arizoziki narini mauri nokuti anhu ako aita mabizi anga ari akuru munyika uye nyika dzese dzakatsotswa no uroi wako. ²⁴ Mwariri makaonekwa ngazi yemaporofiti uye atswene uye noese akauraiwa munyika."