¹ Imwimwi kamare munozviziya, hama, kuti kuya kwedhu kuzomuonai akuzinyore. ² Munoziya kuti takashupika uye takabhatuwa nomushobho unotswerudza kuFiripi. Asi nokudharo takathemba kuna Mwari kuti tiparidzirane Vangeri Rake nemwi, kunyange tiripakati pozviro zviri kunetsa. ³ Nokuti zvatirikukuvunzai azvizi zviro zvakashata, uye kana zvokuswipa, kana zvoutsotsi. ⁴ Asi, sezvatakathembwa na Mwari kuti Vangeri ripuwe isusu, nokudharo tinoriparidza, tisikafadzi anhu, asi techifadza Mwari. Yena ndiye Uya anonyasa kuziya mwoyo dzedhu. ⁵ Saka atina kumbosenzesa masoko akarungama kuti timutsotsei, sezvamunoziya, uye atina kuzviitira kuti tipuwe mare. Mwari ndimupupuri wedhu. ⁶ Atitswaki kukudzwa noanhu, kana nemwi uye kana neamweni. Semapositori aKirisitu, taidhikana kuti tikukumbirei zviro. ⁷ Asi kunza kwazvo, takanyararisa pakati penyu tisikazi kukumbira tchiro, semudzimai ariku kurisa ana ake. ⁸ Nomushobho umweo, nokudha kwe rudho rikuro ratinaro nemwi, taidhakara nokupasana vangeri uye neupenyu wedhu isusu. Nokuti maita adhikwani edhu. ⁹ Hama, pasina kukuganagana muno munorangarira bhasa redhu uye nodhambudziko redhu. Takasenza usiko nomasikati kuti tisareme kwamuri. Panguwa yeneyo takakuparidzirai Vangeri raMwari. ¹⁰ Imwimwi muri apupuri, naMwari futi, kuti takagara nomushobho wakatchena, wakarurama uye nomushobho usikashoreki nemwi, munutenda. ¹¹ Nomushobho umwewo, munoziya kuti takaku bhatai se bhabha arikubhata ana awo, ¹² techikupai zano, techikusimbisai kuti murarame upenyu uno dhakadza Mwari, akakudhaidzai kuumambo Wake uye kusimba Rake. ¹³ Ngondaya yazvo isusuwo futi tinotendawo Mwari nguwa yese. Nokuti, pamaka tambira neso Soko ramakazuwa, amuna kuritambira seSoko reanhu, asi se zvariri, Soko raMwari. Iri ndiro Soko ririkusenzawo mwamuri, imwimwi munotenda. ¹⁴ Ngokuti imwimwi, hama, madziita atedzeri emakereke aMwari ariku djudiya, muna Kirisitu Djeso. Nokuti makashupikawo zviro zvimwezvo neadhoni enyu, seaona akazvishupika nomadjuda. ¹⁵ Ndiwo aona madjuda akauraya Ishe Djeso uyezve nemaporofiti. Ndiwo aona akatidzingira. Aona apfazdi Mwari uye ashamwaridzani ne anhu, ¹⁶ uye anotirambidza kuparidzira ruponeso kuaya asiripi madjuda. Nomushobho uyu, anotunhudzira zvitema zvao bhasi. Hasha dzaMwari dzauya tchose pamusoro pao. ¹⁷ Isusu, hama, takasianiswa nemwi munguwa ishoma, pa uwepo, kwete mumwoyo, tinotchidho tchikuru tchokuuyazve kweneyo timu oneizve. ¹⁸ Ngokuti tingodha kuuya kuzomuonai. Inini, Pauro, ndakaedza kuuya kuzomuonai kuno pinda kamwe, asi Sathani wakati pinga. ¹⁹ Nokuti, Ishe edhu akawhirira, ndiani atchawa tariro redhu, rupfaro, uye corona yakaguinya pamberi Pake? Andimwipi imwimwi ne amweni? ²⁰ Nokuti imwimwi ndimwi kugwinya kwedhu uye nerupfaro.